1 PEDRO 5

1Ka madhota awa ma ku hagari kwanu, na ma kombela ani ni ku didhota kulowe, fakazi ya mixaniso ya Kristu, ni thembako kumana txiavelo txa kupfaliswa ku ku no ta humelela, ni khani: 2Dyisani mtxhambi wa Txizimu, awu mi nga vekelwa, mi txi wu xayisa, i singa ngu kukurumetwa, aniko, ti maheni ngu kuranda ka mbilu, i singa ngu moya wa nzambwa ya kulava dibhindu. Ti maheni ngu ku ti ningetela ka mbilu; 3mi si ti mahi ku nga vafumeli txitimwi ka vale mi nga vekelwa, aniko ti maheni vakombisi va nzila ya yinene ka mtxhambi wanu. 4Se mbimo yi a no ta humelela mdyisi wa hombe, mi na ta amukela m'bhoti wo phatima wa kupfaliswa, awu wu si wonhekiko. 5Nananu, vavaphya, ti vekeni hahatshi ka madhota. Ambalani moya wa ku ti veka hahatshi, mmwane masoni ka mmwane. Ngukusa, Txizimu txi nyenyana ni va va ku ti kulisa, kambe txi ninga makatekwa a txona ka vale va ku ti veka hahatshi. 6Ngu konaho, ti vekeni hahatshi ka diwoko da mtamo, da Txizimu, kasiku txona txi na ta mi guleta ka mbimo yi yi lavekako. 7Vekani masoni ka Txizimu kotshe kukarateka kwanu, nguko Txizimu ngu txona txi mi khatalelako. 8Zumbani ngu ku ti pimela (kutsana), mi txi ti wonela. Sathane, mlala wanu, wa mi horolokela nga ngonyamo yi yi bhongako, yi txi lava wo m'kakatxula. Lambani masoni kwakwe mi di tsani mu ka likholo, 9mi txi ziva ti to vakwanu, va va nga hangalaka ni ditiko, va xupheka ngu sixaniso so nga soneso. 10Txizimu txa makatekwa otshe, txi nga mi dhanela kupfaliswa ka txona ko mbi guma ngu ka Jesu Kristu, msana ka kuxaniseka ngu mbimo ya yidotho, txi na mi wusa ni ku mi aka, ni ku mi tsanisa, mi si xulwi ngu txilo. 11Ka txona kupfaliswa ni mtamo kala kupinduka! Amen. 12Ni mi bhalela ngu kukomisa, ngu txanza txa Silivhano, awu, ngu mawonelo angu, i ku, mwanathu wo thembeka, kasiku ni txi mi laya, ni txi tsanisa masoni kwanu ti to ayiya ngu yona kateko ya ditshuri ya Txizimu, ayi mi nga tsana ka yona. 13Dibanza di di ku Bhabhilona, da vasawuleki vo fana ni nanu, da mi dingula, kumweko ni mwanana wangu Marku. 14Losanani ngu kupswopswana ka lirando la wukholwa. Kudikha ku na ve ni nanu motshenu, mi lumbako Kristu!


Copyright
Learn More

will be added

X\