2 VAKORINTO 13

1Adiya nda wuraru ni txi ta kheyo kwanu. Yotshe mhaka yi na ta tsaniswa ngu wufakazi wa vathu vambidi mwendo vararu. 2Ni mi gete kukhatani, se nga ti ni nga wombisa tona ka dipfhumba dangu da wumbidi, na engeta ni womba aku ni ku kule, ka vale va nga wonha kale ni ka votshe vamwane: Ni txi tshumela ni ta, kha ni nambi ta va ni divalelo, 3nguko mi lava txikombiso txa ti to Kristu a wombawomba ngu ngani. Ene kha nga ni dikhodho, ngako a txi thuma hagari kwanu, aniko mtamo wakwe wu ti komba kwanu. 4Ngu ditshuri, a gogotetwe ha txihambanoni a di ni dikhodho, aniko wa hanya ngu mtamo wa Txizimu. Nanathu hi ni dikhodho kwakwe, aniko hi na hanya kumweko nayo ngu mtamo wa Txizimu hagari kwanu. 5Ti xoleni mipune, kufela kuwona ti to mi tsani kukholwani; yanani masoni ngu ku ti xola. Mwendo mo va mi si ti zivi ti to Jesu Kristu wa ho kwanu kani? Ahanti mwendo mi to koneka. 6Aniko na themba, mi na ti ziva ti to athu kha ha koneka. 7Se, na mi kombelela ka Txizimu ti to mi si mahi kubiha, kuxuva kwathu hi nga ku ti komba kota nga va va nga si kota, aniko hi xuva ti to anu mi maha tatinene, hambi hi txi woneka nga hi vatandeki. 8Nguko, kha hi na mtamo wo lwa ni ditshuri, aniko hi ema ni dona ditshuri. 9Athu ha tsaka ngako hi di va dikhodho, kasi anu mi di va mtamo. Ati hi mi kombelako ngu tona ngu ti to mi va vo hetiseka. 10Ni mi bhalela timhaka tiya ni di kule, kufela ku, mbimo yi ni no hoka kheyo, ni si ta thumisa tshofu, madingano ni mtamo wu ni nga ningwa ngu Mkoma, kasi kuaka i singa kukhundumusa. 11Magwito ka totshe, vanathu, zumbani mi di tsakile, khutalani ngu kumaha wunene, tsanisanani mi txi va ni kualakanya kumweko, mi txi hanya ngu kudikha. Txizimu txa lirando ni txa kudikha txi na va ni manu. 12Losanani ngu kupswopswana ko sawuleka. Va mi dingula votshe Vasawuleki. 13Kateko ya Mkoma Jesu Kristu, lirando la Txizimu, ni kutshangana ka Moya wo Sawuleka, si na ve ni nanu motshenu.

will be added

X\