1 VATESALONIKA 1

1Paulo, ni Silivhano, ni Timoti, ka Dibanza da Vatesalonika, ava va lumbako Txizimu Tate, ni Mkoma Jesu Kristu. Kateko ni kudikha si na ve ni nanu! 2Ha ninga kubonga yotshe mbimo ka Txizimu ngu kota yanu motshenu, na hi txi mi alakanya, mikombeloni kwathu. 3Ha khumbula mithumo yanu ya likholo, kukhutala kwanu ka lirando, ni kutimisela kwanu ka txithembo txi mi ku natxo ka Mkoma wathu Jesu Kristu, masoni ka Txizimu, Tate wathu. 4Ha ti ziva, vanathu, ti to anu mi dhundwako ngu Txizimu, mi sawutwe ngu txona. 5Nguko, Evhangeli yathu kha ya hoka kwanu ngu mapswi dwe, aniko yi fakazetwe ngu mtamo wa Moya wo Sawuleka, ni mahanyelo o kholwisa. Ma ti ziva ti hi nga hanyisa tona ni nanu ngu kota ya lirando kwanu. 6Se nananu mi ti mahile vaeteteli vathu ni va Mkoma, nguku mi nga amukela dipswi hagari ka kuxaniseka ka hombe, na mi txi tsaka ngu litsako la Moya wo Sawuleka; 7ahawa ka kuza mi va mi di txikombiso ka otshe makholwa a ditiko da Makhedhoniya ni da Akaya. 8Kha ditshuri, Dipswi da Txizimu, di di nga engiswa di txi khukhela kwanu, kha da engiswa tsena, ngu Vamakedhoniya ni va Akaya, aniko likholo lanu ka Txizimu li tshanganisile otshe makhalo; se ngu kota yeto, kha ku swi ku txi laveka ti to hi ngadi hi txi wombawomba ngu mhakeyo. 9Nguko, ngu vona vapune va xawutelako ati mi nga hi amukelisa tona, ni ti mi nga hindukisa tona, mi txi leka sithombe, mi txi namarela ka Txizimu, kufela ku mi txi thumela Txizimu txi txi hanyako, na i di txa ditshuri; 10mi txi verela Mwanana wa txona, wa kuta ngu nzumani, a nga wuka ngu ka vo fa, Jesu wu a nga hi hulukisa ha kuhenyelwani ka timbimo ti ti tako.

will be added

X\