1 JOHANE 2

1Vanavangu: Ni mi bhalela timhaka tiya kasiku mi si wonhi. Kambe ngako mmweyo wanu a txi wonha, hina ni Mthaveleli masoni ka Tata: Ene Jesu Kristu mululami. 2Ene ngene i ku mhamba ya kudihela siwonho sathu, futsi hi nga siwonho sathu kugwita, aniko i mudiheli wa siwonho sa votshe vathu. 3Hi komba ti to ha m'ziva Tate, ngako hi txi veketa milayo yakwe. 4Awu a wombako ti to “ani na m'ziva”, na a si veketi milayo yakwe, a womba makuhu, futsi kha na ditshuri. 5Kasi awule a veketako dipswi dakwe, kha ditshuri lirando la Txizimu li hetisekile kwakwe. Ngu tona tiya ni ti zivisako tona ti to hi ka txona Txizimu. 6Awule a wombako ti to a zumba ka txona, a fanete kutsimbila nga ti ene Jesu a nga tsimbitisa tona. 7Vorandeka ngutu, hi nga txirumo txa txiphya ni mi bhalelako, aniko njirumo txa kale, ni nga txi amukela kukhukhela makhatoni: Txirumo txi txa kale ngu dipswi diya mi nga di engisa. 8Kambe njirumo txa txiphya ni mi bhalelako txona, atxiya kwakwe Kristu ni kwanu i ku txa ditshuri, nguko txidema txa pinda, se liwoningo la ditshuri la woninga. 9Awule a wombako ti to a liwoningoni, na a txi vengela mwanawe, a ngadi txidemani ni konkuwa. 10Awu a randako mwanawe a zumba liwoningoni, se kwakwe kha ku nga ni txikhuvekiso. 11Kambe awu a vengelako mwanawe a txidemani, a tsimbila txidemani, kha zivi mu a yako kona, nguko txidema txi fayile maso akwe. 12Ni bhalela anu, vanavangu nguko siwonho sanu si divaletwe ngu ditina da Kristu. 13Ni bhalela anu, vatate, nguko ma m'ziva awule i ku ene kukhukhela makhatoni. Ni bhalela anu, vavaphya, nguko mi xute m'bihi. 14Ni mi bhalete anu, vanavangu nguko ma m'ziva Tate. Ni mi bhalete anu, vatata, nguko ma m'ziva awule i ku ene kukhukhela makhatoni. Ni mi bhalete anu, vavaphya, nguko mi na ni mtamo, ni Dipswi da Txizimu di akile kwanu, na kambe mi xute M'bihi. 15Mi nga randeni mafu, hambi ni si si ku ha mafuni. Awu a randako mafu, lirando lo randa Tate kha li nga ho kwakwe. 16Nguko sotshe si si ku ho ha mafuni, kunavela ka mmidi, kunavela ka maso ni ku ti kulisa ngu tithomba, hi nga si si tsakelwako ngu Tate, aniko si tsakelwa ngu vathu va ha mafuni. 17Kasi mafu ma pinda ni kunavela ka ona, kambe awu a mahako kuranda ka Txizimu, a zumba ngu hawa ku si gumiko. 18Vanavangu, txi hokile txikhati txo gwitisa. Mi ti engisile ti to wa ta Mkaneti wa Kristu, na kasi va ho vavangi vakaneti va Kristu; ngu konaho hi ti zivako ti to txi hokile txikhati txo gwitisa. 19Vona va humete hagari kwathu, aniko i ti singa va ka kwathu. Idiku i ti va ka kwathu, nga va di zumbile ni nathu. Aniko va humile, kasiku ti txi woneka ti to hi nga votshe i nga ti va ka kwathu. 20Aniko anu mi amukete Moya wo Sawuleka, se motshe mina ni wuzivi. 21Ani kha na mi bhalela ngukuva mi si zivi ditshuri, aniko ni mi bhalete ngu kuwa mi di zivako, nguko ku walo makuhu awa ma humako ngu ka ditshuri. 22Ngu mani i ku wa makuhu, i singa wule a kanetako ti to Jesu i Mesiya, kani? Mthu wo ngeto, ngeneyo Mkaneti wa Kristu, a lambako Tate ni Mwanana. 23Wuhi ni wuhi a lambako Mwanana, Tate kha nga ni nene: awu a fakazelako Mwanana, ni Tate wa ho kwakwe. 24Aniko, anu khutalani, kasiku ti txi zumba kwanu ati mi nga ti engisa, kukhukhela makhatoni. Ngako ti txi zumba kwanu ati mi nga ti engisa kukhukhela makhatoni, nanu mi na zumba ka Mwanana ni ka Tate. 25Txithembiso txi a nga hi mahela ngu txiya: wutomi wo mbi guma. 26Ni mi bhalela timhaka tiya ngu mhaka ya vale va lavako ku mi timeta. 27Se anu, Moya wuwa mi nga wu amukela kwakwe Kristu wu zumbile kwanu, se kha mi ngadi mi txi fanela kugondiswa ngu mthu; nguko Moya wa ditshuri, kha wu wombi makuhu. Ngu konaho, zumbani kwakwe Kristu, nga tiya Moya wu nga mi gondisa tona. 28Ngu konaho, vanavangu, zumbani kwakwe Kristu, kasiku mbimo yi a no ti wonekisa, hi na va ni kuthemba ka hombe, hi si vi ni tingana, kuwuyani kwakwe. 29Ngako mi ti zivako ti to ene a lulamile, ti ziveni ti to wuhi ni wuhi a mahako to lulama, a velekilwe ngu ngene.

will be added

X\