1 VATESALONIKA 3

1Ngu toneto, ngu ku ambi ngadi hi si kota kuhonisela, hi woni i di tatinene kusala hokha Atena. 2Hi rumela Timoti mwanathu ni txithumi txa Txizimu, txa kuthumela Evhangeli ya Kristu, kasiku a txi ta mi tsanisa ni ku mi ninga mtamo amu ka likholo lanu. 3Kasiku, ni wammweyo a si vi ni kukarateka ngu mhaka ya sixanisoso, nguko ma ti ziva ti to ngu yoneyo nzila yathu. 4Kha ditshuri, mbimo yi hi nga ti ni nanu, hi txi mi gela ti to hi fanete kuxaniswa, se toneto ti mahekile, nga ti mi ti zivisako tona. 5Ngu toneto, ani ngu ku ambi si kota kuhonisela, ni m'rumete kasiku ene e ta ziva ti mi hanyisako tona mu ka likholo, kasi kuwona ti to mwendo kha ma dukwa ngu mduki, ni ti to mwendo hi nga va hi di luzile mbimo yathu. 6Se konkuwa, Timoti i ngadi kwakwe kubwaka a txi ta ngu kheyo kwanu, a txi neha mahungu a manene a likholo lanu ni lirando lanu. Ene a hi zivisile ti to mi ngadi mi txi hi alakanya yotshe mbimo ngu moya wa wunene, na mi txi navela ku hi wona kufana ni nathu hi xuvako ku mi wona. 7Ngu toneto, vanathu, hi mani kuthavelelwa ngu nganu, ngu konaho ka likholo lanu, hagari ka yotshe mixaniso yathu ni siduko sathu. 8Konkuwa ha hanya ngukusa mi ngadi tsani ka Mkoma . 9Ngu bonga muni hi no ku komba ka Txizimu ngu lotshe litsako li hi li pfako ngu nganu masoni ka Txizimu txathu? 10Ha khongela, wusiku ni mtshikari, ngu kusimamisa ti to Txizimu txi txi hi ninga kutshumela hi mi wona, kasi kueneta ati ti nga kelela ka likholo lanu. 11Ha kombela ti to Txizimu Tate wathu, ni Mkoma wathu Jesu Kristu, va txi hi tulela nzila yo ta kheyo kwanu. 12Mkoma a na kulise ni kuandisa lirando li mi randanako ngu lona anu, ni lirando la kuranda votshe vathu, nga ti athu hi mi randisako tona. 13Mkoma a na tsanise timbilu tanu amu ka wusawuleki wo mbina dikhwiti masoni ka Txizimu, Tate wathu, ngu mbimo ya kuta ka Mkoma wathu Jesu, kumweko ni votshe vasawuleki vakwe.

will be added

X\