1 VATESALONIKA 4

1Ngu kugwitisa, vanathu, athu hi mi kombela ni ku mi laya ngu ka Mkoma Jesu. Anu mi gondile kwathu ati mi fanelako kuhanyisa tona, kasiku mi txi tsakisa Txizimu. Se, ngu toneto mi fanelako ku hanyisa tona, simamisani mi anda ka toneto. 2Nguko ma yi ziva milayo yi hi nga mi ninga ngu ditina da Mkoma Jesu. 3Kuranda ka Txizimu ngu kuwa: Ti to mi hanya kusawulekani, mi txi tshuralela txiwonho txa wugango. 4Mthu ni mthu kwanu a na zive kuxayisa mmidi wakwe ngu wusawuleki ni txithavo. 5I singa kulondetela minavelo yo hisa, nga vamatiko va va si ziviko Txizimu. 6Ka yiya mhaka, mthu a nga thuke a txi dyelela mkwawe, nguko Mkoma wa ziva kupharela ka sotshe siya, kota nga ti hi nga mi gela, hi txi tshumela hi mi xambanyela. 7Ngukusa, Txizimu kha txa hi dhanela kuta hanya nzambwani, aniko txi hi dhanete kuta hanya kusawulekani. 8Ngu toneto, awu a nyenyako gondo yiya, kha nyenyi mthu, aniko a nyenya Txizimu, txona txi kha ditshuri, txi mi ningako Moya wa txona wo Sawuleka. 9Ngu mhaka ya kurandana ni vananu, kha mi faneli kubhalelwa ngukusa, anu mipune mi gondisilwe kurandana ngu Txizimu. 10Kha ditshuri, ngu toneto mi hanyisako tona ni votshe vanathu va va ku ka dotshe ditiko da Makhedhoniya. Aniko, vanathu, ha mi laya ti to mi txi ya masoni ngutu ka toneto. 11Khutalani ngu kuhanya ngu kuthutha, mi txi ti karata ngu kuthuma ti ti mi lumbako, mi txi thuma ngu manza anu, nga ti hi nga mi layisa tona. 12Mahanyelo anu ma na va i di a lisima masoni ka vathu va hahanze, kasi mi na va mi si vileli kuvhunwa ngu mthu. 13Kha hi ti lavi ku mi sisela timhaka ta vale va nga otela wukohe wa lifo, ti to mi si zumbi mi txi xaniseka, nga vale va ku singa ni txithembo. 14Ngukusa, akuwa mi kholwako ti to Jesu a fite e tshumela a txi wuka, ngu toneto hi fanela kukholwa ti to ni vale va nga otela ngu maotelelo a Jesu, Txizimu txi na va teka kumweko nayo Jesu. 15Ha mi gela ngu ka Mkoma, ti taku: Athu hi no ta maneka hi txi hanya, athu hi no salela kuwuya ka Mkoma, kha hi na mbi va thangela ava va nga ti fela; 16ngukusa ene Mkoma ngu wutumbu wakwe, ngu kudhana ka ngelozi ya hombe, ngu kuvetwa ka mpundu wa Txizimu, a na txhika ngu nzumani, se avale va nga fela ka Kristu, va na thanga vona ve wuka. 17Konako, athu hi no ta maneka hi txi hanya, athu hi nga sala hi na ta gulwa kumweko navo hi txi yiswa marefuni, hi txi ya hingeta Mkoma txitimwi. Se ngu toneto, hi na ya zumba nayo yotshe mbimo. 18Se, zumbani mi txi thavelelana ngu mapswi onayo.

will be added

X\