1 VAKORINTO 3

1Se i di ani, vanathu, kha na si kota kuwombawomba ni nanu nga vathu va Moya, aniko ni wombawombile ni nanu kota nga vathu va ha mafuni dwe, ni mi fananisa ni sivananana amu ka timhaka ta kuziva Kristu. 2I masi ni nga mi mamisa, hi nga sakudya so banga, nguko nga mi sa si kota kutxakuta. Hambi ni konkuwa, nga mi si si koti, 3nguko mi ngadi vathu va ha mafuni dwe. Nguko mibango ni kuphikizana kuwa ku ku ho hagari kwanu, ina hi nga kuwa mi ku ngadi vathu va ha mafuni dwe, mi hanyisako wuthu kani? 4Ngukusa, ngako mthu a txi khene: “Ani ni wa ka Paulo”, mmwane a txi khene: “Ani ni wa ka Apolosi”, ina tona tiya hi nga kuhanyisa wuthuri kani? 5Hingani ni gela: I mani Apolosi? I mani Paulo? Vona nzithumi dwe, asi mi nga amukeliswa ngu sona likholo, na ti txi tsimbila ngu hawa mmwane ni mmwane a nga ningiswa tona ngu Mkoma. 6Ani ni phayile, Apolosi a si theletete mati, aniko Txizimu ngu txona txi nga si kulisa. 7Ngu konaho, hambi wu a phayako, hambi wu a theletelako mati hi nga txilo. Txizimu ngu txona txi si kulisako. 8Awu a phayako kumweko ni wu a theletelako mati mbamwevo; se mmwane ni mmwane a na tshungulwa madingano ni mthumo wakwe. 9Kha ditshuri, athu hi vavhuneteli va Txizimu, anu mi wudimi wa Txizimu, mi nyumba ya Txizimu. 10Madingano ni kateko ya Txizimu, ayi ni nga ningwa, ani kota muaki wo ziva, ni valute makhato, aniko mmwane ngene a akako txitimwi ka makhato awa. Se mthu ni mthu a na wonisise ati a akisako tona koneho; 11nguko a walo wu a ku ni fanelo ya kuveka mamwane makhato a kuhambana ni awa ma nga vekwa, i ku ene Jesu Kristu. 12Ngako mthu a txi aka txitimwi ka makhato awa, ngu nzalama, ngu silivhela, ngu marigwi a lisima, ngu mapulango, ngu matshanga mwendo mwasi; 13wu na ti komba mthumo wa mthu ni mthu, nguko ditshiku da kuta ka Mkoma di na ta wu landula. 14Se ngako mthumo wa mthu wu di akilwe wu di tsani, muaki a na tshungulwa. 15Se ngako mthumo wa mthu wo kari wu txi hya, eyo a na luzekelwa, kambe ene a na poniswa, nga a to pinda ngu hagari ka mndilo. 16Kasi kha mi ti zivi ti to mi dithepele da Txizimu ni ti to Moya wa Txizimu wu zumba kwanu kani? 17Ngako mthu a txi hasulela dithepele da Txizimu ni txona txi na mu hasulela. Nguko dithepele da Txizimu di sawulekile, se dithepele diya ngu nganu. 18Mi nga ti kanganyiseni mipune. Ngako mthu a txi pimisa ti to a txharihile ngu wutxhari wa ha mafuni, a na ti mahe txipumbu, kufela ku e mana wutxhari wa ditshuri. 19Nguko wutxhari wa ha mafuni mbupumbu masoni ka Txizimu, kota nga ti ti nga bhalwa va txi: “Txona txa bzweta vazivi amu ka wutxhari wawe.” 20Ka wumwane wukhalo kambe va khona: “Mkoma wa ti ziva ti to mialakanyo ya vathu hi nga ya kunyawula.” 21Ngu toneto, mi nga ti kuliseni hagari ka vathu. Ngu ditshuri, sotshe nzanu: 22hambi ene Paulo, kumbe Apolosi, kumbe Khefasi, kumbe mafu, kumbe kuhanya, kumbe kufa, kumbe ta nyamsi, kumbe ta mangwana; sotshe nzanu, 23kambe anu mi va ka Kristu, se Kristu mbwa ka Txizimu.

will be added

X\