1 PEDRO 2

1Ngu toneto, lekani wotshe wubihi, makuhu, wuxengeteli, livengo, ni lotshe lixaka la siruko. 2Nga vanana va titxetxere, navelani masi a Moya kasiku ona ma na si kota ku mi ninga kukula mi txi ya kuhanyiswani, 3ngako mi di danzile wunene wa Mkoma. 4Ngonani hafuhi ka Mkoma, i ku dirigwi do hanya, adi di nga nyenywa ngu vathu, aniko i ku da kusawulwa ni kudhundeka masoni ka Txizimu. 5Nananu, kufana ni marigwi o hanya, mi fanete ku akwa mi txi maha nyumba ya moya, ti to mi txi maha vaphaxeli vo basa, ava va humisako timhamba to tsakisa Txizimu ngu Jesu Kristu. 6Ngu kota yeto, amu ka Mibhalo, ti ho ti taku: "Wonani, na veka ka m'ti wa Siyoni dirigwi da lisima di di nga sawulwa, di do dhundeka; awule a kholwako ka dona, kha nambi wiswa tingana." 7Ngu toneto, mi katekile anu mi kholwako. Aniko, ka vale va si kholwiko; dirigwi di vaaki va nga di nyenya, di mahile dirigwi da hombe do tsanisa. 8Dirigwi diya di na va humba ni ku va wisa. Va na humbwa ngu dona, nguko kha va kholwa ka Evhangeli, i ku ti va nga sikeliswa tona. 9Ngu toneto, anu mi lihunzu lo sawuleka, vaphaxeli va wukoma, mfumo wo sawuleka, vathu va va lumbako Txizimu, kasiku mi na tsimbila mi txi rurutela mithumo ya kuxamalisa ya Txizimu, atxi txi nga mi humisa txidemani, txi txi mi wuyisa liwoningoni ka txona ko xamalisa, 10anu kale mi nga ti singa vathu, kambe komkuwa se mi vathu va Txizimu, anu kale mi nga ti si nzi kudivalelwa, se konkuwa mi mani kudivalelwa. 11Na mi kombela, vo randeka ngutu, nga vaendi ni valuveli ditikoni muwa, mi leka ku ti ningetela ka minavelo ya mmidi, ayi yi lwako ni moya yotshe mbimo. 12Wutomi wanu hagari ka va va si kholwiko wu na ve wa wunene ngutu, kasiku ngako va txi mi lumbeta kuva mi di vabihi, vona va na yi ziva mithumo yanu ya yinene, se va txi dhumisa Txizimu ka ditshiku da kuta ka txona. 13Ngu kota ya Mkoma, ti vekeni hahatshi ka milayo ya wukoma wa ha mafuni: Ka Mfumeli, awu i ku mkoma wa hombe, 14ni ka tinduna, ati i ku tona ti nga ningwa ngu ngene mtamo wo tsayisa vabihi ni kudhumisa avale va mahako ta tinene. 15Nguko, Txizimu txi lava kumalata wuphukuphuku ngu mithumo yanu ya yinene. 16Hanyani nga vathuseki; kambe, mi nga thumiseni wuthuseki wanu kasi kufenengeta wubihi, aniko hanyani nga sithumi sa Txizimu. 17Vekani txithavo ka votshe vathu, randani makholwa kulonu, thavani Txizimu, mi txi xonipha ni nene mfumeli. 18Anu sithumi, mi fanete ku ti veka hahatshi ka vanyamne vanu, mi txi va komba txixonipho txo hetiseka. I singa ka vale i ku vavanene dwe, kambe ni ka vale i ku vo karata. 19Nguko i kateko ngako mthu a txi timisela sixaniso ngu lirando la Txizimu, hambi a txi xaniswa a singa ni mnandu. Ngako mi txi timisela kutsayiswani kwanu ngu txihoxo txi mi nga txi maha, wudhumo muni wu ku ho koneho, kani? Ngako mi txi xaniswa mi txi timisela, ngu kota ya kumaha ta tinene, eto ta tsakisa Txizimu. 20I hakhelo muni mi fanelako ku yi mana kutimiselani kwanu, ngako mi txi tsayiswa ngu sihoxo si mi nga si maha, kani? Aniko, ngako mi txi mana sixaniso ngu kumaha wunene, kutimisela kwanu ka tsakisa Txizimu. 21Ngu toneto mi nga dhanelwa tona, nguko hambi Kristu nene, a tumete kuxaniswa ngu mhaka yanu, kasi ku mi siyela txikombiso, ti to mi na si kota kulondetela mkondo wakwe. 22Ene kha maha txiwonho, ni txisofu txakwe kha txa womba makuhu. 23Ene, mbimo yi va nga ti m'ruketela, kha ruketela nene. Mbimo yi va nga ti m'xanisa, kha va kwatela, aniko a to ti ningela ka wule a lamulako ngu kululama. 24Ene a nga rwala siwonho sathu ngu mmidi wakwe, ha txihambanoni, kasiku, ngako hi txi fa ka txiwonho, hi na si kota kuhanya ngu kululama. Anu mi hanyisilwe ngu silonda sakwe. 25Ngu ditshuri, mi titi fana ni tinvuta ta kuhangalaka, aniko akuwa mi tshumete mi wuya ka Mdyisi ni Muwoneleti wa mimoya yanu.

will be added

X\