1 VAKORINTO 7

1Senikoko, ka timhaka ti mi nga ni bhalela, ani ni pimisa ti to ndinene ngako mthu a si teki msikati. 2Aniko, ngu konaho ka wugelegele wu nga tala, wamwamna ni wamwamna a na ve ni msikati wakwe; wamsikati ni wamsikati nene a na ve ni mwamna wakwe. 3Wamwamna a na ninge msikati wakwe asi i ku sa fanelo; kufana ni toneto, wamsikati nene a na ninge mwamna wakwe asi i ku sa fanelo. 4Wamsikati kha nga ni mtamo txitimwi ka mmidi wakwe apune, aniko mtamo wu ni mwamna wakwe; kufana ni toneto, wamwamna nene kha nga ni mtamo txitimwi ka mmidi wakwe apune, aniko mtamo wu ni msikati wakwe. 5Mi nga tonaneni, hahanze ka kuva mi txi pfana ngu wumbidi wanu ngu mbimwanyana, kasiku mi si kota ku ti ningela mkombeloni. Mi di gwitile, tshanganani kambe, kasiku Sathane a si mi duki ngu ku ambi ti ├▒ola kwanu. 6Ni womba tiya kufela ku mi komba ti ti tumelelwako, i singa ngu kukurumetwa. 7Nguko ni ti navela ti to votshe vathu va txi fana ni nani; aniko mthu ni mthu a amukete txi txi mu dinganako ngu ka Txizimu, mmwane ni mmwane, nga ti a nga ningiswa tona. 8Kambe ka va va si nziko kuteka ni va va si nziko kutekwa ni ka tinoni, ni khani i tshuko va txi zumba kufana ni nani. 9Aniko, kungako va si si koti, va na amukele mtekano. Nguko i tshuko kutekana kupinda kuhya ngu kunavela. 10Aniko na ruma ava va nga tekana hi nga ani ni rumako, ku ruma Mkoma, ti to wamsikati a si lekani ni mwamna wakwe. 11Kambe kungako a txi lekana nayo, a nga tshumele e tekana ni mmwane; mwendo a nga divalelana ni mwamna wakwe; wamwamna nene a nga leke msikati wakwe. 12Se ka vamwane na va gela ani, i singa Mkoma, ku khani: Ngako mmweyo wa vanathu a di ni msikati wo va a si kholwi, kambe a tumelako kuhanya nayo, a nga m'leke. 13Nene wamsikati, ngako a di ni mwamna wo mbi kholwa, kambe a tumelako kuhanya nayo, a nga mu leke. 14Nguko wamwamna wo mbi kholwa wa sawulekiswa ngu msikati; se wamsikati wo mbi kholwa wa sawulekiswa nene ngu mwamna. I singa eto, vanana vanu va ndina va va nzambwa; kupheti vona mbasawuleki. 15Se, ngako awu i ku singa dikholwa a txi lava kuhambana, a na tsule. Keyo mhaka, awu wa mwanathu, mwendo wu wa ndiyathu a txhatxhekile. Txizimu txi mi dhanete kudikhani. 16Ina wa ti ziva awe wamsikati ti to u na hanyisa mwamna wako kani? Awe wamwamna, wa ti ziva ti to u na hanyisa msikati wako kani? 17Ngu toneto, mthu ni mthu a na mahe nga ti a nga ningiswa tona ngu Mkoma, mwendo nga ti Txizimu txi nga m'dhanisa txona. Ngu tona ti ni rumisako tona ka otshe mabanza. 18Wa ho wu a nga dhanwa wukholwani, a di yisilwe wukwerani kani? A nga lave kusisa wukwera wakwe. Wa ho wu a nga dhanwa wukholwani a si nzi kuyiswa wukwerani? A nga lave kuyiswa wukwerani. 19Wukwera hi nga txilo, wukhutu ni wona hi nga txilo; txa lisima ngu kuveketa sirumo sa Txizimu. 20Mthu ni mthu a na zumbise ti a nga dhaniswa tona ngu Txizimu. 21U dhanwi u di txithumi kani? U nga khatale. Aniko, ngako u txi mana kateko yo thuswa, yi londole. 22Ngukusa awu a dhanwako ngu Mkoma i di txithumi, i mtxhatxheki wa Mkoma. Nene wu a dhanwako a di txhatxhekile, njithumi txa Kristu. 23Mi xavilwe ngu txa lisima la hombe, mi nga ti maheni tikhumbi ta vathu. 24Vanathu, mmweyo ni mmweyo kwanu, masoni ka Txizimu, a na zumbise ti a nga dhaniswa tona. 25Ka vale va si nziko kuteka mwendo kutekwa, kha ni nga ni txileleto txa ditshelo da Mkoma, aniko na veka mawonelo angu, kota nga wu a nga mana wumbilu ka Mkoma, kasi e va i di wo thembeka. 26Kunene, ani ni pimisa ti to, ngu mhaka ya sikarato sa mbimo yiya, ndinene wamwamna a txi zumbisa toneto. 27Ina u ti sungile ka wamsikati kani? U nga lave kubhenula ngoti. Ina u khululekile ka wamsikati kani? U nga lave kuteka msikati. 28Aniko, ngako u txi teka msikati, khu mahi txiwonho; muhorana wotuma nene, a txi tekwa kha mahi txiwonho. Aniko ava va nga txhadha va na mana sixaniso sa ha mafuni; se ani ni ti ko lava ku mi ponisa ka sixaniso soneso. 29Na mi gela, vanathu, ti to txikhati txi komile. Kukhukhela ka konkuwa, ava va ku ni vasikati va na hanyise ku nga khwatshi kha va nga navo; 30ava va dilako va ne nga khwatshi kha va dili; ava va tsakako va ne nga khwatshi kha va tsaki, ava va xavako va ne nga khwatshi kha va nga ni txilo; 31ani va va londolako sa mafu awa, va ne nga khwatshi kha va si thumisi, nguko mazumbelo a ditiko diya ma guma. 32Ani ni ti dhunda ti to mi si zumbi ngu kukarateka. Awu a nga mbi teka msikati a khutalela kumaha kuranda ka Mkoma, kumaha ti ti si kotako kutsakisa Mkoma; 33kasi awu a nga teka msikati a khutalela sa ditiko ni kumaha ti ti si kotako kutsakisa msikati wakwe; 34se a maneka a di bhandilwe. Wamsikati wu a nga mbi tekwa, kufana ni wu i ku ngadi mbiri, a khutalela si i ku sa Mkoma, kufela ku ti sawulekisa mmidi ni moya. Kasi awu a nga tekwa a khutalela sa ditiko, a txi maha ti ti si kotako kutsakisa mwamna wakwe. 35Ni womba tiya kufela ku mi vhuna; i singa ku mi riyela. Ni xuva kuwomba ti i ku ta lisima la hombe ni ti ti si kotako ku mi tshanganisa ni Mkoma ngu ku enelela. 36Aniko, ngako mthu a txi pimisa ti to hi nga tatinene mwanana wakwe wa txihoranana a txi pindelwa ngu tanga ya kutekwa, na a txi pimisa kambe ti to a fanela ku m'txhadhisa, a na mahe ati a ti lavisako tona; kha mahi txiwonho ngako a txi m'txhadhisa, a na m'txhadhise. 37Aniko, awu a nga ti langela ngu kutsana mbiluni kwakwe, i singa kukurumetwa ngu txilo, a txi maneka a di txhatxhekile tatinene kutshatani kwakwe, ti to a na xayisa mwanana wakwe wa txihoranana i di wotuma, a maha ta tinene. 38Ngu toneto, awu a txhadhisako mwanana wakwe wa txihoranana a maha ta tinene. Kambe awu a si m'txhadhisiko a maha ati i ku ta tinene ngu kupindisa. 39Wamsikati wa kutekwa a sungilwe ka mwamna wakwe, a di ngadi a txi hanyelwa ngu mwamna. Ngako mwamna wakwe a txi fa, wamsikati a txhatxhekile, kasiku e tekana ni wu a m'lavako, ti txi nga tsimbila ngu mlayo wa Mkoma. 40Aniko, ka mawonelo angu, a na va a di katekile, ngako a txi zumbisa ti a nga salisa tona. Ni pimisa ti to nanani ni ni Moya wa Txizimu.


Copyright
Learn More

will be added

X\