1 VAKORINTO 10

1Vanathu, kha ni ti lavi ku mi sisela ati ta ku votshe vatate vathu va ve hahatshi ka direfu ni ti ta ku votshe va tshawunyetile linene. 2Votshe va bhabhatisilwe ngu ka Mosi, amu ka direfu ni mu ka linene. 3Votshe va dyite sakudya simweso sa moya, 4futsi kambe votshe va sete sakusela simweso sa moya; kunene votshe va titi sela ka dirigwi da moya, adi di nga ti va londetela. Dirigwi diya i ti Kristu. 5Hambi keto, vavangi va kona kha va tsakisa Txizimu, se ngu kota yeto va lovisilwe txiwulani. 6Totshe timhaka tiya njikombiso kwathu, kasiku hi si naveli simaha so biha, nga ti ni vona va nga navela. 7Mi nga ti maheni vakhozeli va sizimu sa walo, kufana ni vamwane kwawe, nga tiya ti nga bhalwa va txi: “Vathu va khalahatshile, ve dya, ve sela, ve khukha ve sinya.” 8Hi nga ti ningeleni ka mithumo ya wugelezi, nga ti vamwane ka vona va nga ti maha, se ve wa ngu ditshiku dimwedo makumi mambidi ni mararu a makumi a mazana a vathu (23.000). 9Hi nga dukeni Mkoma, nga vamwane va nga mu duka, se ngu toneto ve fa ngu kulumetelwa ngu minyoka. 10Mi nga ngurangureni, nga ti vamwane kwawe va nga ngurangura, se ve loviswa ngu mlovisi. 11Ngu toneto, sotshe simaha siya si va humelete kasi kumaha txikombiso kwathu, futsi kambe si bhatwe kasi ku hi laya athu hi nga hoka magwito ka timbimo. 12Inna, ngu toneto, awule a pimisako ti to a emekile, a na ti wonele kasiku a si wi. 13Kha mi nzi kuhumelelwa ngu txiduko txa kuhambana ni siduko sa vamwane vathu. Txizimu txi thembekile, kha txi na kutumela ti to mi txi dukwa ngu si si ku txitimwi ka mtamo wanu. Aniko, ngako txiduko txi txi mi tela, a na mi ninga nzila ya kupona ka txona, ni mtamo wa ku txi rwala. 14Ngu toneto, vo randeka ngutu, thavani kukhozela sizimu sa walo. 15Ni wombawomba ni nanu kota nga ti mi ku vathu va mapimo. Ti pimiseni mipune ati ni mi gelako. 16Digombe da kukatekiswa, adi hi di katekisako, ina hi nga ku ti tshanganisa ni mnoha wa Kristu, kani? Ni dona dipawu di hi bhandako, hi nga kona kutshangana ni mmidi wa Kristu, kani? 17Se ngako dipawu i ku dimwedo, hotshethu, hambiko hi ku vangi, hi wumba mmidi wumwewo, nguko hotshe hi abana dona dipawu dile da dimwedo. 18Hingani alakanya va ka Israyeli. Ava va dyako timhamba, ina kha va mani txiavelo txa txiluvelo, kani? 19Ni na womba txani kwanu, kani? Ni na womba ti to nyama ya timhamba ta sizimu sa walo njimaha, kani? Lambi! Aniko, ani ni mi gela ti to timhamba ti ti mahwako ngu vamatiko, va ti mahela madhimoni, kha va ti maheli Txizimu. 20Se ani kha ni ti lavi ti to mi txi sengela ni madhimoni. 21Kha mi na ku si kota kusela digombe da Mkoma kumweko ni digombe da madhimoni. Kha mi na ku si kota kukhalahatsha mi dyela ha mezani ka Mkoma ni ha mezani ka madhimoni. 22Hi lava kuhenyisa Mkoma, kani? Ina hi ni mtamo kupala ene, kani? 23“Totshe ta tumeleleka”, aniko hi nga totshe ti vhunako. “Totshe ta tumeleleka”, aniko hi nga totshe ti akako. 24Mthu a nga lave asi si vhunako ene, a na lave asi si vhunako vamwane. 25Dyanani sotshe si va xavisako bhazara, mi si wotisi txilo ngu mhaka ya livhalo. 26Mafu nga Mkoma ni sotshe si si ku txitimwi ka ona. 27Ngako mi txi dhanwa ngu mmweyo wo va i singa dikholwa, na anu mi txi ti lava kutsula, dyanani sotshe si va mi phamelako; mi si wotisi txilo ngu mhaka ya livhalo. 28Kambe ngako wo kari a txi mi gela ku khene: Asiya i mhamba ya sizimu sa walo, konaho mi nga dyeni ngu mhaka ya eneyo, a nga mi tsunzukisa ni ngu mhaka ya livhalo. 29Se, ni txi womba ngu “livhalo”, ni womba ngu la vamwane, kha ni wombi ngu lanu. Se, i nga va mhaka muni kukhululeka kwangu ku txi lamulwa ngu livhalo la mmwane, kani? 30Ngako ni txi dya sakudya, ni txi bonga ka Txizimu, se ni solelwa txani ngu sakudya si ni nga si bongela kani? 31Ngu toneto, mwendo ma dya, mwendo ma sela, mwendo mi thuma tihi ni tihi, ti maheni ngu moya wa kudhumisa Txizimu. 32Mi nga maheni txiwonho txa kuhumba Vajudha mwendo Vagriki kumbe va Dibanza da Txizimu. 33Gondani ngu ngani, ni zamako kutsakisa votshe ka sotshe, na i singa to lava ku ti vhuna ani nipune, aniko ngu kulava kuvhuna va vangi, kasi ku ve mana kuhanyiswa.


Copyright
Learn More

will be added

X\