1 VAKORINTO 11

1Mahani vaeteteli vangu, kufana ni nani ni ku mueteteli wa Kristu. Ku ambala txo fenengeta msungo txhetxheni 2Na mi bonga, vanathu, nguko ka sotshe ma ni alakanya, mi veketa sileleto kota nga ti ni nga mi gondisisa tona. 3Aniko ni lava ku mi txi ziva ti to: Msungo wa wamwamna ngu Kristu; msungo wa wamsikati ngu wamwamna; se msungo wa Kristu ngu Txizimu. 4Wamwamna wuhi ni wuhi a khongelako mwendo a txhumayelako dipswi da Txizimu a di ambate txo ambala ha msungo, wo thavisa lisima msungo wakwe. 5Se wamsikati, wuhi ni wuhi, a khongelako mwendo a txhumayelako dipswi da Txizimu a sa sunga txilo ha msungo, a thavisa lisima msungo wakwe, nguko wo nga a to yolwa. 6Ngako wamsikati a si ti fenengeti msungo, a na yolwe ni yona misisi. Se ngako i di tingana kuyolwa misisi, ku laveka a txi ti fenengeta msungo. 7Wamwamna kha faneli ku ti fenengeta msungo, nguko ene njifaniso ni txipfaliso txa Txizimu, kasi wamsikati njipfaliso txa wamwamna. 8Wamwamna kha thaviswa ngu ka wamsikati, aniko wamsikati ngene a nga thaviswa ngu ka wamwamna. 9Wamwamna kambe kha mahelwa wamsikati, aniko wamsikati ngene a nga mahelwa wamwamna. 10Ngu toneto, wamsikati a na ambale ha msungo kwakwe txikombiso txa ku ti veka hahatshi, ngu mhaka ya tingelozi. 11Hambi keto, masoni ka Txizimu, wamsikati hi nga txilo hahanze ka wamwamna, nene wamwamna hi nga txilo hahanze ka wamsikati. 12Ngukusa, kufana ni kuwa wamsikati a nga thaviswa ka wamwamna, kufana ni toneto wamwamna nene a velekwa ngu wamsikati, se votshe va huma ngu ka Txizimu. 13Lamulani mipune: Ina ti ni fanelo ti to wamsikati e khongela ka Txizimu a sa ambala txilo ha msungo, kani? 14Ina wona mtumbuluko kha wu mi gondisi ti to wamwamna, ngako a txi fuya misisi yo lapha, ta m'thavisa lisima, kani? 15Aniko wamsikati, a txi leka misisi yi txi kula, ti m'ninga lisima, ngukusa a ningilwe misisi yo lapha kasiku yi maha txifenengelo txakwe. 16Aniko kungako mthu a txi lava kuphikiza, athu kha hi nga ni txiheno txo ngeto, hambi mabanza a Txizimu ni ona kha ma nga natxo. 17Ngako ni txi womba tiya, kha ni na ku mi dhumisa ka timhaka ta misengeletano yanu, yi tumbulukisako to biha ngutu kupinda to mi vhuna. 18Kukhata, ni engisa ti to, mbimo yi mi tshanganako, ku ni mibango hagari kwanu; kambe eto na ti tumela kudotho. 19Ta laveka ti to hagari kwanu ku txi va ni mibango, kufela ku va txi woneka ava i ku vavanene ngu ditshuri. 20Ngu nzila yo nga toneto, mbimo yi mi sengeletanako, kha mi sengeletaneli kudya txilalelo txa Mkoma, 21ngukusa mmweyo ni mmweyo kwanu wo tutumela kudya txilalelo txakwe; se vamwane va zumba ni nzala, na vamwane va di khuri. 22Ina kha mi nga ni tinyumba to dyela ka tona ni kuselela kona, kani? Mwendo mo eyisa Dibanza da Txizimu, mi txi lava kuthela tingana avale va ku singa naso, kani? Ni na mi gela ta txani? Ina ni na mi dhumisa, kani? Lambi! Keto kha ni na ku mi dhumisa! 23Kha ditshuri ni ti amukete ka Mkoma timhaka ti ni nga tshumela ni txi mi ninga nanu, ti ta ku: Mkoma Jesu, ka wusiku wu a nga ningelwa ngu wona, a tekile dipawu; 24se a di bongile, a to di bhanda, a txi khene: “Asiya i mmidi wangu awu wu no ningelwa ngu kota yanu; mahani tonatiya, mi na ni alakanya ngu tona.” 25A txi mahisa toneto, msana ka kulalela, a to teka digombe, a txi khene: “Digombe diya njitumelelano txa txiphya txi mahwako ngu mnoha wangu. Sotshe sikhati si mi no sela digombe diya, mi na ti mahela ku ni alakanya.” 26Ngu kota yeto, txikhati txihi ni txihi mi dyako dipawu diya ni kusela digombe diya mi huwelela lifo la Mkoma kala kuwuyani kwakwe. 27Ngu toneto, wuhi ni wuhi a dyako dipawu diya kumbe kusela digombe diya, na a singa ni fanelo, a ni mnandu ka mmidi ni mnoha wa Mkoma. 28Mthu ni mthu a na ti xole ene apune, se ngu kona a no dya dipawu diya, ni kusela digombe diya. 29Awule a dyako ni kusela a si pimisi mmidi wa Mkoma, wo ti dyela ni ku ti selela txiabaniso txakwe apune. 30Ngu toneto, hagari kwanu ku ni vo ti bikabika, ni valwali, ni vamwane vo tala va fite. 31Idiku ho ti xola hipune, nga hi si lamulwi; 32aniko, hi txi lamulwa ngu Mkoma, ha tsayiswa kufela ku hi si abaniswi kumweko ni ditiko. 33Ngu toneto, vanathu, mbimo yi mi mahako msengeletano wa kudya txilalelo txa Mkoma, verelanani. 34Ngako wo kari a di ni nzala, a na dye mtini kwakwe, kasiku mi si tshanganeli ku abaniswa kwanu. Timwane ti nga sala, na ta ti lamula, mbimo yi ni no ta kheyo.

will be added

X\