1 VAKORINTO 12

1Ka mhaka ya sihiwa sa Moya, vanathu, kha ni ti lavi ku mi sisela. 2Ma ti ziva ti to, mbimo yi mi nga ti vamatiko, mi ti tumela kundindwa mi yiswa ka sizimu sa walo sa siduma. 3Ngu toneto, na mi zivisa ku khani: A walo wu a wombawombako ngu kutulelwa ngu Moya wa Txizimu, a si kotako kuwomba ti to “Jesu nja walo”; futsi kambe a walo wu a si kotako kuwomba ti to “Jesu i Mkoma”, na i singa wu a nga tulelwa ngu wona Moya wo Sawuleka. 4Ku ho kuhambana ka sihiwa, aniko Moya wona mbumwewo; 5ku ho kuhambana ka mithumo, aniko Mkoma i mmweyo; 6ku ho kambe kuhambana ka mathumelo, aniko i Txizimu tximwetxo txi ku ho, atxi txi thumako totshe ka votshe. 7Kambe mmwane ni mmwane a ningwa sihiwa sa kuwonekisa Moya, kasiku e vhuna votshe. 8Mmwane a ningwa kuwombawomba mapswi a wutxhari ngu wona Moya, mmwane a ningwa kuwomba dipswi da wuzivi madingano ni wona Moya wu wa wumwewo; 9mmwane a ningwa kukholwa ngu Moya wu wa wumwewo; mmwane wa ningwa ngu wona Moya wu wa wumwewo txihiwa txa kuhanyisa valwali; 10mmwane a ningwa mtamo wa kumaha sidiwukiso; mmwane a ningwa kutxhumayela dipswi; mmwane a ningwa kuwona kuhambana ka mimoya; mmwane a ningwa kuwombawomba tidimi; mmwane nene a ningwa txihiwa txa ku ti txhamusela. 11Aniko totsheto ngu wona Moya wu wa wumwewo dwe wu ti thumako, wu txi avela ngu mmweyo ni mmweyo sihiwa sa wona, kota nga ti wu ti lavisako tona. 12Ngu toneto, kufana ni mmidi i ku wumwewo, kambe wu ku ni sihango sa singi, asi, hambiko i ku sa singi, si mahako mmidi wa wumwewo, ngu toneto nene Kristu. 13Kha ditshuri, hotshethu, mwendo hi Vajudha mwendo hi Vagriki, mwendo hi tikhumbi mwendo hi vathuseki, ngu kubhabhatiswa ka Moya wa wumwewo, hi mahile mmidi wumwewo. Hotshethu hi setilwe Moya wumwewo. 14Mmidi kha wu nga ni txihango tximwetxo basi, aniko wu ni sihango so tala. 15Hambi idiku mkondo wo womba wu txi: “Akuwa ni singa dianza, kha ni lumbi mmidi”, nga ti si koteki kuva i singa txihango txa wona mmidi. 16Nzeve ni yona, hambi idiku yo womba, yi txi: “Ani, akuwa ni singa diso, kha ni nga txihango txa mmidi”, nga ti si koteki kuva i singa txihango txa wona mmidi. 17Idiku mmidi wotshe wo va i di diso dwe, hi ndina engisisa ku txani, kani? Idiku wotshe mmidi wo va i di nzeve dwe, kupfa ka thonvu ku ndina va ku di hayi kani? 18Aniko, ati i ku tona, Txizimu txi vekile sihango ha mmidi, tximwane ni tximwane kota nga tiya txi nga ti randisa tona. 19Idiku sotshe sihango so va i di txihango tximwetxo, mmidi wona wu ndina va wu di hayi kani? 20Ati i ku tona, sihango nza singi, kambe mmidi mbumwewo. 21Diso kha di na ku si kota kugela dianza di txi: “Awe kha ni ku lavi”. Hambi msungo kha wu na ku si kota kugela mikondo, wu txi: “Anu kha ni mi lavi”. 22Lambi! Kambe sihango sa mmidi, asi si wonekako nga khwatshi kha sa tsana kupinda simwane, eso ngu sona si lavekako. 23Ani sile si wonekako nga khwatshi kha si faneli kuxoniphwa, ngu sona hi si fenengetako ngu txithavo kupinda simwane; ani sihango sathu sa kusoleka, ngu sona hi si xoniphako kupinda simwane; 24kasi sihango sathu si i ku sa kutshura kha si lavi txilo. Aniko Txizimu txi vangile mmidi, txi txi ninga kuxonipheka ka hombe ngutu ka txihango txi i ku txa kusoleka, 25kasiku ku si vi ni mibango ha mmidi, ni sihango si ziva kuxayisana. 26Ngako txihango txo kari txi txi xaniseka, simwane sa abana kuxanisekako natxo; ngako txihango txo kari txi txi dhumiswa, sotshe sihango sa tsaka kumweko natxo. 27Senikoko, anu mi mmidi wa Kristu, futsi mi sihango sakwe, mmweyo ni mmweyo ngu mazumbelo akwe. 28Avale Txizimu txi nga va veka, mndani ka dibanza, kuthanga txi vekile vapostoli, ka wumbidi txi vekile vaprofeti, ka wuraru txi vekile vagondisi. Ngu msana ku ta sihiwa sa kumaha sidiwukiso, sa kuhanyisa valwali, sa kuvhuna vamwane, sa kuthangelela mthumo, kuwombawomba tidimi to tala. 29Ina votshe mbapostoli kani? Ina votshe mbaprofeti kani? Ina votshe mbagondisi kani? Ina votshe va maha sidiwukiso kani? 30Ina votshe va ningilwe kuhanyisa valwali kani? Ina votshe va ningilwe kuwombawomba tidimi kani? Ina votshe va ningilwe kutxhamusela txona tidimi tiya kani? 31Lavani ngutungutu sihiwa si i ku sa lisima la hombe. Se ni lava ku mi kombisa nzila yi i ku ya yinene ngutu.


Copyright
Learn More

will be added

X\