TITO 3

1Tunu atore bairo na mi quetibu̶ju̶ masĩõnemowã tũ̶gou̶sari majã ñubueri majãrẽ: “Quetiupau̶, o quetiuparã carotimasĩrã mu̶jãã ya macã macããna na caátirotinucũrõrẽ bairo cariape na tũ̶gou̶saya. Bairo caroaro cariape tũ̶gou̶sari tocãnacã wãme caroa macããjẽrẽ caátiãniganucũrãrẽ bairo mu̶jãã átiãnimasĩwã. 2Bairo caátiãnimasĩrã ãnirĩ yua aperã camasãrẽ roro na mu̶jãã ĩ bu̶su̶paiepa. Carorijere camasãrẽ caátiãmepairãrẽ bairo ãmerĩcõãña. Carorije caĩẽna camasã cañurãrẽ bairo ãña. Aperã camasã nipetirore caroaro yeri ñurĩqũẽ mena, yerijõrõ ãmeo bapacu̶timasĩña,” na mi quetibu̶ju̶wa ñubueri majãrẽ. 3Marĩ cũ̶ã, mai, cajũ̶goyepu̶re catũ̶gomasĩẽna, Diore cabaibotiopairã majũ marĩ ãmu̶. Camawijiayasirãrẽ bairo marĩ baiwu̶. Bairo caãna ãnirĩ yua, tocãnacã wãme roro marĩ rupau̶ mena marĩ caátiganucũrĩjẽrẽ caátiecorotirã, tiere caátijãnagaena majũ marĩ ãnimiwũ̶. Carorije macããjẽ jetore átiri aperã yayere marĩ ĩñau̶garipeanucũmiwũ̶. Tunu caasiapairã ãnirĩ aperã tocãnacãũ̶ mena marĩ ãmeo asiaĩña ãninucũmiwũ̶. 4Bairo cabairã marĩ caãnimiatacũ̶ãrẽ, Dios marĩrẽ canetõõũ̶ pu̶ame cañuu̶, caĩñamaimasĩ ãnirĩ ati yepa macããna camasãrẽ marĩ ĩñamaiñupĩ. 5Bairo ĩñamairĩ, marĩ cũ̶ãrẽ marĩ netõõñupĩ marĩ carorije wapa jũ̶gori roro marĩ cabaibujiopeere. Marĩ majũ caroaro marĩ caátiere ĩñajesori mee, Dios pu̶ame roque marĩrẽ ĩñamairĩ marĩ netõõñupĩ. Jesucristo yucu̶pãĩpu̶ cũ̶ cariírerique mena, marĩ carorije wapare coseire bairo cũ̶ caáto tunu cabuianemorãrẽ bairo marĩ cabairoi marĩ netõõñupĩ. Bairo marĩ netõõrĩ yua, Espíritu Santo cũ̶ Yeri jũ̶gori cawãma yeri marĩ wasoayupi. 6Tunu bairoa Jesucristo marĩrẽ canetõõrĩcũ̶ jũ̶gori, nocãrõ netõrõ cũ̶ Yeri Espíritu Santo cũ̶ caátimasĩrĩjẽrẽ marĩ joyupi. 7Bairo marĩ átiri, cũ̶ yarã carorije cawapa mánarẽ bairo marĩ ásupi cañuu̶ majũ ãnirĩ. Tore bairo marĩ ásupi Dios, marĩ cũ̶ã yeri capetietie marĩ cũ̶ cajorique marĩ cacoteãnierẽ marĩ cacũ̶gomasĩparore bairo ĩ. 8Atie, yu̶ caquetibu̶ju̶rije cariape niña. Torecu̶ tiere, tocãnacãnia ñubueri majãrẽ na mu̶ caquetibu̶ju̶nucũrõ yu̶ boya. Bairo tocãnacãnia na mu̶ caquetibu̶ju̶ro yua, Diore catũ̶gou̶sarã pu̶ame caroa macããjẽ átaje ũnie jetore átiãnimasĩgarãma. Atie mu̶rẽ yu̶ caĩquetibu̶ju̶rije cañurĩjẽ caroa macããjẽ quetibu̶ju̶rique, camasã caroaro na caátiãnipee ũnie majũ niña. 9Bairi cabu̶goro macããjẽ ũnie jũ̶gori ãmeo bu̶su̶rique netõẽtĩcõãña. Na ñicũ̶jãã yaye macããjẽ na camasĩrĩjẽ ũnie jũ̶gori ãmeo bu̶su̶rique netõẽtĩcõãña. Tunu bairoa Moisés ãnacũ̶ cũ̶ caroticũrĩqũẽ jũ̶gori roro ãmeo tutiri bu̶su̶rique netõẽtĩcõãña. Tie dope bairo camasãrẽ caáperie, dope bairo cariape caátimasĩã manie ũnie niña. 10Tunu bairi ni jĩcãũ̶ ũcũ̶ Jesucristore catũ̶gou̶sari majãrẽ caroaro na ãnimasĩẽtĩõ joroque caátiricawou̶ cũ̶ caãmata, jĩcãni, o pu̶gani cãrõ cũ̶ beyoya. Bairo mu̶ cabeyomiatacũ̶ãrẽ, mu̶ caĩrĩjẽrẽ cũ̶ cabotiocõãmata, cũ̶ wiyocõãña ñubueri majã menarẽ. 11Merẽ tore bairo cũ̶ átiri mu̶ masĩña roro cũ̶ caátigarijere, cũ̶ caborore bairo cũ̶ caátiganucũrĩjẽrẽ. Bairo cũ̶ majũã roro cũ̶ caátie jũ̶gori roro popiye cũ̶ tãmu̶o joroque cũ̶ átigu̶mi Dios. 12Tito, yu̶ yau̶, apeyera atore bairo mu̶ ñiña: Artemas o Tíquicore mu̶ tu̶pu̶ cũ̶ yu̶ jogu̶. Bairi mu̶ tu̶pu̶ cũ̶ caetaro bero yua tãmurĩã, dope bairo mu̶ caatímasĩrõ mena Nicópolis macãpu̶ yu̶ mu̶ bocáu̶ atímajũgu̶. Yu̶ pu̶ame ti macãpu̶ puere yu̶ netõgu̶, ñi tũ̶goña yaparoya. Bairi ti macã Nicópolipu̶ yu̶ ãnigu̶ ti yu̶teare. 13Bairi apeyera camasãrẽ caju̶ĩĩ, Zenas, apei Apolos cawãmecu̶narẽ mu̶ caju̶átimasĩrõ cãrõ na ju̶átinemoña. Quetibu̶ju̶ñesẽãrã na cacũ̶gopee na cabopacarije cãrõ na ju̶átinemoña, jĩcã wãme ũno na cañesẽãrõpu̶ to ru̶saeticõãto ĩ. 14Marĩ mena macããna cũ̶ãrẽ caroa átaje, caroaro ãmeo ju̶átinemomasĩrĩqũẽrẽ na mu̶ quetibu̶ju̶wa. Bairo mu̶ caáto, na cũ̶ã aperãrẽ na caju̶átiparã ũnarẽ na ju̶átinemomasĩgarãma. Marĩ quetiupau̶ caãnimajũrĩjẽ cũ̶ caátigarijere caátibojaparã majũ tuagarãma. Tore bairo na mu̶ caápata. 15Nipetiro yu̶ mena ato caãna mu̶rẽ ñurotijoyama. Marĩrẽ bairo Jesucristore catũ̶gou̶sarã ãnirĩ marĩ yarãrẽ bairo caãna to macããna na ñuáto. Bairi caroare cũ̶ jonemoáto marĩ Pacu̶ Dios mu̶jãã nipetirore. Tocãrõã niña atie queti yu̶ cawoaturije.

will be added

X\