1 TIMOTI 5

1U nga kawuke ngu mtamo awu i ku wahombe kwako; aniko m'khongotele nga tate wako; vafana va kawuke nga vananda vako; 2vavasikati va hombe va khongotele nga vamame vako, mahorana ma angule nga tindiyako ngu kotshe kubasa ka mbilu. 3Vekela txithavo tinoni, atile i ku tinoni kha ditshuri. 4Ngukusa, ngako msikati wa noni a di ni vanana mwendo vatukulu, ti lumba vona kuthanga ve komba txithavo ka vaveleki vawe ni ku va tshumetela asi va nga si amukela kwawe. Atiya ngu tona ti tsakisako masoni ka Txizimu. 5Se ka wule i ku noni kha ditshuri, awu a nga sala ekhalela, eyo a vekile txithembo txakwe ka Txizimu, a zumba a txi khongela ni kukombela wusiku ni mtshikari. 6Kasi awule a lavako ku ti mahela kuranda, eyo hambi a txi hanya, a fite. 7Atiya ngu tona u fanelako ku va laya ka tona, kasiku ve zumba va singa ni txisolo. 8Awu a si khataleliko maxaka akwe, ngutungutu ava i ku va mwaya wakwe, eyo a kanyisile likholo, a bihile ngutu kupinda dihedheni. 9Wamsikati wa noni a na bhalwe dibhukuni ka tinoni tsena ngako a di ni tanga yi yi ku singa hahatshi ka mtxhanu wa makumi ni dimwedo a malembe, na i di wu a nga ti tekilwe ngu mwamna mmweyo. 10Ta laveka ti to e ziwa ngu mithumo yakwe ya yinene; kufana ni kukulisa vanana ngu nzila ya yinene, kuamukela vapfhumba, ku kuwula mikondo ya vasawuleki, kuvhuna ava va xanisekako, ni ku ti ningetela ka yotshe mithumo ya yinene. 11Se vavasikati va va nga felwa i di ngadi vaphya, evo zumbela kule navo.Nguko minavelo yawe, ngako yi txi va hambanisa ni Kristu, va na lava kutshumela ve tekwa; 12se ve mana mnandu ngukuva ve wila ku ti ñola kwawe ko khata. 13Hahanze keto, vavasikati va va nga felwa i di ngadi vaphya, ngako va si thumi txilo, va gonda kurenzelekela ni miti, i singa ngu kota ya wukara tsena, aniko kambe va ti ningetela mu ka siwombawomba sa kulenga vamwane, ve ti maha valanduli va timhaka ta wutomi wa vane, ve wombawomba ngu ti ti si faneliko kuwombwa. 14Ngu toneto ni navela ti to tinoni ti ku ngadi tiphya ti tekwa, ti veleka vanana, ti wonda mwaya, ti si tuleli mlala nzila yo womba kubiha ngu wukhongeli. 15Nguko ti ho timwane tinoni, ti nga ti hambanisa ni mlayo ti txi londeta sathane. 16Ngako wamsikati wa dikholwa a di ni tinoni mtini kwakwe a na ti vhune; dibanza di nga nemetwe ngu txona, kasiku di si kota kuvhuna ava hakunene i ku tinoni ta ditshuri. 17Madhota awa ma tsimbitisako tatinene mthumo wa wuthangeli, ma fanetwe ngu kutshungulwa kambidi, ngutungutu aawa ma thumelako kutxhumayela dipswi ni kugondisa; 18Kunene Mibhalo ya womba yi txi: “U nga sunge txisofu txa homu yi yi hulako”, ni tiya kambe ta ku: “Txithumi txi fanetwe ngu muholo wa txona.” 19U nga amukele mhaka ya kumangalela mthangeli, hahanze ka wufakazi wa vathu vambidi mwendo vararu. 20Kawuka avale va wonhako masoni ka votshe kasiku ve telwa ngu kuthava. 21Na ku laya masoni ka Txizimu ni ka Kristu Jesu, kumweko ni ka tingelozi to sawuleka, ti to u veketa sileleto siya, u nga lamule ngu kuwona khohe ya mthu, u nga mahe txilo ngu kulondisela wuxaka. 22U nga tutumele kusanzeka manza mthu kasiku u si rwali siwonho sa mmwane. Awe upune ti ñole, u txi zumba u di basile mbilu. 23U nga ye masoni ngu kuzumba u txi sela mati basi, selanyana vhinya ya yidotho, ngu mhaka ya mndani kwako ni mhaka ya kukhala ngu kulwalalwala. 24Va ho vathu vava siwonho sawe si wonekako ha kubasani, va si nzi kulamulwa, kasi sa vamwane si woneka msana keto. 25Kufana ni toneto, mithumo ya yinene ya ti wonekisa; hambi yile hi si yi woniko kha yi si koti kuzumba kusisalani.

will be added

X\