ROMANOS 8

1Bairi Dios pu̶ame noa ũna Jesucristo mena caãnarẽ, “Mu̶jãã buicu̶tiya,” di rũ̶mu̶ ũno na ĩreetigu̶mi. 2Jesucristo jũ̶gori Espíritu Santo cawãma yeri catiriquere cajou̶ pu̶ame roro marĩ caátaje wapare cabuicu̶perãrẽ bairo marĩ ãnio joroque marĩ ásupi. Tunu bairoa peeropu̶ marĩ cayasirábujiopee cũ̶ãrẽ marĩ netõõñupĩ. 3Marĩã, rorije caátiãninucũrã marĩ caãno jũ̶gori, Moisés ãnacũ̶ cũ̶ caroticũrĩqũẽrẽ marĩ caátipeyomasĩpee mañupã. Tie roticũrĩqũẽ jũ̶gori marĩ carorije wapare marĩ canetõmasĩẽtĩmiatacũ̶ãrẽ, Dios pu̶ame roque marĩ carorije wapare netõõgu̶, cũ̶ macũ̶rẽ ati yepapu̶ cũ̶ joyupi. Cũ̶ macũ̶ pu̶ame marĩ roro caátipairã marĩ carupau̶cu̶torea bairo ati rupau̶ cacũ̶gou̶ ãñupĩ. Ti rupau̶ mena riari marĩ carorije wapa caãnierẽ merẽ reepeyocõãñupĩ. 4Tore bairo marĩ ásupi Dios, cũ̶ camasĩõrĩjẽ jũ̶gori marĩ pu̶ame cũ̶ carotirore bairo marĩ caátipeyomasĩparore bairo ĩ. Bairi marĩã, ãmerẽ yua ati rupau̶ mena roro marĩ caátiganucũrõrẽ bairo marĩ átiãmerĩgarã. Espíritu Santo cũ̶ caátirotirore bairo jeto roque caátiãniparã majũ marĩ ãniña. 5Tocãnacãũ̶pu̶a camasã ati rupau̶ mena roro caátinucũrã pu̶ame, ti rupau̶ roro na caátie jetore átiãniganucũñama. Aperã, Espíritu Santo cũ̶ carotirore bairo caátinucũrã roque, cũ̶ caborije cañurĩjẽ pu̶amerẽ átiãniganucũñama. 6Noa ũna ati rupau̶ mena roro caátiãninucũrã pu̶ame tore bairo na caáticõãninucũata, peero yasiricaropu̶ ágarãma. Aperã, Espíritu Santo cũ̶ caborije cañurĩjẽ ũnie pu̶amerẽ caátiãninucũrã roque tocãnacã rũ̶mu̶a Dios mena yerijõrõ ãnicõã ninucũgarãma. 7Noa ũna ati rupau̶ mena roro caátiãniganucũrã pu̶ame Dios cũ̶ carotirore bairo átijĩãtimasĩgaetiyama. Bairi Dios pesuare bairo caãna majũ tuayama. 8Bairi tore bairo ati rupau̶ mena roro caátiãninucũrã pu̶ame di rũ̶mu̶ ũno Dios cũ̶ caĩñajesorije ũnierẽ áperimajũcõãñama cũ̶ caĩñajoro. 9Mu̶jãã roque ãmerẽ, na rupau̶ caborore bairo caátiãninucũrã na caátiãninucũrõrẽ bairo mu̶jãã átiãmerĩña. Espíritu Santo cũ̶ camasĩõrĩjẽ jũ̶gori roque cũ̶ caátirotirore bairo jeto mu̶jãã átiãninucũña. Tore bairo mu̶jãã átiãninucũgarã, caãnorẽ bairo Espíritu Santo Dios Yeri majũ mu̶jãã yeripu̶ cũ̶ caãmata. Tunu bairoa Jesucristo cũ̶ cajou̶ Espíritu Santo majũrẽ ni ũcũ̶ cũ̶ yeripu̶ cacũ̶goecu̶ pu̶ame Jesucristo yau̶ mee niñami. 10Ati rupau̶, roro marĩ caátinucũrĩ rupau̶ pu̶ame caboapa rupau̶ niña. Bairo caboapa rupau̶ caãnimiatacũ̶ãrẽ, Jesucristo marĩpu̶re cũ̶ caãmata, Dios pu̶ame cañurã ñe ũnie cawapa mánarẽ bairo marĩ ãnio joroque átiyami. Bairi marĩ rupau̶ caboamiatacũ̶ãrẽ, marĩ yeri pu̶ame u̶mu̶recóopu̶ caticõã ninucũgaro. 11Dios Yeri Espíritu Santo, Jesucristo cariaricu̶pu̶re tunu cũ̶ catio joroque caátacu̶ pu̶ame marĩpu̶re cũ̶ caãmata, marĩ rupau̶ cayasiro bero tunu ti rupau̶re catio joroque átigu̶mi. Espíritu Santo marĩpu̶re cũ̶ caãnoi, cũ̶ camasĩrĩjẽ mena tore bairo marĩ átigu̶mi. 12Bairi yu̶ yarã, yu̶ bairãrẽ bairo caãna, marĩ yeripu̶ Espíritu Santo cũ̶ caãno jũ̶gori ati rupau̶ mena roro marĩ caátiganucũrĩjẽrẽ áperirotiya. Espíritu Santo cũ̶ carotirore bairo pu̶ame roque átirotiya. 13Ati rupau̶ mena roro mu̶jãã caátiganucũata, peeropu̶ mu̶jãã yasigarã. Baimirãcũ̶ã, tie carorijere Espíritu Santo cũ̶ camasĩõrĩjẽ jũ̶gori mu̶jãã caátijãnaata roque, mu̶jãã caticõã ninucũgarã. 14Nipetiro Espíritu Santo cũ̶ camasĩõrĩjẽ jũ̶gori cũ̶ carotirore bairo caátiu̶sarã pu̶ame Dios pũnaa majũ niñama. 15Dios, Espíritu Santore marĩ cũ̶ cajoroi, paacoteri majã na quetiupau̶re cauwirã na cabairore bairo marĩ baietiya. Dios pu̶ame marĩrẽ cũ̶ pũnaa marĩ ãnio joroque átigayami. Cũ̶, Espíritu Santo marĩ cũ̶ cajũ̶gomasĩõrĩjẽ jũ̶gori marĩ Pacu̶ Diore, “Caacu̶,” cariape cũ̶ marĩ ĩ masĩña. 16Espíritu Santo pu̶ame marĩ yeri marĩ catũ̶goñarĩjẽpu̶, “Dios pũnaa majũ marĩ ãniña,” marĩ ĩ tũ̶goñao joroque átiyami. 17Bairo cũ̶ pũnaa caãna ãnirĩ Dios, cũ̶ pũnaarẽ, “Caroare mu̶jãã yu̶ jogu̶,” nipetiro cũ̶ caĩrĩcãrõrẽ bairo marĩ cũ̶gopeyogarã. Jesucristo jũ̶gori tiere marĩ cũ̶gogarã. Jesucristo cũ̶ carotirore bairo marĩ caátie jũ̶gori marĩrẽ roro na caápata, cũ̶ mena u̶mu̶recóopu̶ caroaro caãnopu̶ caroaro marĩ ãnicõã ninucũgarã. 18Ati yepapu̶ ãna, roro popiye marĩ cabainucũrĩjẽ mena quetibu̶ju̶ cõñamasĩã mano u̶mu̶recóo caroaro caãnopu̶ caroare Dios marĩ cũ̶ cajopee menarẽ. Bairo ati yepapu̶ roro popiye baimirãcũ̶ã, cabero caroaro majũ marĩ ãnicõã ninucũgarã Jesucristo mena yua. 19Nipetirije ati u̶mu̶recóo macããjẽ Dios cũ̶ caqũẽnorĩqũẽ pu̶ame camasã paju̶tiricaro mano apeye ũnierẽ na cacoterore bairo cotero baiya. “Ãnoa yu̶ pũnaa niñama,” Dios cũ̶ caĩpa rũ̶mu̶ caetaparore cotero baiya. 20Caãnijũ̶goropu̶ Dios cũ̶ caqũẽnorĩqũẽ nipetirije caroa cañurĩjẽ ãnijũ̶goyupa. Cabero ati yepa macããjẽ roye tuapeticoasupa. Ati yepa to majũã roye tuaesupa. Adán cũ̶ cabaibotiorijere ĩñarĩ, Dios pu̶ame roque nipetirije to roye tuao joroque ásupi. Bairi nipetirije ati yepa macããjẽ cayasipee majũ tuayupa. Bairo cayasipee caãnimiatacũ̶ãrẽ, caberopu̶ Dios pu̶ame tiere caroaro wasoagu̶mi tunu. Bairo ti rũ̶mu̶ caetaro cũ̶ pũnaarẽ cawãma rupau̶ cũ̶ cawasoaparorea bairo ati u̶mu̶recóo macããjẽ cũ̶ caqũẽnorĩqũẽ cũ̶ãrẽ cawãma jeto wasoacõãgu̶mi. Bairo cũ̶ caáto, tirũ̶mu̶pu̶ cũ̶ caátijũ̶goricarore bairo caroaro nigaro tunu. Pu̶gani roye tuaetigaro yua. 22Bairi atore bairo marĩ masĩña: Ati u̶mu̶recóo macããjẽ nipetirije Dios cũ̶ caqũẽnorĩqũẽ pu̶ame, jĩcãõ carõmio pũnaa cu̶tigo popiye cõ canetõrõrẽ bairo tie cũ̶ã roro popiye netõrõ baiya. 23Tie ati u̶mu̶recóo macããjẽ jeto mee roro popiye netõrõ baiya. Marĩ cũ̶ã torea bairo popiye marĩ bainucũña. Bairo caãna nimirãcũ̶ã, merẽ caãnijũ̶goro Espíritu Santore Dios cũ̶ cajoricarã majũ marĩ ãniña. Popiye netõrõ marĩ ãnicoteya mai ape rupau̶, rorije cacũ̶goeti rupau̶re, marĩ, cũ̶ pũnaarẽ cũ̶ caĩrĩcãrõrẽã bairo Dios cũ̶ cawasoaparo jũ̶goye. 24Jesucristo mena marĩ catũ̶goñatutuaro jũ̶gori marĩ netõõñupĩ Dios. Bairi caberopu̶ marĩ rupau̶re cũ̶ cawasoapeere caãnorẽ bairo cariape marĩ tũ̶goñatutuacoteya. Ni jĩcãũ̶ ũcũ̶ dise ũnie cũ̶ cacoteriquere merẽ cũ̶ caĩñaata, tiere cotenemoetiyami. Marĩ caĩñarĩqũẽpu̶ caãmata, dope bairo merẽ ĩñarĩqũẽpu̶re cotemasĩã mano. 25Bairi marĩ caĩñaetiere mai cacoterã ãnirĩ tiere paju̶tiricaro mano marĩ cacotetũ̶goñarõ ñuña. 26Marĩ pu̶ame Diore caroaro cariape caãnorẽ bairo cũ̶ marĩ jẽnimasĩ peyoetinucũña. Bairo cajẽnipeyomasĩẽna marĩ caãnoi, Espíritu Santo pu̶ame marĩ ju̶átinemonucũñami. Bairi marĩ caátiãnipeere marĩ jẽnibojayami cũ̶ yaye bu̶su̶rique mena. Tie bu̶su̶rique pu̶ame camasã bu̶su̶rique mena cabu̶su̶jẽñomasĩã manie niña. 27Dios pu̶ame roque marĩ yeri marĩ catũ̶goñarĩjẽrẽ caĩñabesemasĩ ãnirĩ Espíritu Santo marĩ cũ̶ cajẽnibojarijere cariape tũ̶gomasĩñami. Dios cũ̶ caborore bairo Espíritu Santo pu̶ame, marĩ, cũ̶ yarãrẽ marĩ jẽnibojanucũñami. 28Atore bairo marĩ masĩña: Nipetiri wãme caroa, o popiye marĩ cabainucũpeere marĩ cũñupĩ Dios, marĩ, cũ̶rẽ camairã cũ̶ caborore bairo caroaro marĩ caátiãnimasĩparore bairo ĩ. Tore bairo marĩ cũñupĩ Dios marĩ, cũ̶ cabesericarã, cũ̶ cabojũ̶goricarorea bairo catũ̶gou̶sarãrẽ. 29Dios merẽ caãnijũ̶goripau̶pu̶a marĩrẽ ĩñabeseri, “Ãnoa caãniparã yu̶ pũnaa majũ nigarãma,” ĩcũcõãñupĩ. Cũ̶ macũ̶ cũ̶ caãnierẽ bairo marĩ caãnierẽ bou̶, bairo ĩcõã jũ̶goyupi. Bairi tunu cũ̶ macũ̶rẽ, nipetiro cũ̶ mena catũ̶goñatutuarã jũ̶gocu̶re bairo cũ̶ caãnierẽ bou̶, bairo ĩ jũ̶goyeticũcõãñupĩ Dios. 30Caãnijũ̶goripau̶pu̶a merẽ cũ̶ yarã cũ̶ caãnirotiricarã marĩ caãnoi, cũ̶ pũnaa caãniparãrẽ marĩ beseyupi. Bairo cũ̶ cabesericarã marĩ caãnoi, “Ñe ũnie cabuimána, cañurã niñama,” marĩ ĩ ĩñañami. Bairo cũ̶ caĩ ĩñarã marĩ caãnoi, caroaro majũ cũ̶ caãnajẽ cu̶tie macããjẽrẽ marĩ cũ̶ã jĩcã wãme ũnorẽ marĩ cũ̶goo joroque ásupi. 31Bairo tie caroa queti majũrẽ tũ̶goñarĩ, atore bairo marĩ tũ̶goña masĩnemoña: Dios cũ̶ caĩñamaicoterã marĩ caãnoi, noa ũna aperã marĩrẽ caĩñaterã nimirãcũ̶ã, roro marĩ átiyaparoetiyama. 32Dios cũ̶ macũ̶ caãnimajũũ̶rẽ cũ̶ riaroti joyupi ati yepapu̶re, marĩ nipetiro marĩ carorije wapare netõõgu̶. Marĩ mairĩ, “Cũ̶ yu̶ joetigu̶ yu̶ macũ̶rẽ,” ĩẽsupĩ. Bairo caátacu̶ majũ ãnirĩ nipetirije caroaro marĩ caãnajẽ cu̶tipee cũ̶ãrẽ marĩ jomajũcõãgu̶mi. 33Dios roque, “Ãnoa ñe ũnie cawapa cũ̶goena niñama,” marĩ, cũ̶ cabesericarãrẽ marĩ ĩ masĩñami. Bairi ni jĩcãũ̶ ũcũ̶, “Ãnoa, cañuena niñama,” marĩ ĩ bu̶su̶jãmasĩẽcũ̶mi. 34Mai, atore bairo niña: Jesucristo pu̶ame yucu̶pãĩpu̶ marĩ carorije wapare netõõbojagu̶ riayupi. Bairo riacoamicũ̶ã, tunu nemo catiyupi Dios cũ̶ camasĩrĩjẽ jũ̶gori. Bairo catiri bero ãmerẽ yua, cũ̶ pacu̶ cũ̶ carotimasĩrĩpau̶ cariape nu̶gõãpu̶ ruiri, marĩ yaye caãnipeere jẽnibojau̶ átiyami cũ̶ pacu̶ Diore. Bairi ni jĩcãũ̶ ũcũ̶, “Ãnoarẽ na yaye wapa popiye na baio joroque na átirotiya,” marĩ, Dios cũ̶ cabesericarãrẽ marĩ ĩ bu̶su̶jãmasĩẽcũ̶mi. 35Jesucristo marĩrẽ cũ̶ camairĩjẽrẽ ni jĩcãũ̶ ũcũ̶ ẽñotamasĩẽcũ̶mi. Tunu bairoa popiye marĩ cabairije, o marĩ cau̶seariti tũ̶goñarĩjẽ, o aperã Jesucristo yarã marĩ caãnie jũ̶gori roro marĩrẽ na caátie to caãnimiatacũ̶ãrẽ, Jesucristo pu̶ame marĩrẽ maicõã ninucũñami. Tunu bairi marĩ caau̶ariarije, marĩ cajutii bopacarije, o cauwiorije watoa marĩ caãnie, o aperã marĩrẽ na capajĩãgarije caãnimiatacũ̶ãrẽ, Jesucristo pu̶ame marĩ maicõã ninucũñami. 36Dios yaye quetire woarica tutipu̶ cũ̶ã atore bairo ĩña cũ̶ yarãrẽ: “Dios, mu̶ yarã jãã caãno jũ̶gori tocãnacã rũ̶mu̶a jããrẽ pajĩãrĩcãrõ uwioro jãã átinucũñama. Ovejare pajĩãgarã, narẽ pajĩãrĩcãrõpu̶ na cajeánárẽ bairo jãã cũ̶ãrẽ roro jãã átinucũñama,” ĩ quetibu̶ju̶ woatuyupa Dios ya tutipu̶. 37Bairo roro netõrõ marĩ cabairije caãnimiatacũ̶ãrẽ, marĩ pu̶ame Jesucristo marĩrẽ camai cũ̶ caju̶átie jũ̶gori roro marĩ cabainucũrĩjẽrẽ netõnu̶cãrĩ jõpu̶ame tiere tũ̶goñaenarẽ bairo marĩ tũ̶goñanetõcõãgarã. 38Bairi ñe ũnie ru̶saeto atore bairo ñi tũ̶goñatutuacõãña: Dise apeye ũnie Dios marĩrẽ cũ̶ camairĩjẽrẽ marĩ ẽñotamasĩẽtĩña. Marĩ cabaiyasiata, o marĩ cacaticõãmata cũ̶ãrẽ, dise ũnie marĩ ẽñotamasĩẽtĩña. Bairi tunu ángelea majã, wãtĩ yeri pũna quetiuparã cũ̶ã marĩrẽ Dios cũ̶ camairĩjẽrẽ marĩ ẽñotamasĩẽtĩñama. Tunu apeye ãme caãnie, caberopu̶ caãnipee cũ̶ã marĩ ẽñotamasĩẽtĩña. 39Bairi tunu jõbui u̶mu̶recóopu̶ macããjẽ, caũ̶cũ̶ãrõpu̶ macããjẽ, nipetirije Dios cũ̶ caqũẽnorĩqũẽ, marĩrẽ Dios cũ̶ camairĩjẽrẽ marĩ ẽñotamasĩẽtĩña. Marĩ Quetiupau̶ Jesucristo yarã marĩ caãnoi, ¡di rũ̶mu̶ ũno marĩ maijãnaetinucũgu̶mi Dios!

will be added

X\