1 VAKORINTO 8

1Ka mhaka yi yi wombako ngu sakudya sa kugandela sizimu sa walo, ha ti ziva ti to hotshethu hi ni wuzivi. Wuzivi wu ninga ku ti kukumukisa, aniko lirando la aka. 2Se ngako mthu a txi pimisa ti to wa ziva, eyo kha nzi kuziva ngu tifanelo ti ti lavekako. 3Aniko, ngako mthu a txi randa Txizimu, eyo wa ziwa ngu txona. 4Ngu toneto, ka mhaka ya sakudya sa timhamba ta kugandela sizimu sa walo, ha ti ziva hotshethu ti to Txizimu txa walo hi nga txa txilo ha ditikoni; ha ti ziva ti to ku ni Txizimu, txa tximwetxo dwe, hahanze ka txona ku walo tximwane. 5Ngukusa, hambi si di ho sasingi si dhanwako “sizimu”, nzumani mwendo ha mafuni, nga ti si ku ho sizimu sasingi ni vakoma vavangi, 6kambe kwathu kha txi nga ho tximwane hahanze ka Txizimu tximwetxo dwe, Tate wu, sotshe si tako ngu kwakwe, awu, hotshethu hi hanyelako ene; ni Mkoma mmweyo dwe, Jesu Kristu, awu, sotshe si hanyako ngu ngene, ni nathu hi hanyako ngu ngene. 7Aniko hi nga votshe va ti zivako tiya. Vamwane, va nga tolovela mahanyelo a kale a kukhozela sizimu sa walo, va dya sakudya sa timhamba ta sizimu sa walo, va txi kholwa ti to nza kuphaxelwa sona sizimu sile; se ngako livhalo lawe li nga mbi tsana, va wulelelwa ngu mtungu. 8Aniko hi nga sakudya si hi ningako kutsakisa Txizimu. Nguko kha hi wuyelwi ngu txilo, ngako hi txi dya, futsi kambe kha hi luzi txilo, ngako hi si dyi. 9Kambe ti woneleni, kasiku, kukhululeka kwanu ka mhakeyo, ku si khuvekisi ava vo mbi tsana. 10Nguko kumaha tiya mthu wo kari a txi ku wona awe, u ti zivako, u di khalahatshile ha sakudyani amu dithepeleni ka sizimu sa walo, ina mbilu yakwe wule wo mbi tsana kha yi na mbi m'susumetela kudya nene nyama ya timhamba ta sizimu sa walo kani? 11Se ngu mhaka ya kuziva kwako, a na luzeka mwananu i ku wo mbi tsana, ene wu Kristu a nga m'fela. 12Se ngako mi txi hoxela vanathuvo, mi txi va dayisa livhalo lawe lo mbi tsana, ka toneto ma hoxela Kristu. 13Ngu toneto, ngako sakudya si txi khuvekisa mwanathu, ani kha ni na mbi swa ni txi dya nyama, kasiku ni si khuvekisi mwanathu.

will be added

X\