1 JOHANE 4

1Vorandeka, mi nga kholweni ka yotshe mimoya, wonisisani mimoya kasi kuziva ti to mwendo nja Txizimu, nguko mbavangi vaprofeti va makuhu va nga hangalaka ni ditiko. 2Moya wa Txizimu mi na wu zivisa tiya: Wotshe moya wu wu fakazako ti to Jesu Kristu a tile ha mafuni ngu wutumbu wakwe, mbwa Txizimu. 3Se wotshe moya wu wu si fakazeliko Jesu, hi nga wa Txizimu; awuwa ngu wone moya wa Mkaneti wa Kristu. Mi ti engisile ti to wu na ta, se konkuwa wa ho ha mafuni. 4Vanavangu, anu mi va ka Txizimu, se mi xute vaprofeti va makuhu. Nguko Moya wu wu ku kwanu mbwa hombe kupinda wule wu ku ka vathu va ha mafuni. 5Vona mba ha mafuni, ngu toneto va wombawomba ngu ta ha mafuni, se mafu ma va engisa. 6Athu hi va ka Txizimu, awu a zivako Txizimu wa hi engisa. Awu i ku singa wa Txizimu kha hi engisi. Ngu toneto hi wu zivisako tona Moya wa ditshuri ni moya wa makuhu. 7Vorandeka ngutu, he randaneni, nguko lirando li ta ngu ka Txizimu, se votshe va vo randeka va velekilwe ngu Txizimu, se va txi ziva Txizimu. 8Awu a si randiko, kha txi zivi Txizimu, nguko Txizimu i Lirando. 9Lirando la Txizimu li ti wonekisisile tiya kwathu: Txizimu txi rumete Mwanana wa txona wa mmweyo ekha ha mafuni, kasiku athu hi txi hanya ngu ngene. 10Lirando la Txizimu ngu liya: Hi nga athu hi nga randa Txizimu, txona ngu txona txi nga hi randa, txi hi rumela Mwanana wa txona, kuta maha mhamba ya kudihela siwonho sathu. 11Vorandeka ngutu, ngaku Txizimu txi nga hi randisa tiya, nathu hi fanete kurandana. 12A walo wu a nga wona Txizimu ni ditshiku ni da dimwedo, aniko, ngako hi txi randana, Txizimu txi zumba ni nathu, se lirando la txona li hetisekile kwathu. 13Hi ti ziva ti to athu hi zumba ka Txizimu, ni ti to txona txi zumba kwathu, ngu kuwa txi nga hi ninga Moya wa txona. 14Se athu hi ti woni, kambe ha fakaza ti to Tate a rumete Mwanana wakwe kuta maha Muhanyisi wa mafu. 15Awu a fakazako ti to Jesu i Mwanana wa Txizimu, Txizimu txi zumba kwakwe, se nene a zumba ka Txizimu. 16Se athu hi li zivile ni ku li tumela lirando li Txizimu txi ku nalo ni nathu.Txizimu i lirando; se awu a zumbako lirandoni, a zumba ka Txizimu, se Txizimu txi zumba kwakwe. 17Ngako lirando li di hetisekile kwathu, hi na va ni kutsana ka ditshiku da kulamulwa, nguko atiya Kristu a ku ngu tona nathu hi zumbisile toneto ha mafuni. 18Ku walo kuthava amu ka lirando, nguko lirando la kuhetiseka li tovela kuthava. Kuthava ku tsimbilelana ni kutsayiswa; se awu a thavako kha nga ni lirando lo hetiseka. 19Athu hina ni lirando, nguko txi khatile Txizimu txi txi hi randa. 20Ngako mthu a txi khene: “Ani na randa Txizimu”, na a txi vengela mwanawe, mthuyo ana ni makuhu: nguko awu a si randiko mwanawe, awu a mu wonako, kha na ku si kota kuranda Txizimu txi a si txi woniko. 21Txirumo txi hi nga txi amukela kwakwe Jesu Kristu ngu txiya: Awu a randako Txizimu a na rande ni mwanawe.

will be added

X\