1 TIMOTI 2

1Txo khata ka sotshelele, ni leletela ti to ku na mahwe mikombelo, kukhozela, kukhongela ni kubonga ngu votshe vathu: 2ngu vakoma ni votshe vale va fumako, ti to hi txi mana kuhanya ngu kurula ni kuzumbiseka ngu wunene ni wululamo. 3Atiya ndinene, futsi kambe ta tsakisa masoni ka Txizimu, Muhanyisi wathu, 4a navelako ti to votshe vathu ve mana kuhanyiswa ni kuziva ditshuri. 5Nguko Txizimu njimwetxo basi txi ku ho, se Mthaveleli nene i mmweyo a ku ho hagari ka Txizimu ni ka vathu, i ku Kristu Jesu mthu mnene, 6a nga ti ningela kasi kuterula votshe vathu. Awuwa ngu wona wufakazi wu wu nga vekwa ka masiku awa ma fanelako, 7i ku yona mhaka yiya ani ni nga mahwa mtxhumayeli ni mpostoli wa yona - ni womba ditshuri, kha ni hembi, - ani ni mgondisi wa vamatiko amu ka likholo ni mu ka ditshuri. 8Ngu toneto, ni lava ti to votshe vathu ve khongela ka otshe makhalo, ve guleta manza o sawuleka, va singa ni txiviti mwendo mazunga, 9kasi i di vavasikati va na ambale siambalo si si fanelako, va na bombe ngu txithavo ni ku ti ñola, va nga luke timbobo, hambi kuambala siphatiphati sa nzalama ni wusekenye ni tinguwo to dhula ngutu; 10aniko kuleka eto, va na ti bombise ngu mithumo ya yinene, nga vavasikati va i ku makholwa. 11Kugondiswani, wamsikati a na zumbe a di malate, e ti veka hahatshi tatinene. 12Kha ni tumeleli wamsikati kugondisa mwendo kuruma wamwamna; a fanete kuzumba a di malate. 13Ngukusa ku thangile Adhamu e wumbwa, ku txi londeta Evha. 14Kambe hi nga Adhamu a nga kanganyiswa, aniko i Evha a nga kanganyiswa e wa txiwonhoni. 15Hambi keto, wamsikati a na hanyiswa nguko a velekako vanana, ngako a txi timisela amu ka likholo ni mu ka lirando ni mu ka ku ti sawulekisa ni ku ti ñola.


Copyright
Learn More

will be added

X\