ROMANOS 7

1Yu̶ yarã, yu̶ bairãrẽ bairo caãna, Moisés ãnacũ̶ cũ̶ caroticũrĩqũẽrẽ mu̶jãã masĩña. Tie pu̶ame ati yepapu̶ mai marĩ cacatiãno, marĩrẽ tutuaro rotirore bairo marĩ átiya. Marĩ cariaro bero roque, tiere carotiecoena marĩ tuacõãña yua. 2Mai, ĩcõñarĩ mu̶jãã yu̶ quetibu̶ju̶pa: Jĩcãõ ũcõ camanapu̶cu̶co, cawãmojiyarico cõ caãmata, Moisés ãnacũ̶ cũ̶ caroticũrĩqũẽ caĩquetibu̶ju̶ro jũ̶gori cõ manapu̶re cõ capitiro maniña. Cõ manapu̶ cũ̶ cariaro bero roquere yua, na cawãmojiyamirĩqũẽ peticoaya. Bairi yua, Moisés ãnacũ̶, “Mu̶ manapu̶re cũ̶ pitieticõãña,” cũ̶ caĩroticũrĩqũẽrẽ carotiecocõãcõ mee tuayamo. 3Bairi tunu cõ manapu̶ cũ̶ cacatimiatacũ̶ãrẽ, apei caũ̶mu̶ mena cõ caãmata, roro áco átiyamo. Moisés ãnacũ̶ cũ̶ caroticũrĩqũẽrẽ cabaibotiore bairo baiyamo. Bairo caãcõ nimiocũ̶ã, cõ manapu̶ cũ̶ cariacoapata roque, Moisés ãnacũ̶, “Mu̶ manapu̶re cũ̶ pitieticõãña,” cũ̶ caĩroticũrĩqũẽrẽ carotiecocõãcõ mee tuayamo. Bairi apei caũ̶mu̶ mena wãmojiyari cõ caãmata, carorije áco mee átiyamo. 4Yu̶ yarã, yu̶ bairãrẽ bairo caãna torea bairo mu̶jãã cũ̶ã Jesucristo cũ̶ cariarique jũ̶gori ãmerẽ yua Moisés ãnacũ̶ cũ̶ caroticũrĩqũẽrẽ carotiecocõãna mee mu̶jãã ãniña. Bairi jĩcãõ cõ manapu̶ cũ̶ cariaro bero apeire camanapu̶cu̶core bairo catuarã ãnirĩ, apei yarã majũ mu̶jãã tuaya yua. Bairi mu̶jãã ãmerẽ Jesucristo cariacoamirĩcũ̶ tunu cacatiricu̶ yarã majũ roque mu̶jãã ãniña. Bairo caãna ãnirĩ caroa átaje tocãnacã wãmerẽ mu̶jãã átiãnigarã. 5Cajũ̶goyepu̶re mai marĩ cajesorije ũnie carorijere marĩ ĩñau̶garipeanucũwũ̶. Bairo caĩñau̶garipearã ãnirĩ Moisés ãnacũ̶ cũ̶ caroticũrĩqũẽrẽ tũ̶gori bero tie roticũrĩqũẽrẽ marĩ baibotiojũ̶gowu̶. Bairo tiere cabaibotiorã ãnirĩ nemojãñurõ tutuaro carorijere marĩ ápu̶. Bairo carorijere ána yua, peeropu̶ cayasiráná majũrẽ bairo marĩ baimiwũ̶. 6Cajũ̶goyepu̶re Moisés ãnacũ̶ cũ̶ caroticũrĩqũẽrẽ carotiecorã majũ marĩ ãnimiwũ̶. Ãme roquere yua, Jesucristo mena ãnirĩ tie rotiriquere carotiecorã mee marĩ ãniña. Bairo caãna ãnirĩ Dios cũ̶ caborore bairo caroa macããjẽ pu̶amerẽ marĩ átiãnijũ̶gomasĩña, Dios, Espíritu Santore marĩ yeripu̶ cũ̶ cajoro jũ̶gori. Bairo Moisés ãnacũ̶ cũ̶ cawoaturiquere marĩ catũ̶gou̶saro jũ̶gori mee, cawãma yeri marĩ cacũ̶goro jũ̶gori roque Dios cũ̶ caborore bairo marĩ átiãnimasĩña. 7Bairi Moisés ãnacũ̶ cũ̶ caátiroticũrĩqũẽ, “Carorije niña,” ¿marĩ ĩrãati? Bairo marĩ ĩẽtĩgarã. Tie rotirique camanicõãta, “Yu̶a, carorije caácu̶ yu̶ ãniña,” marĩ tocãnacãũ̶pu̶a marĩ ĩ tũ̶goña masĩẽtĩbujioricarã. Mai, jĩcã wãme roticũrĩqũẽ macããjẽrẽ yu̶ quetibu̶ju̶pa: “Aperã yayere ĩñau̶garipeaeticõãña,” ĩ quetibu̶ju̶ya. Tie roticũrĩqũẽ camanicõãta, “Ĩñau̶garipearique, carorije niña,” marĩ ĩ masĩẽtĩbujioricarã. 8Bairi Moisés ãnacũ̶ cũ̶ caroticũrĩqũẽ caãno jũ̶gori yua, marĩ rupau̶pu̶ rorije marĩ caátigarije caãnie pu̶ame tocãnacã wãme roro átajere nemojãñurõ marĩ átinemo joroque baiyupa. Tie roticũrĩqũẽ camanicõãta roque, carorije pu̶ame camanierẽ bairo tuabujioro. 9Mai, roticũrĩqũẽrẽ masĩẽcũ̶pũ̶ yu̶ caãna yu̶teare cacatimajũũ̶rẽ bairo yu̶ ãnimiwũ̶. Cabero tie roticũrĩqũẽrẽ yu̶ camasĩrõ bero yu̶ rupau̶pu̶ rorije yu̶ caátigarije caãnie pu̶ame ãninemoñupã. 10Bairo caátiecou̶ ãnirĩ peeropu̶ yu̶ cayasipeere merẽ yu̶ masĩwũ̶. Bairi tie rotirique jũ̶gori camasãrẽ Dios mena caroaro na catuabujioparo ũnorẽã, yu̶ pu̶amerẽ carorije wapa cacũ̶gou̶re bairo yu̶ tuao joroque yu̶ ápu̶. 11Yu̶ majũ yu̶ tũ̶goña mawijiayupa. “Moisés ãnacũ̶ cũ̶ caroticũrĩqũẽrẽ yu̶ átipeyocõãgu̶,” ĩ tũ̶goñamicũ̶ã, yu̶ rupau̶ rorije yu̶ caátigarije caãnie jũ̶gori tiere yu̶ átipeyomasĩẽpũ̶. Bairo átipeyomasĩẽtĩrĩ, carorije cawapacu̶cu̶ peeropu̶ cayasipau̶re bairo yu̶ tuamiñupã. 12Bairi atore bairo marĩ ĩ yaparoya Moisés ãnacũ̶ cũ̶ caroticũrĩqũẽrẽ: Tie cañurĩjẽ majũ niña bairopu̶a. Tocãnacã wãme roticũrĩqũẽ caroaro cariape quetibu̶ju̶rique cañurĩjẽ niña. 13Toroquere Moisés ãnacũ̶ cũ̶ caroticũrĩqũẽ cañurĩjẽ nimirõcũ̶ã, ¿nopẽĩrõ tie jũ̶gori marĩrẽ carorije cabuicu̶narẽ bairo marĩ tuao joroque to ásupari? Tie jũ̶gori mee tore bairo marĩ baiwu̶. Marĩ carorije jũ̶gori carorije wapacu̶narẽ bairo marĩ tuao joroque marĩ ápu̶. Bairo bairi tie rotirique caroa macããjẽrẽ masĩrĩ bero yua, roro marĩ rupau̶re caátiganucũrĩjẽ pu̶amerẽ, “Tie carorije átaje majũ niña,” marĩ ĩ tũ̶goñamasĩjũ̶gowu̶. Bairo ĩ tũ̶goñamasĩrĩ, peeropu̶ cayasicoabujiorãrẽ bairo marĩ caãnajẽ cu̶tie cũ̶ãrẽ marĩ masĩwũ̶. 14Bairi atore bairo marĩ masĩña: Moisés ãnacũ̶ cũ̶ caroticũrĩqũẽ pu̶ame Dios cũ̶rẽ cũ̶ caquetibu̶ju̶cũrĩqũẽ majũ niña. Bairi cañurĩjẽ majũ niña. Yu̶ rupau̶pu̶ rorije yu̶ caátigarije cacũ̶gou̶ ãnirĩ yu̶ pu̶ame roque carorije macããjẽrẽ caáticõãninucũũ̶ yu̶ ãniña. 15Yu̶a, yu̶ caátigarije caroa ũnierẽ yu̶ áperinucũña. Apeye carorije caátiamanipee ũnie pu̶ame roquere yu̶ átinucũña. Bairo yu̶ caátinucũrĩjẽrẽ dope bairo ñi masĩẽtĩña. ¿Dopẽĩ tore bairo yu̶ átibaucu̶ti? 16Yu̶ caátigaetie pu̶amerẽ ácu̶, atore bairo yu̶ masĩña: “Moisés ãnacũ̶ cũ̶ caroticũrĩqũẽ cañurĩjẽ niña,” ñi masĩña. 17Bairi ãmerẽ yu̶ majũ tie carorijere yu̶ áperiya. Yu̶ yeri yu̶ catũ̶goñarĩjẽpu̶ carorije macããjẽ átaje nicõãña. Tie pu̶ame roro yu̶ átiãninucũõ joroque yu̶ átiya. 18Bairi caroa macããjẽrẽ átigamicũ̶ã, yu̶ átijĩãtietiya. Bairo átijĩãtietiri atore bairo ñi masĩña: Yu̶ rupau̶ mena roro yu̶ caátigarijere yu̶ caápata, petoaca ũno caroa macããjẽ manimajũcõãña. 19Yu̶a, yu̶ caátigarije caroa ũnierẽ yu̶ áperiya. Apeye yu̶ caátigaetie pu̶ame roquere yu̶ átinucũña. 20Yu̶ caátigaetie pu̶amerẽ ácu̶, atore bairo yu̶ masĩña: Yu̶ majũ tie carorijere yu̶ áperiya. Yu̶ yeri yu̶ catũ̶goñarĩjẽpu̶ carorije macããjẽ átaje nicõãña. Tie pu̶ame roro yu̶ átiãninucũõ joroque átiya. 21Atore bairo jeto yu̶ baicõã ninucũña: Caroa macããjẽrẽ átiganucũmicũ̶ã, rorije átaje pu̶ame jetore yu̶ áticõã ninucũña. Carorije pu̶ame yu̶ ãnijũ̶goyecu̶tinucũña. 22Yu̶ majũpu̶a, Dios cũ̶ caroticũrĩqũẽrẽ yu̶ bomajũcõãmiña. 23Bairi atiere yu̶ masĩña: Yu̶ catũ̶goñarĩjẽ mena caroa macããjẽrẽ yu̶ átigamiña. Bairo yu̶ caátigamiatacũ̶ãrẽ, yu̶pu̶re niña caroaro yu̶ caátigatũ̶goñarĩjẽrẽ ẽñotarore bairo yu̶re caátinucũrĩjẽ. Bairi yu̶ majũ rupau̶ mena carorijere tutuaro yu̶ átiganucũña. Bairo yu̶pu̶re caãno jũ̶gori carorijere yu̶ átijãnamasĩẽtĩña. 24Bairo carorije macããjẽrẽ caáticõãninucũũ̶ ãnirĩ, ¡bu̶tioro roro yu̶ tũ̶goñarĩqũẽ paiya! Peero caũ̶petietopu̶ caápáu̶ yu̶ ãniña. ¡Tame, roro majũ yu̶ tãmu̶ocu̶pu̶! Bairi, ¿ni ũcũ̶ majũ carorije yu̶ rupau̶pu̶ cacũ̶gou̶ yu̶ caãnie wapare yu̶ cũ̶ netõõbujiocu̶ti? 25Dios pu̶ame Jesucristo mena yu̶ catũ̶goñatutuaro jũ̶gori, yu̶ carorije wapare yu̶ netõõgu̶mi. Bairo cũ̶ caátipeere tũ̶goñarĩ, “Mu̶ ñujãñuña,” cũ̶ ñinucũña. Bairi atore bairo ñi yaparoya yu̶ cabairijere: Dios cũ̶ caroticũrĩqũẽrẽ, cũ̶ cabororea bairo yu̶ caátipea niña. Baimicũ̶ã, yu̶a, ati rupau̶ caãcũ̶ ãnirĩ roro átaje yu̶pu̶re caãno jũ̶gori carorije yu̶ caátipee cũ̶ã ãno bairopu̶a.

will be added

X\