1 Nani aˈchintohuachina, Quisosori Capinaomoquë paˈnin. 2 Inaquë aˈna capitan yaˈhuërin. Aˈna piyapinën chiniquën canioton, yachiminin. Huaˈanëni noya nosororin. 3 Quisoso canquirinsoˈ natantahuaton, Cotio ansianoˈsaˈ amatërin. —Paaton, Quisoso shaˈhuitonquëˈ huëˈin piyapinëhuë anoyachinco, itahuaton, aˈparin. 4 Quisosoquë canconahuatonaˈ, nontoonpi. —Huëquëˈ paˈahuaˈ, Sinioro. Pasoˈ capitan amatërinquën. Inasoˈ nisha piyapi niponahuëˈ, nóya quëmapi. Nosororinpoaˈ. Inaora coriquinën quëran niyontonpiso pëiˈ ninin Yosë yonquicaiso marëˈ. Napoaton huëquëˈ piyapinën anoyatëquëˈ, chiminpachin, itopi. 6 Ina natanahuaton, inapitarëˈ paˈnin. Capitan pëinënquë yaˈcaritërahuasoˈ, amiconënpitari nacapipi. Capitani nani aˈparin Quisoso nontacaiso marëˈ. —Capitan shaˈhuitërincoi nonchinquën. “Casoˈ, Sinioro, nontaponquën yapaˈpirahuëˈ. Tapanato, co paˈnahuëˈ. Co casoˈ quëma pochin noyacohuëˈ. Co pëinëhuëquë tërantaˈ yaˈconamasoˈ yaˈhuërinhuëˈ. Topinan nontëquëˈ piyapinëhuë noyachin. 8 Cantaˈ huaˈanëhuë natërahuë. Capitanco niˈto, sontaroˈsaˈ camaihuatëra, natërinaco. Pacoˈ, itohuatëra, paˈpi. Huëcoˈ, itohuatëra, huëˈpi. Piyapinëhuëpitantaˈ camairahuë. Sacatocoˈ, itohuatëra, sacatopi. Napoaton natëranquën. Chiniquën nanantëran niˈton, nontohuatan, aˈnaroachin noyatapon, tënahuë,” tënin capitan, itiipi. 9 Quisoso natanahuaton, nóya cancantërin. Tahuërëtahuaton, piyapiˈsaˈ itërin: —Ma noyacha ina quëmapi natërinco paya. Nisha piyapi niponahuëˈ, Cotioroˈsa quëran noya noya natërinco. Napoaton ca nohuanto, apira miachin piyapinën noyatarin, tënin. 10 Napotohuachina, capitan amiconënpita ayancoantapi. Caniaˈpi nani noyatërin quënanconpi huachi. 11 Tahuëririnquë Quisoso Nainquë paˈnin. Caˈtanoˈsanënpitarëˈ paˈnin. Naˈa piyapiˈsaˈ imasapi. 12 Ninano yaˈcoanaquë yaˈcaritërahuasoˈ, naˈa yaˈhuëhuanoˈsari nacapirapi. Chimipi paˈpitacaiso marëˈ quësapi. Huiˈnapi niponahuëˈ, aˈshin ayananpirin. Aˈshini imasarin. Inaichin huaˈhuin nipirinhuëˈ, chiminin. Soˈiontaˈ iraca ayarin niˈton, saˈahua paiya inasoˈ. 13 Ina quënanahuaton, Quisosori nosororin. —Ama, imoya, naˈnëquësohuëˈ, itërin. 14 Napotahuaton, chimipi acopiquë sëˈhuaconin. Sëˈhuarahuachina, quëparapisopita huaniconpi. Chimipi nontërin. —Huënsëquëˈ, api, itërin. 15 Napotohuachina, nanpiantarahuaton, huënsërin. Ina quëran nonsarin huachi. —Yaˈhuëranquën, imoya, quëpantaquë huachi, itërin Quisosori. 16 Yaˈipi piyapiˈsaˈ nicatonaˈ, paˈyanpi. —Ma noyacha Tata Yosëso paya. Ma noya quëmapi aˈpatimarinpoaˈ pënëinpoaso marëˈ. Nani maˈsha nanitaparin. Yosë co naniantërinpoahuëˈ. Catahuarinpoa huachi, topi. 17 Ananpitërinsoˈ yaˈipi Cotia parti nahuinin. Yaˈipiya natantopi. 18 Coansha imarinsopitantaˈ paatonaˈ, Quisoso naporinsoˈ shaˈhuitonpi. Coansha natanahuaton, yonquiárin. “Quisososoˈ Yosëri aˈpaimarinsoˈ nimara. Pahuanamara aˈnaˈ oˈmacasoˈ,” taˈton, catoˈ imarinsoˈ aˈparin Quisoso natanacaiso marëˈ. 20 Quisoso quënanconpachinara, itaponaˈ: —Coansha Paotista aˈpairincoi natanaˈhuainquënso marëˈ. Quëmasoˈ Cristonquën nimara. Pahuanarin oˈmacasoˈ nimara. Co nitotëraihuëˈ. Shaˈhuitocoi quiyantaˈ nitochii, itërin. 21 Naporoˈ naˈa caniaˈpiroˈsaˈ yaˈhuërin. Nisha nisha caniori maninsopita. Quisosori aˈnaroachin anoyatërin. Sopairi ahuaˈyantërinsopitantaˈ huëˈpachinara, sopai aˈpatërin. Naporahuaton, ina nohuanton, somaraya nininsopitantaˈ niˈtërin. 22 —Niˈcoˈ, iyaroˈsaˈ. Ca nohuanto, somaraya nininsoˈ niˈtërin. Apiaroˈsaˈ aˈnaroachin anoyatërahuë. Noya iratërin huachi. Chana caniori maninsopitantaˈ anoyatërahuë. Nëˈhuëroˈsantaˈ noya anatantërahuë. Chiminpisopita ananpitantarahuë. Notohuaroˈ piyapiˈsaˈ co Yosë nohuitatonahuëˈ, nosorotopirinahuëˈ, noya nanan aˈchintarahuë huachi. Yaˈipi nani niˈnamaˈ, nani natanamaˈ. Paatomaˈ, Coansha shaˈhuitoncoˈ noˈtëquën nitochin. 23 Yaˈipi cancanëma quëran natëhuatamaco, noya cancantarama huachi. Co nisha nisha yonquiamacosoˈ yaˈhuërinhuëˈ, itërin Quisosori. 24 Ina natanahuatonaˈ, Coansha shaˈhuitaponaˈ paˈpi. Nani paantahuachinara, Quisosori aˈchiantarin. —Coansha naporinsoˈ aˈchinchinquëmaˈ. Iˈhua canpitasoˈ Coansha nicapomaˈ paˈnamaˈ. Co piyapi yaˈhuërinquëhuëˈ paˈnamaˈ. Co inasoˈ nisha nisha yonquirinhuëˈ. 25 Co noyapiachin aˈmorinhuëˈ. Noyapiachin aˈmopisopita huaˈan pëiroˈsaquë yaˈhuëpi. Coanshasoˈ nipirinhuëˈ co nani maˈsha yaˈhuëtopirinhuëˈ. 26 Pënëntërinsoˈ natanacaso marëˈ paˈnamaˈ. Coansha tëhuënchachin nóya pënëntërin. Co topinan quëran pënëntërinhuëˈ. Yosëri chachin aˈparinsoˈ. 27 Iraca quiricanënquë ninorin. “Coˈhuara Cristo aˈpaimayatërasohuëˈ, comisionëhuë pochin nininsoˈ aˈpararahuë. Paaton, pënëntapon Cristo noya natanacaiso marëˈ,” tënin Yosë. Coansha ninoton, naporin. 28 Iraca quëra huarëˈ naˈa piyapiˈsaˈ pënëntopirinahuëˈ, Coansha Paotistasoˈ noya noya pënëntërin. Pënëntërinsoˈ, iyaroˈsaˈ, noya. Nipirinhuëˈ, inquëma tërantaˈ imapatamaco, noya noya nisaramaˈ. Yosë huëntonënquë chachin ayaˈconanquëmaˈ, tënin Quisoso. 29 Nani naˈa piyapiˈsari Coansha noya natanpi. Coriqui maˈpanaˈpiroˈsantaˈ “Yosë noninsoˈ noˈtëquën pënëninpoaˈ,” taˈtonaˈ, aporihuanpi. 30 Yaˈhuërëˈ Parisio piyapiˈsasoˈ co nohuantopihuëˈ. Coansha noˈtëquën pënëntopirinhuëˈ, co huachi nohuantopihuëˈ Yosë pochin cancantacaisoˈ. Napoaton co aporihuanpihuëˈ. Cotio maistroˈsantaˈ co yanatëpihuëˈ. 31 Ina yonquiaton, Quisosori itërin: —Iporasoˈ piyapiˈsaˈ nisha nisha yonquipi. ¿Maˈ pochinsona cancantomaraiˈ? 32 Huaˈhuaroˈsa pochin cancantonpi, tënahuë. Huaˈhuaroˈsaˈ caniquë yaˈnipihuachinaˈ, ninoˈhuipi. Aˈnaquën taponaˈ: “Huëcoˈ pita pochin niˈtëhuaˈ yaˈnipiahuaˈ,” taˈtonaˈ, quinatopirinahuëˈ, co aˈnapita nohuantopihuëˈ nansacaisoˈ. Ina quëran tantaponaˈ: “Inta nipachin, huëcoˈ, chimipi pochin niˈtëhuaˈ yaˈnipiahuaˈ,” nitantapi. Ayapirinahuëˈ, co aˈnapitasoˈ nohuantopihuëˈ ayacaisoˈ. 33 Inapochachin ipora nisha nisha yonquiramaˈ. Coansha Paotistasoˈ huëˈpachina, co aquëtëˈ cosharoˈ yonquirinhuëˈ. Co noya coshatërinhuëˈ. Co piˈpian tërantaˈ huino oˈorinhuëˈ. Napopirinhuëˈ, “Inasoˈ huaˈyantaton, naporin,” toconamaˈ. 34 Ina quëran casoˈ Yosë quëran quëmapico niˈto, coshatërahuë, oˈorahuë. Ina marëˈ pinoramaco. “Quisoso coshatárin. Oˈopatárin. Oshahuanoˈsarëˈ nipayarin,” toconamaˈ. Nisha nisha yonquiconamaˈ. 35 Aˈnaquënsoˈ nipirinhuëˈ, noya yonquiatonaˈ, Yosë natëapi huachi. Pënëntërahuësoˈ natanahuatonaˈ, noˈtëquën yonquiapi huachi, tënin Quisoso. 36 Ina quëran aˈna Parisio quëmapiri Quisoso amatërin. —Pëinëhuëquë huëquëˈ coshatahuaˈ, itërin. Itohuachina, paˈnin. Pëinënquë yaˈconconahuaton, misaquë huënsëconin. 37 Aˈna sanapi natantahuaton, inaquë paˈnin. Inasoˈ oshahuanaˈpi, topisoˈ. Pimo huaˈsaiˈ potiriaˈhuayaquë quënin. 38 Quisoso yaˈyoranconahuaton, oshanën marëˈ sëtaton, naˈnërin. Naˈnëhuachina, naˈnëiˈ Quisoso nantën huiˈshitërin. Ainën quëran amirantërahuaton, apinorantërin. Ina quëran pimo huaˈsaiquë pashirantëtërin. 39 Ina niˈsahuaton, pëiˈ huaˈanën co noyahuëˈ niˈnin. Inaora yonquinën quëran yonquirarin. “Quisoso nitoninorin naporini, iso sanapi nohuichitonhuëˈ. Oshahuan niˈton, co sëˈhuacasoˈ nohuanchitonhuëˈ,” tënin yonquiaton. 40 Yonquirinsoˈ nitotaton, Quisosori itërin: —Iya Simon, piˈpian yashaˈhuitëranquën, itërin. —Inta, Maistro, shaˈhuitoco, itërin. 41 —Catoˈ quëmapi yaˈhuëpirinhuëˈ. Cato chachin patron nihuirin. Aˈnasoˈ aˈnatërapo huaranca nihuitërin. Aˈnasoˈ aˈnatërapo pasaichin nihuitërin. 42 Capa coriqui pahuërëtacasoˈ niˈton, cato chachin nihuitërinsoˈ ayatërin. Topinan ayatërin. ¿Insoaritaˈ patronën naˈcon naˈcon nosororin? ¿Maˈtaˈ quëma yonquiran? itërin Quisosori. 43 —Naˈcon naˈcon ayatërinsoˈ naˈcon naˈcon nosororin, topirahuëˈ, tënin. —Ina mini. Noˈtëquën yonquiran, tënin. 44 Ina tosahuaton, sanapi tasatahuaton, Simon itërin: —Iso sanapi niˈquëˈ. Quëma pëinënquë yaˈconpirahuëˈ, co iˈsha tërantaˈ quëtërancohuëˈ paˈmorantëcaso marëˈ. Iso sanapisoˈ nipirinhuëˈ naˈnëinën quëran paˈmorantërinco. Ainën quëran amirantërinco. 45 Canquipirahuëˈ, co iporancohuëˈ. Iso sanapisoˈ nipirinhuëˈ apinorantërinco. 46 Niˈtoroˈsaˈ huëˈpachina, tomaquë pashimototacasoˈ yaˈhuëpirinhuëˈ, quëmasoˈ co pashimototërancohuëˈ. Co huaˈan pochin niˈnancohuëˈ. Iso sanapisoˈ nipirinhuëˈ nóya nicatonco, pimo huaˈsaiquë pashirantëtërinco. 47 Tëhuënchachin naˈcon oshahuanaponahuëˈ, oshanën inquitarahuë huachi. Napoaton naˈcon naˈcon nosororinco, tënahuë. Aˈnaquënsoˈ nipirinhuëˈ, “Co aquëtëˈ oshahuanahuëˈ,” taponarahuëˈ, co onpopinchin nosororinacohuëˈ, tënin. 48 Ina quëran sanapi itantarin: —Oshanën, imoya, inquitaranquën huachi, itërin. 49 Aˈnapita natanahuatonaˈ, ninontopi. —¿Ma quëmapitaˈ isosoˈ? Oshanën inquitacasoˈ nanitërin, ¿ti? nitopi. 50 Quisososoˈ nipirinhuëˈ sanapi itërin: —Natëranco niˈton, nichaˈëranquën. Noya paquë huachi, itërin.
