1 TIMOTI 4

1Aniko Moya wa womba ngu kutsanisa ti to ka masiku awa ma tako vamwane va na hambana ni likholo, ve londeta mimoya yo kanganyisa ni tigondo ta vasathane. 2Ngu mhaka ya kukanganyiswa ngu vamakuhu, avava livhalo lawe li nga vekwa txivango ngu simbi yo hiswa: 3Vona va na tsimbisa kutekana; va na tsimbisa kudya sakudya so kari na kasi Txizimu ngu txona txi nga si vanga kufela ku si txi amukelwa ngu kubonga ngu va va kholwako ni kuziva ditshuri. 4Nguko sotshe si Txizimu txi nga si vanga nza sinene; ku walo txi txi fanelako kunyenywa, ngako hi txi txi amukela ngu kubonga. 5Ngu konaho ka mkombelo ni dipswi da Txizimu, sotshe si sawulekisilwe. 6Ngako u txi txhamusela timhaka tiya ka vanathu, u na va u di mdhiyakoni wa mnene wa Jesu Kristu, awu a dyiswako ngu mapswi a likholo ni gondo ya yinene, ayi u yi londetelako ngu kale. 7Kambe nyenya mabhulo o hambana ni likholo i ku sihunga tiso sa sikosana. Ti tolovete wukhongeli. 8Nguko ku ti toloveta ka mithumo ya mmidi ku vhuna ka kudotho, kasi ku ti toloveta ka mithumo ya wukhongeli ku vhuna ka totshe, nguko kuna ni txithembiso txa wutomi wa konkuwa ni wa mbimo yi yi tako. 9Dipswi diya di tsani, futsi di ni fanelo ya kuamukeleka ka votshe. 10Nguko txigelo txa kuthuma kwathu ni kulwa kwathu ngu ti to hi vekile kuthemba kwathu ka Txizimu txi txi hanyako, atxi i ku Muhanyisi wa votshe vathu, ngutungutu avale va ku ni likholo. 11Atiya ngu tona u fanelako ku leletela ni kugondisa. 12Ku nga ve ni mthu wo dhelela tanga ya wuzambi wako, aniko, kuhambana nito, ku laveka u va txikombiso masoni ka makholwa, amu ka kutxhumayela dipswi, amu ka mahanyelo, amu ka lirando, amu ka likholo, amu ka kubasa mbilu. 13Na u txi rinzela kubwaka kwangu, ti ningetele amu ka kugonda dibhuku, amu ka kulaya, amu ka kugondisa. 14U nga sakane ngu txiningo txi u ku natxo, atxi u nga amukeliswa ditshiku diya vahombe va dibanza va nga womba mapswi a ku ku phaxa, ve ku sanzeka manza. 15Atiya ngu tona u fanelako ku ti veketa hakhana. Atiya ngu tona u fanelako kutsanisela ka tona. U txi hanyisa tiya, kukula kwako ka mithumo ya yinene ku na ti komba ka votshe. 16Ti wonele upune, u txi xola ni gondo yi u gondisako. Tsana ka sona, ngukusa ngako u txi maha toneto, u na ti hanyisa awe ni va va ku engisako.

will be added

X\