2 VAKORINTO 10

1Ani, Paulo ngu wutumbu wangu, na mi khongotela ngu kudikha, ni wunene wa Kristu, ani ni ti vekako hahatshi masoni kwanu, kambe ni mahako wurena ni di kule ni nanu. 2Na mi kombela ti to mi si ni kurumeti kuta maha wurena ngako ni di bwakile kheyo kwanu kufana ni ti mi pimisako kumahisa txona ka vamwane va va wombako ti to hi tsimbila ngu kulondetela sa mmidi. 3Hakunene hi hanya ha mafuni, kambe yimbi yi hi lwako yona, hi nga ya kulwela sa ha mafuni. 4Ngukusa, matxhari awa hi lwako ngu ona hi nga a kuthumiswa ngu vathu, aniko mtamo wa ona wu ta ngu ka Txizimu. Athu ha hasamula makungo a mipalavanya; 5ni wotshe mtamo wa ku ti kulisa wu wu lwako ni kuziva ka Txizimu. Ha khozisa mialakanyo yotshe yi txi maha ya kuengisa Kristu. 6Hi ti emisete kutsayisa txieyiso txihi ni txihi ngako ku di hetisekile kuengisa kwanu. 7Wonani ti ti ku ha kubasani masoni kwanu: Ngako mthu a txi ti themba ti to a lumba Kristu a na ti zive ngu kumweko ti to nanathu hi lumba Kristu. 8Hambi idiku no ti dhumisa ka kudotho ngu kota ya mtamo wu ni nga ningwa ngu Mkoma, kasiku ni txi mi aka, i singa ku mi hasamula, na mi si wiswi tingana. 9Kha ni lavi ku mi txi alakanya ku nga no mi dhukisela ngu mapapilo angu. 10Nguko va khona, mapapilo akwe ma nemela, ma ni mtamo, aniko a di ho ene ngu wutumbu hagari kwathu, kha nga ni mtamo, ni mapswi akwe kha ma vhuni txilo. 11Awu a wombisakoto, a na ti zive ti to ku walo kuhambana hagari ka ti hi bhalako mapapiloni kwathu hi di kule, ni ti hi no ta ti maha ngako hi txi na ta kheyo kwanu. 12Kha hi tsani ku ti dinganisa mwendo ku ti fananisa ni vava va ti dhumisako vapune. Vona, ngu ku ti dinganisa vapune ni ku ti fananisa vapune, vo ti maha va ku ambi ziva. 13I di athu, kha hi ti dhumisi ngu kupinda mpimo, aniko hi na ti dhumisa ngu mpimo wu hi nga kombwa wona ngu Txizimu, awu wu nga hi hokisa kwanu. 14Kha ha pindisa mpimo wu hi nga vekelwa wona ngako hi di mi hokete, nguko kha ditshuri, ngathu vo khata ku mi nehele Evhangeli ya Kristu. 15Kha hi ti dhumisi ko pinda mpimo ka mthumo wa vamwane vathu, aniko ha themba ti to kukholwa kwanu ku di andile, athu hi na kuliswa hagari kwanu, kasiku mpimo wathu wu txi engetelwa, 16Kasiku hi txhumayela Evhangeli ni ka maphambo awa ma ku masoni ka ditiko danu, hi si wuleli tithembweni ka vamwane kasiku hi si ti dhumisi ngu mithumo ya vamwane. 17Awu a ti dhumisako a na ti dhumise ditinani ka Mkoma. 18Ngukusa, awu a ti dhumisako kha amukelwi, hahanze ka wu a dhumiswako ngu Mkoma.


Copyright
Learn More

will be added

X\