TITO 2

1Mu̶ roque Tito, camasãrẽ caroaro cariape na mu̶ quetibu̶ju̶gu̶ caroa macããjẽ Dios yaye quetire. Dios cũ̶ caborore bairo caroaro na mu̶ quetibu̶ju̶gu̶. 2Bairi cabu̶toa camasãrẽ cajũ̶goñubueparã pu̶ame cũ̶ã caroaro caãna, marĩ caĩñanu̶cũ̶bu̶gorãrẽ bairo nigarãma. Bairo cariape caána ãnirĩ caroaro mena quetibu̶ju̶garãma camasãrẽ. Tunu bairoa caroaro cariape roro átato mano Dios mena tũ̶goñatutuagarãma. Tunu bairoa Dios narẽ cũ̶ camairĩjẽrẽ masĩrĩ caroaro tutuaro, popiye baimirãcũ̶ã, tũ̶goñaenarẽ bairo tiere tũ̶goñanetõcõãgarãma. 3Torea bairo cabu̶toa rõmirĩ cũ̶ã nu̶cũ̶bu̶gorique mena na caãnajẽcu̶to yu̶ boya. Roro caĩbu̶su̶paicoterã ãnirĩ caeticũmupairãrẽ bairo na caãno yu̶ boetiya. Aperã camasã na caátiere na caĩñajesopee ũnierẽ na na caáti ĩñorõ ñuña. 4Bairo caroa macããjẽrẽ caáti ĩñorã ãnirĩ aperã cawãmarã rõmirĩ camanapũ̶ãcu̶narẽ na manapũ̶ã, bairi na pũnaa cũ̶ãrẽ na camaipee ũnierẽ na na quetibu̶ju̶áto. 5Tunu caroa macããjẽrẽ na caátiãnimasĩpeere na na quetibu̶ju̶áto. Bairo na caáto, na pu̶ame ñe ũnie carorijere áperã nigarãma. Na wii macããjẽ, o na pũnaa cũ̶ãrẽ caroaro na cotegarãma ñe ũnie ru̶saricaro mano. Camasã cañurã rõmirĩrẽ bairo caãna, na manapũ̶ã na caĩrĩjẽrẽ jĩcãrõ tũ̶ni caroaro catũ̶gou̶sarã nigarãma. 6Torea bairo cawãmarã canu̶moa mána cũ̶ãrẽ caroaro nu̶cũ̶bu̶gorique mena na ãnio joroque na quetibu̶ju̶ya. 7Mu̶ majũ cũ̶ã aperã camasã, nipetirije mu̶ caátiere na caĩñajesopee ũnierẽ na áti ĩñoña. Tunu bairoa narẽ mu̶ caquetibu̶ju̶ri rũ̶mu̶ caãno, rorije ĩrĩcãrõ mano caroaro nu̶cũ̶bu̶gorique mena na mu̶ quetibu̶ju̶wa. 8Caroaro cariape carorije ĩ asuricaro mano na mu̶ quetibu̶ju̶gu̶, aperã cañuena mu̶rẽ roro na caáperiparore bairo ĩ. Tunu bairoa caroaro cariape mu̶ caquetibu̶ju̶rijere tũ̶goñabobori, ni jĩcãũ̶ ũcũ̶ mu̶rẽ roro ĩ bu̶su̶gamicũ̶ã, carorije mu̶ caĩrĩjẽrẽ bocaetiri roro mietigu̶mi. Bairi roro bu̶su̶paietigarãma yua marĩ caquetibu̶ju̶rije Dios yaye quetire. 9Tunu torea bairo caroaro na mu̶ quetibu̶ju̶wa ũ̶mu̶a paacoteri majãrẽ: Na quetiuparã na caĩrõrẽ bairo caroaro na tũ̶gou̶saáto. Camasã caroaro ãnajẽ cu̶tajere bairo cañurã na ãmarõ. Na quetiuparãrẽ tũ̶gou̶saetiri na caĩrĩjẽrẽ cabu̶su̶cãnamupairãrẽ bairo na ãmerĩcõãto. 10Tunu bairo aperã, na quetiuparã na cacũ̶gorije ũnierẽ cayajapairã na ãmerĩcõãto. Caroaro nu̶cũ̶bu̶gorique mena roque na ãnimajũcõãto. Bairo na yeripu̶ na caátiãnimajũcõãta, nipetiro camasã pu̶ame narẽ ĩñarĩ, Dios marĩrẽ canetõõrĩcũ̶ yaye quetire, “Caroa majũ niña,” ĩ masĩgarãma. 11Dios pu̶ame jĩcã nu̶gõã marĩrẽ camaimasĩ ãnirĩ marĩ ĩñamaijũ̶goyupi. Bairo marĩ ĩñamairĩ nipetiro ati u̶mu̶recóo macããnarẽ marĩ netõõgayupi cũ̶ macũ̶ jũ̶gori. 12Tie marĩrẽ Dios cũ̶ caĩñamaijũ̶gorique pu̶ame roro marĩ caátiãninucũrĩjẽrẽ jãnarĩ caroaro átiãnajẽ cu̶taje niña. Tunu bairoa marĩ cabonucũrõrẽ bairo roro marĩ caátiere jãnarĩ caroaro nu̶cũ̶bu̶gorique mena Dios cũ̶ caĩñajoro marĩ caãno ñuña. Bairo átiãna yua, Dios cũ̶ caborore bairo cariape marĩ ãnimasĩgarã. Diore cariape cũ̶ marĩ tũ̶gou̶sagarã. 13Dios yaye queti pu̶ame cũ̶ caĩjũ̶goyeticũrĩcãrõrẽã bairo cũ̶ caátipa rũ̶mu̶ caetaro, marĩrẽ canetõõũ̶ Jesucristo nocãrõ cũ̶ caasiyabatorije mena cũ̶ caatípa rũ̶mu̶rẽ caroaro marĩ cotemasĩõ joroque marĩ átiya. 14Cũ̶, Jesucristo pu̶ame marĩ yaye wapa jũ̶gori yucu̶pãĩpu̶ papuatuecori riayupi. Nipetirije marĩ carorije wapa caãnierẽ marĩ netõõpeyobojari, cũ̶ yarã caãniparã majũ marĩ ãnio joroque marĩ ásupi. Caroa macããjẽrẽ caátiãnimasĩgarã majũ marĩ tuao joroque marĩ ásupi. 15Atie yu̶ caĩquetibu̶ju̶rijere na mu̶ quetibu̶ju̶gu̶ to macããna ñubueri majãrẽ. Caroaro rotimasĩrĩqũẽ mena tutuaro na mu̶ quetibu̶ju̶nemomasĩõgu̶ to macããnarẽ, caroaro na camasĩparore bairo ĩ. Ni jĩcãũ̶ ũcũ̶ mu̶rẽ cũ̶ baibotioeticõãto mu̶ caquetibu̶ju̶rije mena jũ̶gori.

will be added

X\