1 PEDRO 4

1Ngu toneto, kufana ni Kristu a nga pfa kupanda nyamani kwakwe, nananu xomani matxhari a kuzumba mi di ni mialakanyo yo nga toneto. Awule a nga xaniseka nyamani, a hambani ni txiwonho; 2kasiku, ka masiku awa a nga salelwa ngu ona a kuhanya nyamani e si kota kuhanya a si londeteli minavelo ya nyama, aniko a txi londetela kuranda ka Txizimu. 3Se ti dingani ati mi nga ti hanyisa tona kale to tsakelwa ngu vamatiko, ta kuhanya ngu wugelegele, ni kunavela ko biha, ni wudevi, ni makolo, ni masuke, ni kukhozela sa mafu. 4Vona va xamala aku mi si ngadi mi txi tsimbila navo, amu ka wubhemba, se ngu kota yeto, va mi ruka. 5Kambe vona va na ya xamula ka wule a nga ti emisela kuya lamula vo hanya ni vo fa. 6Nguko, ngu mhaka ya toneto, Evhangeli yi txhumayetwe ni ka vafi, kasiku va di lamutwe ngu ka nyama kufana ni vamwane vathu, va na mana kuhanya ngu Moya, kufana ni Txizimu. 7Se magwito a sotshe simaha ma hafuhi. Ngu toneto, zumbani mi di ni mapimo a manene, mi txi ti wonela mi txi khongela. 8Ngutungutu khutalelani kurandana nguko lirando la fenengeta mtalo wa siwonho. 9Zivani kuamukelana mbimo yi mi endelanako, na mi si ngungurukeli. 10Kota vaxayisi vavanene va tikateko ta Txizimu, mmwane ni mmwane kwanu a na vhune vakwawe ngu txiningo txi a nga hiwa. 11Awu a wombawombako, a na wombawombe ngu kulondisa dipswi da Txizimu. Awu a thumako a na thume madingano ni txiavelo txi a nga hiwa ngu Txizimu, kasiku Txizimu txi pfaliswa ka sotshe simaha ngu Jesu Kristu, iku ene a lumbwako ngu kupfaliswa, ni mtamo, ngu malembe ni malembe Amen. 12Vo randeka ngutu, mi nga dhukisweni ngu mndilo wa kudukwa, wu wu nga dhivelwa hagari kwanu, nga ku to humelela txo mbi txi ziva. 13Aniko, tsakani ngu kumana txiavelo txa mixaniso ya Kristu, kasiku nananu, mi txi ta si kota kutsaka ni kugiya ka ditshiku di ku no ta kombiswa kupfaliswa ka Kristu. 14Ngako mi txi xaniswa ngu ditina da Kristu, mi katekile, nguko moya wa kupfaliswa, Moya wa Txizimu, wu zumbile hagari kwanu. 15Ni wammweyo kwanu a nga thuke a txi xaniswa ngukuva i di txidayi, dikhokhokho, mlumbeti, mwendo ngu kunavela silo sa vane. 16Aniko, ngako a txi xaniswa ngu mhaka ya kuva i di dikholwa, a nga telwe ngu tingana, aniko a na pfalise Txizimu ngu mhaka ya ditina donedo. 17Nguko yi hokile mbimo ya kukhata ngu nyumba ya Txizimu yi txi lamulwa. Se ngako ku txi khatwa ngu ngathu njiavelo muni va no ta txi mana ava va si engisiko Evhangeli ya Txizimu, kani? 18Ngaku mlulami ti m'karatelako kupona, nji txani txi no ta humelela ka wu i ku m'bihi, ni wu i ku muwonhi kani? 19Ngu toneto, avale va xanisekako ngu kulava kulondeta kuranda ka Txizimu, va na ningele mihefemulo yawe ka Mvangi wo thembeka, ngu kumaha mithumo ya yinene.

will be added

X\