TITO 1

1Yu̶, Pablo cawãmecu̶cu̶ Diore paabojari majõcu̶ ãnirĩ Jesucristo camasãrẽ cũ̶ caquetibu̶ju̶rotijou̶ apóstol majũ yu̶ ãniña. Dios cũ̶ cabesericarã cũ̶ yarãrẽ na quetibu̶ju̶ yu̶ átiya cũ̶ yaye quetire, tie cariape macããjẽrẽ tũ̶gori bero yua, cũ̶ mena caroaro na catũ̶goñatutuaparore bairo ĩ. 2Bairo tie mena tũ̶goñatutuari yua, yeri capetietie na cacũ̶gopee cũ̶ãrẽ cariapea tũ̶goñacotegarãma. Mai, Dios cariape caĩ pu̶ame ati u̶mu̶recóo caãniparo jũ̶goyepu̶a, “Yu̶ pũnaa caãniparãrẽ yeri capetietiere na yu̶ jogu̶,” ĩ jũ̶goyeticũñañupĩ. 3Bairi ãmerẽ yua, cũ̶ ya yu̶tea, cũ̶ caĩcõñarĩcã yu̶tea caetaro ĩñarĩ, Dios marĩrẽ canetõõũ̶ majũ, cũ̶ yaye quetire marĩ masĩõñami. Bairo tie quetire masĩõrĩ, yu̶ quetibu̶ju̶ rotijomajũcõãwĩ yua. 4Mu̶, Tito, yu̶ caquetibu̶ju̶rijere tũ̶gori bero yu̶rea bairo mu̶ cũ̶ã Dios mena catũ̶goñatutuau̶, yu̶ baire bairo caãcũ̶rẽ mu̶ yu̶ woajoya ati cartare. Bairi ñiña: Marĩ Pacu̶ Dios, cũ̶ macũ̶ marĩ Quetiupau̶ Jesucristo mena caroa yericu̶taje, ãmeo ĩñamairĩqũẽ, yerijõrõ ãnajẽ cu̶tajere mu̶ cũ̶ jonemoáto, ñiña. 5Creta cawãmecu̶ti poa yucu̶poapu̶ mu̶ yu̶ cũwũ̶. Bairo mu̶ cũrĩ, paarique yu̶ caátipee caru̶sarijere mu̶ yu̶ átipeyorotiwu̶. Tunu bairoa, “Ñubueri majã quetiuparã rona cabu̶toare na mu̶ besewa tocãnacã macãã macããnarẽ caquetibu̶ju̶parãrẽ,” mu̶ ñicũwũ̶. 6Mai, na, cabu̶toa camasĩrã pu̶ame caroaro ñe ũnie roro na caátie jũ̶gori aperã na cabu̶su̶paiena ũnarẽ na mu̶ besegu̶. Tocãnacãũ̶pu̶a jĩcãõ jeto canu̶mocu̶na ũnarẽ na mu̶ besegu̶. Bairi na pũnaa ũna cũ̶ã Jesucristore catũ̶gou̶sarã, ñe ũnie roro na caátie, o na caasiapairije jũ̶gori na cabu̶su̶jãrã ũna mee na ãmarõ. 7Bairi ñubueri majãrẽ cajũ̶goñubuejũ̶gou̶re bairo catuau̶ pu̶ame, na ñubueri majãrẽ Dios cũ̶ carotirije cũ̶ yaye quetire caquetibu̶ju̶ majũ niñami. Torecu̶, cũ̶ ũcũ̶ pu̶ame caroaro átajere caácu̶, rorije caápei ũcũ̶ cũ̶ caãno ñuña. Caroarã ũnarẽ na marĩ boya. Catũ̶gomasĩẽna, uwarãrẽ bairo caãnarẽ na marĩ boetiya. Tunu bairo eticũmurĩ caãmeo qũẽpairã ũna cũ̶ãrẽ na marĩ boetiya. Tunu apeyera roro átiri cawapatarã ũna cũ̶ãrẽ na marĩ boetiya. Bairi na ũnarẽ na mu̶ beseetigu̶. 8Bairo pu̶ame caãna roque ñuñama: Tocãnacãnia aperã caetarãrẽ caroaro mena na bocári na ya wiipu̶ caqũẽnorã ñuñama. Bairi na ũcũ̶ pu̶ame caũ̶mu̶ caroa macããjẽrẽ caácu̶, nu̶cũ̶bu̶goro mena caãcũ̶ cañuu̶ niñami. Bairi Dios cũ̶ caĩñajoro, cũ̶ caborore bairo jeto caácu̶ ñe ũnie roro caápei nigu̶mi. 9Bairi tunu cariape macããjẽ jãã caquetibu̶ju̶riquere cariape cũ̶ catũ̶gou̶saro ñuña. Bairo cariape tiere tũ̶gori yua, aperã ñubueri majãrẽ na quetibu̶ju̶ u̶seanionemogu̶mi cariape quetibu̶ju̶rique mena. Tunu bairoa aperã tiere catũ̶gou̶sagaena ricaati caquetibu̶ju̶rã cũ̶ã caroaro cariape cũ̶ caquetibu̶ju̶ro tũ̶gori, “Caroaro cariape ĩñami. Cũ̶ marĩ tũ̶goroa,” ĩ tũ̶goñagarãma na yeripu̶. Na ũna roquere mu̶ cabesero ñuña. 10To mu̶ caãnopu̶re capããrã niñama cabaibotiopairã. Na ũna pu̶ame na rupau̶ macããjẽ yisetariquere, aperã cayiseta mánarẽ na cayiserotiro bu̶tioro bonucũñama. Caroaro tũ̶goñarĩ mee roro apeye ũnierẽ bu̶su̶painucũñama. Bairo bu̶su̶ri yua, aperã camasãrẽ roro na ĩtoeperã átiyama. 11Na ũna caĩtopairãrẽ na caquetibu̶ju̶rotietipee niña camasãrẽ. Pajũ̶goro ána átiyama tocãnacãũ̶pu̶a camasã caãnarẽ. Tunu bairoa na, camasãrẽ na ĩtori, roro átiwapatarã átiyama. Na ũna caquetibu̶ju̶rãrẽ boetirotiya. 12Mai, Creta yucu̶poa macããcũ̶ profeta majõcu̶ atore bairo ĩ bu̶su̶yupi, to mu̶ caãno macããnarẽ: “Creta yucu̶poa macããna caĩtopairã niñama. Macãnu̶cũ̶ macããnarẽ bairo cau̶gapacarã, cateeyepairã majũ niñama,” cũ̶ caĩcũrĩqũẽrẽ yu̶ tũ̶gowu̶. 13Cariapea ĩñupĩ. Na cabainucũrĩjẽrẽ ĩñarĩna, tore bairo cariape na ĩ, ĩñupĩ. Bairi to macããnarẽ tutuaro mena na quetibu̶ju̶ya. Dios yaye quetire nemojãñurõ caroaro jĩcãrõ tũ̶ni na catũ̶goñatutuamasĩparore bairo ĩ. 14Tunu bairoa, “Judío majã cariape macããjẽ quetire caboena na majũ na catũ̶goñarĩjẽ mena na caquetibu̶ju̶rijere na caátirotinucũrĩjẽ ũnie cũ̶ãrẽ camasã tũ̶gou̶sarema,” ĩrã, tutuaro mena na ũnarẽ na quetibu̶ju̶ya. 15Noa ũna caroa macããjẽ átaje jetore caátitũ̶goñarã na caãmata, nipetirije na caátie, cañurĩjẽ jeto ninucũña. Aperã caroa macããjẽrẽ catũ̶goñaena Diore catũ̶gou̶sagaena pu̶ame roque nipetirije carori wãme jetore átiãninucũñama. Na ũna carorije na yeri na catũ̶goñarĩjẽpu̶ pairo caãno jũ̶gori carorije jetore átinucũñama. 16Bairi tunu, “Diore camasĩrã majũ jãã ãniña,” ĩmirãcũ̶ã, roro na caátie jũ̶gori Diore camasĩẽnarẽ bairo tuanucũñama. Cabaibotiopairã, aperã yaye na cacũ̶gorije ũnierẽ caĩñau̶gopairã majũ niñama. Bairo caãna ãnirĩ dise ũnie caroa macããjẽ ũnierẽ petoaca ũno caátijĩãtiena majũ ninucũñama.

will be added

X\