1 JOHANE 1

1Hi bhala ta wule i ku Dipswi da wutomi, ati i nga ti tona kukhukhela makhatoni; ati hi nga ti engisa, ati hi nga ti wona ngu maso athu, ati hi nga ti wonisisa, ati hi nga ti gwesa ngu manza athu. 2Wutomi wu ti kombisile, se athu hi wu woni, ha wu fakazela; se ha mi zivisa ta wutomi wuwa wo mbi guma, awuwa wu nga ti ka Tate, senikoko wu nga ti kombisa kwathu. 3Atiya hi nga ti wona ni ku ti engisa, ngu toneto hi mi zivisako tona nanu, kasiku nanu mi txi maha vamwevo ni nathu. Se wumwewo wathu wu hi tshanganisa ni Tate ni Mwanana wakwe Jesu Kristu. 4Hi mi bhalela timhaka tiya, kasiku litsako lathu li txi hetiseka. 5Aawa ngu ona mahungu awa hi nga ma engisa kwakwe Jesu Kristu, aawa hi mi zivisako: Txizimu i Liwoningo, ka txona ku walo txidema. 6Ngako hi txi womba ti to hi vamwevo ni Txizimu, na hi txi tsimbilela ntemani, ha womba makuhu, futsi kambe kha hi mahi ditshuri. 7Aniko, ngako hi txi tsimbilela liwoningoni, nga txona txi ku liwoningoni, hi maneka hi di vamwevo ngu txathu, se mnoha wa Jesu, Mwanana wa txona wa hi basisa ka sotshe siwonho. 8Ngako hi txi womba ti to kha hi nga ni txiwonho, ha ti kanganyisa, se ditshuri kha di nga ho kwathu. 9Ngako hi txi ti tshanza siwonho sathu,Txizimu txi thembekile ni kululama, kasiku txi hi divalela siwonho sathu ni ku hi basisa ka wotshe wubihi. 10Ngako hi txi womba ti to kha hi wonhi, ho txi lumbeta makuhu, se dipswi da txona kha di nga ho kwathu.

will be added

X\