1 VAKORINTO 9

1Ina kha na khululeka kani? Ina kha ni nga mpostoli kani? Ina kha na mu wona Jesu Kristu kani? Ina anu kha mi nga mthumo wangu ngu ka Mkoma kani? 2Hambi ni singa mpostoli ka vamwane vathu, kambe kwanu ni mpostoli, nguko anu mi txixambanyo txa wupostoli wangu ngu ka Mkoma. 3Txitxhavangu txangu ka vale va wombako kubiha ngu ngani ngu txiya: 4Ina athu kha hi nga ni fanelo ya kudya ni kusela kani? 5Kha hi nga ni fanelo ya kubangalatana ni wamsikati wu i ku ndiyathu ngu ka Kristu, nga ti va mahako vamwane vapostoli, ni vanawe va Mkoma ni Khefasi, kani? 6Mwendo ngani nokha ni Bharnabhasi hi ku singa ni fanelo yo thuma, kani? 7I mani a tsulako yimbini ngu mtamo wakwe dwe? I mani a phayako mivhinya, a si dyiko mihando ya yona kani? Mwendo i mani a dyisako mtxhambi a si seliko masi a kona kani? 8Ina ni womba tiya ngu mawombelo ya vathu kani? Ina mlayo kha wu ti wombi niwona kani? 9Nguko Mlayoni ka Mosi ti bhatwe ti ta ku: “U nga tsive txisofu txa homu yi yi hulako.” Ina Txizimu txo khatalela tihomu kani? 10Ina txona kha txi ti wombeli athu vathu, kani? Im! Atiya ti bhatwe ngu kota yathu. Ngukusa awu a dimako a fanela kudima ni txithembo, awu a hulako, a hula na a txi themba kumana txhatxhazelo. 11Ngako hi di phayile kwanu sa moya, ina ngu kalavela, ngako hi txi hapha kwanu mihando ya mafu kani? 12Ngako vamwane va thathelako asi si ku kwanu, ina athu kha hi fanekelwi ka kupindisa kani? Aniko athu kha hi nzi ku yi thumisa faneloyo. Kambe hi zumba hi txi timisela ka totshe, ngu kota ya Evhangeli ya Kristu. 13Ina kha mi ti zivi ti to vaphaxeli va timhamba va hanya ngu sa dithepeleni kani? Ni ti to ava va vhunetelako ha txiluveloni va mana txiavelo txa ha txiluveloni, kani? 14Ngu nzila yo nga toneto, Mkoma nene a leletile ti to ava va thumelako Evhangeli va na hanye ngu Evhangeli. 15Aniko ani kha ni zivi ku yi thumisa fanelo yiya, futsi kambe kha ni bhaleli ti to ni mahelwa eto ngu vathu; ni bheja kufa, kupinda kumwalata wudhumo wangu. 16Kutxhumayela Evhangeli, kwangu, hi nga mhaka ya ku ti bhumisa phungo ngu yona, i fanelo yi ni nga rwekwa. Dikhombo dangu, ngaku ni si txhumayeli Evhangeli! 17Idiku no thuma tiya ngu kuranda kwangu, ni ndina fanekelwa ngu kudihelwa; kambe, ngako i singa ta ku ti maha ngu kuranda kwangu, i mrwalo ni nga sikelwa. 18Seni kasi nji txani ni holako txona kani? Ni dihelwa ngu kuva ni txhumayela Evhangeli ni si kombeli txilo, ni leka kuamukela asi ni ningwako ngu yona Evhangeli. 19Ni maneka ni di txhatxhekile masoni ka votshe; kambe ni ti mahile khumbi ya votshe kufela ku na mana vavangi ngutu. 20Ni ti mahile Mjudha kumweko ni Vajudha, kufela ku ni va mana. Ni hanyisa ku nga vale va hanyako hahatshi ka mlayo, nga khwatshi no fumwa ngu wona, kufela ku ni va mana nivona. 21Ni di ni vale va ku hahanze ka mlayo, ni hanyisa ku nga vale va ku hahanze ka wona mlayo, kufela ku ni va mana nivona, hambiko ni ku singa hahanze ka mlayo wa Txizimu, kambe ni ku hahatshi ka mlayo wa Kristu. 22Hagari ka vale va dikhodho mu ka likholo, ni ti mahile wa dikhodho nani kufela ku ni txi va mana. Ni ti mahile sotshe ka votshe kufela ku ni txi mana kuhanyisa vamwane ngu totshelele tinzila. 23Ni maha tiya totshe ngu ndava ya Evhangeli, kasiku ni txi mana txiavelo txangu ka yona. 24Ina kha mi ti zivi ti to ava va mahako mapalisana a livilo ha mthandani, votshe va tutuma, kambe i mmweyo dwe a wuyelwako ngu txhatxhazelo, kani? Nananu tutumisani toneto, kasiku mi na mana kufuhwa. 25Awule a ti longiselako kuya lwa, wa ti tona so tala, kufela ku e wuyelwa ngu m'bhoti wu wu sinako, aniko athu hi lwela m'bhoti wu wu si siniko. 26Ani kha ni mahi nyamtutume, kambe kha ni lwisi ku nga no peketela diphuho. 27Aniko ani ni tsayisa mmidi wangu, ni txi wu maha khumbi, kufela ku, ni di txhumayete vamwane, ani nipune ni si sali msana.


Copyright
Learn More

will be added

X\