2 VAKORINTO 11

1Hingani timisela kudotho ngu ngani, hambi ni txi nga diphuphulu! Kunene, mi timisete ngu ngani kala nyamsi. 2Na lusa ngu nganu, ngu txiluse txa Txizimu nguko ni mi ningete mi wutwa ngu mwamna wa mmweyo, kasiku ni txi mi yisa ka Kristu nga timbiri to basa. 3Aniko na thava ti to, ngaku mnyoka wu nga kanganyisa Evha ngu marindi a wona, mialakanyo yanu ni yona yi nga wonhwa, mi txi thaviswa ka wunene wu wu ku ka Kristu. 4Ngukusa, ngako a txi ta mthu kwanu, a txi ta wombawomba ngu Jesu, wo hambana ni wu hi nga mi txhumayela athu, mwendo Moya wo hambana ni wu mi nga wu amukela, mwendo Evhangeli yo hambana ni yi mi nga yi amukela, anu ma mu amukela ngu nzila yo xamalisa. 5Aniko ni pimisa ti to kha va ni pali ngu txilo ni txa txidotho vapostolivo vawe va hombe. 6Hambi ni sa txhariha ngu mapswi, kambe wuzivi ni nawo ka sotshe simaha ni ka totshe tinzila ti hi nga mi kombisa tona. 7Ina nji hoxo ni nga txi maha, akuwa ni nga mi txhumayela Evhangeli ya Txizimu mahala, ni txi ti veka hahatshi nipune, kufela ku mi txi kuliswa anu, kani? 8Ni luzile sa mamwane mabanza ma nga ni holela kasi kuthumela anu. 9Mbimo yi ni nga vilela kuvhunwa ni di hagari kwanu, kha na nemeta mthu, nguko vanathu va Makhedhoniya va ni vhuni ka si ni nga ti si pwata. Ka sotshe kha ni zivi ku nga mi nemeta, ni konkuwa ni ngadi ni txi na mahisa toneto. 10Ngaku ditshuri da Kristu di ku kwangu, na xambanya ti to ku walo wu a no ni honyola nduma yangu matikoni ka Akaya. 11Ngu txani? Ngukuva ni si mi randi kani? Txizimu txa ti ziva ti to na mi randa! 12Ati ni ti mahako ni na zumba ni txi ti maha, kasi kuthindekisa vale va lavako ku ti guleta ngu nduma yo fana ni yi athu hi ku nayo. 13Vathu vo ngeto mbapostoli va makuhu, nzithumi so kanganyisa. Va ambala madhowo o zama ku ti maha vapostoli va Kristu. 14Kha ti xamalisi! Nguko, hambi sathane wa txitxa e teka m'bala wa ngelozi ya liwoningo. 15Ngu toneto, kha ti xamalisi ngako sithumi sakwe si txi ti hindula si txi nga sithumi sa kululama. Magwito awe ma na dingana ni mithumo yawe. 16Na engeta ni khani: Ni wammweyo a nga alakanye ti to ni diphuphulu. Hambi keto, ngako mi txi alakanya ti to ni diphuphulu ni amukeleni, kasiku nani ni txi ti dhumisa kakudotho. 17Ati ni lavako kuwomba kha ni ti wombi madingano ni kuwomba ka Mkoma, aniko nda wuphuphulu dwe, ngu kuthemba kwangu ti to ni ni fanelo ya ku ti dhumisa. 18Ngaku vavangi va ti dhumisako ngu ka wuthu, nanani ni na ti dhumisa. 19Nguko ma honisela ngutu ngu maphuphulu, anu mi ku vo txhariha. 20Ma honisela kasiku mthu a txi mi maha tikhumbi, a txi mi dyelela, a txi mi handa, a txi mi dhelela, a txi mi haphata. 21Ni womba tiya ngu tingana, nga hi ti ko va ni dikhodho. Atile vamwane va tsanako ku ti womba, ni womba ngu wuphuphulu, nanani na tsana ku ti womba. 22Mbahebheru kani? Nanani ni ene. Vona mbaIsrayeli kani? Nanani ni ene. Mba lixaka la Abrahamu kani? Nanani ni wa lona. 23Nzithumi sa Kristu kani? Ni wombisa wuphuphulu, ni txi khani: Ani na va pala ngutu. Na va pala ngu mithumo, ni seketwe sikhati sa singi mikorani kupinda vona; ni kwapetwe ngutu ngu txisephu kupinda vona, sikhati sa singi ni manekile ni di ha phangoni ka kufa. 24Ni pekilwe mtxhanu wa kona ngu Majudha. Se txikhati ni txikhati ni nga pekwa, va ni ningile makumi mararu a sisephu ni mtxhanu ni mune. 25Sikhati siraru ni nga kwapelwa ngu timhika, txikhati tximwetxo ni nga baliselwa ngu marigwi; kuraru ni nga theketwa ngu ngalava, ni fungate wusiku ni mtshikari ni di hagari ka linene. 26Ni mahile mapfhumba o tala. Ni manwi ngu tiphango ta tingi ta minambo, ni tiphango ta sigevenga, tiphango ta ku mahwa ngu va ka kwathu, ni tiphango ta kuta ngu ka vamatiko, tiphango ta didhoropani, tiphango ta txiwulani, tiphango ta lineneni, tiphango ta kuvangwa ngu vanathu va makuhu. 27Simwane kambe; mikaralo ni mithumo yo nemela, kupilela masiku a mangi, nzala ni ditora, kuzumba ni si dyi txilo masiku a mangi, pheho ni wusakato. 28Hahanze ka timwane ti ni ti wombako, na karateka ditshiku ni ditshiku ngu kota ya kukhatalela otshe Mabanza. 29I mani a ku ni dikhodho, na ani ni singa nado kani? I mani a khuvekiswako, na ani ni si pfi kupandiseka kani? 30Ngako ti txi laveka ku ni txi ti dhumisa, ni na ti dhumisa ngu dikhodho dangu. 31Txizimu ni Tate wa Mkoma Jesu Kristu, txi dhumisekako kala kupinduka, txa ti ziva ti to kha ni wombi makuhu: 32Aniya Dhamasku, awule i nga ti nduna ya mfumeli Aretasi, a to veka vawoneleli ha pangoni ka didhoropa, da Dhamasku, kasiku ve ni ├▒ola. 33Aniko ni to khonelwa mu ka txirundu, ve ni txiritela ngu dijanela da diguma, se ni txi hulukisa toneto ka manza akwe.


Copyright
Learn More

will be added

X\