1 TIMOTI 3

1Di thembekile dipswi diya di ku: Awu a navelako kuva mthangeli wa dibanza, a navela mthumo wa wunene. 2Ngu toneto, ku laveka ti to mthangeli e va i di mthu wu a ku singa ni txisolo, i di mthu wu a ku ni msikati mmweyo, i di wa kutiñola, wa mapimo, a di ni nduma ya yinene, wa kuziva kuamukela vapfhumba, wa ku si kota kugondisa; 3i singa disela mwendo mthu wa mazunga, aniko a na ve i di wo dikha, a singa ni wukhuxu ni timbiti. 4Ku laveka a txi ziva kuxayisa tatinene m'ti wakwe apune, a txi ziva kugondisa vanana vakwe kuengisa ngu fanelo yi yi lavekako. 5Nguko, kungako mthu a si zivi kuxayisa mwaya wakwe, a na si kotisa ku txani kuxayisa Dibanza da Txizimu kani? 6Ku laveka i singa wu i ku ngadi kwakwe kuhunduluka, kasiku a si ti kulisi, se e wela mu kuabaniswani ka Sathane. 7Hahanze keto, ta laveka ti to i di mthu wu vamwane va hahanze va m'mahelako wufakazi wa wunene, kasiku a si soleki ni kubzwetwa ngu milawu ya Sathane. 8Vadhiyakoni nivona, ku laveka i di vathu vo xonipheka, i singa va makuhu, va si ti ningeteliko wusukeni, i singa vathumeli va mabhindu a tingana, 9ve veketa msisalo wa likholo ngu livhalo lo basa. 10Nivona ku laveka i di vathu va va nga thanga ngu kudukwa, se ngu msana, ngako va txi maneka va singa ni txisolo, va na thume mthumo wawe. 11Vavasikati nivona, ku laveka i di vo ti ñola, vo thembeka ka totshe tinzila. 12Vadhiyakoni ku laveka i di va va nga teka msikati mmweyo dwe, ve xayisa tatinene vanana vawe, ni m'ti wawe wupune. 13Nguko avale va thumako tatinene mthumo wa wudhiyakoni va na mana txhatxhazelo ya txikhunja txa kuxonipheka ni kutsaniswa ka hombe ka likholo ka Jesu Kristu. 14Na themba ti to kunukunukuwa ni na va kumweko ni nawe konkheyo, aniko ni ku bhalela timhaka tiya, 15kasiku ngako ni txi thuka ni txi swela, u na ziva ti u fanelako kuhanyisa tona nyumbani ka Txizimu, i ku Dibanza da Txizimu txi txi hanyako: Ngu dona i ku phande ya hombe ni txihiketo txa ditshuri. 16Na tsanisa ti to msisalo wa wukhongeli wathu mbwa hombe:"A wonekisilwe nga mthu, a wombilwe wo lulama moyani, a wonwi ngu tingelozi, a nuwetwe hagari ka matiko, a tumetwe ha mafuni, a kwetisilwe txitimwi kudhumiswani."


Copyright
Learn More

will be added

X\