1 PEDRO 3

1Nananu vavasikati vo tekwa, ti vekeni hahatshi masoni ka vamna vanu, kasiku, ngaku vamwane vavamna va si engisi dipswi, ve mana kudhanwa ngu mtamo wa mahanyelo a vasikati vawe, hambi i singa ngu dona dipswi, 2ngu mhaka ya kuwona wutomi wanu wa ku ti ├▒ola ni wa txithavo. 3Kubomba kwanu ku nga ve ka hahanze dwe: kulukwa timbobo, ku ti tshurisela ngu siketiketi sa nzalama, ni siambalo so hanelwa ngu sona. 4Aniko, ku ti bombisa kwanu ku na ve ka wuthu wa mndani ka moya, ka wuthu wo sisaleka wa mbilu, i ku kubasa ko mbi guma ka moya wo thutha ni wa kudikha, wu ku ni lisima masoni ka Txizimu. 5Ngu tona tiya va nga ti bombisa tona vavasikati va vo sawuleka va kale, va va nga ti ni likholo ka Txizimu. Vona va titi engisa vamna vawe, 6kufana ni Sara a nga ti engisa Abrahamu a txi m'dhana ku i mkoma wakwe. Se konaho, mi vanana vakwe, ngako mi txi maha wunene, mi si thavi kudhukiselwa ngu txilo. 7Kufana ni toneto, nananu vavamna, hanyani ngu kuengisana ni vasikati vanu, mi txi zumba navo ngu txithavo, nga siya sa ku ambi tsana, mi txi va xonipha kambe, ngukuva i di vadyi kulonu va thomba ya kateko yi yi ningako wutomi, kasiku mikombelo yanu yi si tsivelwi ngu txilo. 8Ngu kugwitisa, engisanani motshenu ngu lirando la txikoma ni txinanda, ni moya wa wumbilu, ni ku ti veka hahatshi. 9Mi nga tshumeteleni wubihi ngu wubihi, hambi txiruko ngu txiruko. Aniko, wombani wunene ngukusa ngu toneto mi nga dhanelwa tona, kasiku mi txi maha vadyi va thomba ya kateko. 10Nguko, awule a randako wutomi ni kuwona masiku a kukateka, a na vekele matomu lidimi lakwe, a txi li hambukisa ka to biha, ni txisofu txakwe a txi txi hambukisa ka mapswi o kanganyisa. 11A na vayilele wubihi, a txi maha wunene. A na lave kuthutha, a txi ku simamela. 12Nguko, maso a Txizimu ma woneleta va vo lulama, ni tinzeve ta txona ti engisa mikombelo yawe. Aniko, khohe ya Mkoma yi thuvikela ava va mahako to biha. 13I mani a no mi mahela wubihi ngako anu mi txi khutalela kumaha ti i ku ta tinene, kani? 14Ngako mi txi xaniswa ngu mhaka ya kululama, mi katekile! Mi nga thaveni kudhukisela kwawe, futsi mi nga karatekeni. 15Dhumisani Mkoma Kristu, amu timbiluni kwanu, mi txi zumba kambe mi di longile nzila ya ku ti angulela, ngu kuthutha ni xithavo, ka wuhi ni wuhi a no lava kuziva mhaka ya likholo lanu. 16Mi fanete kumaha tiya ngu mbilu ya kululama, kasiku, hambi ka tile va wombako kubiha ngu nganu, ve thelwa tingana avale va wombako kubiha ngu dihanyo danu ka Kristu. 17Ti ni lisima ngutu kuxaniseka ngu kota ya kumaha ti i ku ta tinene, na eto i di kuranda ka Txizimu, kupinda kuxaniseka ngu kumaha tile i ku to biha. 18Kha ditshuri, Kristu nene a fite ka kumweko ngu kota ya siwonho sanu, ene i ku wo lulama, a txi fela vale vo mbi lulama, kasi ku mi yisa ka Txizimu. A fite ngu ka mmidi, aniko a hanyisilwe ngu ka moya. 19Wona moya wu a nga ya txumayela ngu wona mihefemulo ya vale va nga ti kusekelwani; 20avale kale ka masiku a Nowa, va nga mbi va ni kuengisisa, mbimo yi Txizimu, ngu kuhonisela ka txona txi nga rinzela kuakwa ka ngalava, ayi vathu vavadotho, va mtxhanu ni vararu basi, va nga ti hanyisa ngu yona txitimwi ka mati. 21Mati awa, i ti mfanekiso wa txibhabhatiso, atxi konkuwa se txi mi hanyisako, i singa ngu kukuwulwa ka nzambwa ya mmidi, aniko ngu kubasiswa ka Jesu Kristu, 22wu a nga kwela nzumani, e ya zumba txineneni ka Txizimu, ahawa a nga ningwa kufuma tingelozi, vakoma ni mitamo.

will be added

X\