1 VAKORINTO 4

1Ti di ngeto, vathu ku laveka va txi hi ziva nga hi sithumi sa Kristu ni ti to hi vaaveli va sixamaliso sa Txizimu. 2Se vaaveli ta laveka va txi maneka i di vo thembeka. 3Ani ngu txangu, kha ni khatali ngu kulamulwa ngu nganu, kumbe kulamulwa ngu vathu, hambi ani ngu wutumbu wangu kha ni ti lamuli nipune. 4Mbiluni kwangu kha ni ti pfi mnandu wa txilo; aniko, hambi keto, kha ni wombi ti to ni mlulami: awu a si kotako ku ni lamula ngu Mkoma. 5Ngu toneto, mi nga tekeleni kulamula, txi si nzi kuhoka txikhati, kala kuwuyani ka Mkoma, awu a no ta woninga mithumo yi yi nga sisala mtemani, e wonekisa makungo a timbilu. Se ngu konaho mmwane ni mmwane a no ta amukela ka Txizimu wudhumo wu wu m'fanelako. 6Vanathu, ni di wombile tiya ngu ngani ni Apolosi, ni ti mahela anu, kasiku mi txi gonda ngu ngathu ku ambi ndaka muhingano wa tile ti nga bhalwa, ni ti to ni mmweyo a si ti kulisi, a txi namarela ka mmweyo, a txi nyenya mmwane. 7Kunene, kasi i mani wu a sawulako kani? Nji txani u ku natxo awe, txo va u sa maha ngu kuningwa kani? Se ngako u di ningilwe, nji txani u txi ti guleta, nga hi nga so si mana ngu kuningwa kani? 8Se mi khuri! Se mi vanyatithombe! Mi ti pfa mi di vakoma hahanze kwathu! Sikwanu mayi, idiku mo va vakoma va ditshuri, kasiku nanathu hi fuma kumweko ni nanu. 9Kha ditshuri, Txizimu ngu nga txi to hi veka athu, vapostoli, ka wukhalo wa magwito, kota nga vo abaniselwa kufa, nguko ngu ditshuri hi mahilwe msaho wa kuhungata ditiko ni tingelozi ni vathu. 10Athu hi sipumbu ngu kota ya Kristu, se anu mi titxhari ngu ka Kristu; athu hi mapwembwe, anu mi tindena; anu mi vo xonipheka, athu hi vo eyiseka, 11kala txikhati txa nyamsi ha xaniseka ngu nzala, ni ditora ni wusakato; ha yamaselwa ngu mipama, hi vaxeleleki; 12ha karala ngu kuthuma ngu manza athu. Hi txi rukwa, athu ha katekisa; hi txi xaniswa, athu ha timisela; 13hi txi singetwa makuhu, athu hi womba mapswi a thavelelo. Hi hindukile hi txi nga ho va nzambwa ya mafu, ditala da votshe, kala ditshiku da nyamsi. 14Kha ni mi bhaleli timhaka tiya kufela ku mi thela tingana, aniko ni mahela ku mi laya, nga vanana vangu vo randeka ngutu. 15Nguko, hambi idiku mo va ni dizana da mazana a vagondisi ngu ka Kristu, kambe kha mi nga ni vatate vavangi, ngukusa ani ngani ni nga mi veleka ngu ka Kristu Jesu, ngu txhumayelo ya Evhangeli. 16Ngu toneto, na mi kombela ti to mi va vaeteteli vangu. 17Ngu konaho, ni mi rumete Timoti, i ku mwanana wangu wo randeka ni kuthembeka ngutu ngu ka Mkoma; ene a na mi alakanyisa tinzila tangu ta likholo ka Kristu, nga ti ni nga gondisisa tona ka otshe makhalo, ka otshe mabanza. 18Vamwane va tsimbila ngu ku ti kukumukisa, nga no va ni si lavi ku mi tela kambe. 19Aniko, ngako Txizimu txi txi ti lava, kunukunuku ni na mi tela ni ta setxha, i singa mapswi ya va va ti kukumukisako, aniko ni ta duka mtamo wawe. 20Kha ditshuri, Mfumo wa Txizimu hi nga mhaka ya mapswi, aniko i mhaka ya mtamo. 21Mi sawula txani? Mi lava ni txi mi tela ni ndonga, mwendo ni txi mi tela ni lirando ni moya wo thutha kani?

will be added

X\