1 JOHANE 3

1Wonani lirando la kuxamalisa la Tata, a nga hi ninga mathomo a ku hi maha vanana va Txizimu! Hi vanana va txona ngu ditshuri. Ngu toneto, ditiko kha di hi zivi, nguko ni txona kha da txi ziva. 2Vorandeka, konkuwa hi vanana va Txizimu, kambe kha txi zivaneki atxi hi no va hi di txona. Ha ti ziva ti to mbimo yi a no ta Kristu, hi na ta fana nayo, nguko hi na ta mu wone ngu wutumbu wakwe. 3Wuhi ni wuhi a ku ni txithembo txiya ni nene, wa ti sawulekisa apune, nga ti nene Jesu i ku wo sawuleka. 4Wuhi ni wuhi a mahako txiwonho, a ndaka mlayo, nguko txiwonho i kundaka mlayo. 5Aniko anu ma ti ziva ti to ene a ti wonekisile kasi kuta thavisa siwonho; kambe kwakwe ku walo txiwonho. 6Votshe va va zumbako kwakwe kha va wonhi. Votshe va va wonhako kha va mu wona, kambe kha va mu ziva. 7Vanavangu, mthu a nga thuke e mi timeta. Awu a mahako to lulama a lulamile ku fana ni nene Jesu a nga lulama. 8Awule a mahako txiwonho mbwa Sathane nguko Sathane njiwonhi kukhukhela makhatoni. Mwanana wa Txizimu a ti wonekisile kasi kuta fuvisa mithumo ya Sathane. 9Votshe va va nga velekwa ngu Txizimu kha va mahi txiwonho, nguko mbewu ya Txizimu yi mite kwawe. Vona kha va na kuwonha, nguko va velekilwe ngu Txizimu. 10Txikombiso txa vanana va Txizimu ni txa vanana va Sathane ngu txiya: Votshe vale va si mahiko to lulama ni vale va si randiko vanawe kha va lumbi Txizimu. 11Txiziviso txi hi nga txi engisa kukhukhela makhatoni ngu txiya: Ti to hi randana. 12Hi nga faneni ni Kayini; awuwa, ngukuva i di m'bihi, a date mnanda wakwe. Se a m'dayete txani kani? Mithumo yakwe i ti yo biha, kasi mithumo ya mnanda wakwe i ti yo lulama. 13Mi nga xamaleni, vanathu, ngako ditiko di txi mi vengela. 14Athu ha ti ziva ti to hi humile kufani hi txi ya wutomini, nguko ha randa vanathu. Awu a si randiko a ngadi zumbile kufani. 15Votshe va va vengelako vanawe mbadayi va vathu; se ma ti ziva ti to ku walo wu i ku m'dayi, awu wutomi wo mbi guma wu si kotako kuzumba kwakwe. 16Lirando hi li zivisa tiya: Jesu a ningete wutomi wakwe ngu mhaka yathu; se nathu hi fanete kuningela wutomi wathu ngu mhaka ya vanathu. 17Ngako mthu a di ni tithomba ta ha mafuni hawa, a txi wona mwanawe a singa naso, se a si m'khataleli, li nga zumbisa ku txani kwakwe lirando la Txizimu kani? 18Vanavangu, hi nga randeni ngu txisofu ni lidimi, aniko he randaneni ngu mithumo ni ditshuri. 19Ngu kona hi no ti ziva ti to hi vathu va ditshuri, se mbilu yathu yi na va ni kurula masoni ka txona Txizimu. 20Ngako yona mbilu yathu yi txi hi mangala, txona Txizimu nja hombe kupinda mbilu yathu, futsi kambe txona txa ziva totshe. 21Vorandeka ngutu, ngako mbilu yi si hi mangali, hina ni txithembo ka Txizimu; 22se txihi ni txihi hi no kombela hi na ningwa ngu txona Txizimu, nguko ha veketa sirumo sa txona ni kumaha ati ti txi tsakisako. 23Txirumo txa Txizimu ngu txiya: Kukholwa ka ditina da Mwanana wa txona Jesu Kristu, ni kurandana nga ti a nga hi rumisa tona. 24Awule a veketako sirumo sa Txizimu, a zumba ka Txizimu, se Txizimu ni txona txi zumba kwakwe. Ha ti ziva ti to Txizimu txi zumba ni nathu ngu kota ya Moya wu txi nga hi ninga.

will be added

X\