ROMANOS 6

1Bairi yua, yu̶ caĩatajere tũ̶gori bero, ¿dope marĩ caáto to ñucu̶ti? “Dios pu̶ame nemojãñurõ marĩ qũĩñamaiáto,” ĩrã, ¿nemojãñurõ carorije macããjẽrẽ marĩ átinemocõãcu̶ti? 2Tore bairo marĩ áperigarã. Merẽ marĩã, roro átiãnajẽrẽ cajãnamajũcõãrĩcãrã marĩ ãniña. Bairo caãna ãnirĩ, ¿dope bairo tunu carorije macããjẽrẽ marĩ átiãninemobujiocu̶ti? 3¿Atore bairo mu̶jãã masĩẽtĩñati? Mu̶jãã masĩrã. Mu̶jãã pu̶ame Jesucristo yarã ãnigarã na mu̶jãã cabautiza rotirica rũ̶mu̶ caãno atore bairo mu̶jãã tuayupa: Jesucristo yucu̶pãĩpu̶ cariaricu̶re bairo caãna mu̶jãã tuayupa, Dios cũ̶ caĩñajoro. 4Bairi mu̶jããrẽ na cabautizari rũ̶mu̶ Jesucristo mena cayaecoricarãrẽ bairo baimirãcũ̶ã, tunu cũ̶ mena Dios cũ̶ cacatioricarãrẽ bairo mu̶jãã baiyupa. Bairo cũ̶ mena cacatiricarãrẽ bairo caãna ãnirĩ caroarã cawãma yericu̶na mu̶jãã tuayupa yua. Tore bairo marĩ ásupi cũ̶ macũ̶rẽ Dios nocãrõ caroaro cũ̶ caátimasĩrĩjẽ jũ̶gori. 5Jesucristo mena marĩ caãnicõãmata, cariapea cariaricu̶pu̶ nimicũ̶ã, tunu cũ̶ cacatiricarorea bairo marĩ cũ̶ã cacatinemoparã marĩ ãnigarã. 6Bairi, bairo marĩ masĩña: Marĩã, cajũ̶goyepu̶re roro marĩ caátiãnimirĩqũẽrẽ Jesucristo cũ̶ cariarique jũ̶gori yucu̶pãĩpu̶ papuaturericarore bairo baiyupa Dios cũ̶ caĩñajoro. Dios pu̶ame ati rupau̶ mena roro camasã na caátiãnigarije to yasio joroque ĩ, bairo ásupi Jesús. Bairi ãmerẽ roro átiãnajẽrẽ caẽñotamasĩẽnarẽ bairo marĩ baietiya. 7Ni jĩcãũ̶ ũcũ̶ baiyasiri bero, cũ̶ rupau̶ roro caátigamirĩqũẽrẽ átinemoẽtĩñami. 8Bairi, bairo marĩ ĩ tũ̶goñacõã niña: Jesucristo mena cariaricarãrẽ bairo caãna ãnirĩ, cũ̶ caátore bairo marĩ átigarã. Cariaricu̶ nimicũ̶ã catitunurĩ u̶mu̶recóopu̶ cũ̶ caátátore bairo marĩ cũ̶ã riamirãcũ̶ã tunu catitunurĩ u̶mu̶recóopu̶ marĩ ágarã. 9Tunu atore bairo marĩ masĩnemoña: Jesucristo riari bero catitunurĩ u̶mu̶recóopu̶ ãcũ̶ pu̶gani cãrõ tunu rianemoetigu̶mi. Di rũ̶mu̶ ũno riarique cũ̶ ẽmu̶etaeto. 10Jĩcãnia riajãnañupĩ, marĩ carorije wapare netõõgu̶. Ãmerẽ yua, catiri bero Dios mena caroaro ãnicõã ninucũñami. 11Bairi ãmerẽ yua, mu̶jãã pu̶ame tirũ̶mu̶pu̶ roro mu̶jãã caátiãnajẽrẽ cacũmajũcõãrĩcãrãrẽ bairo tũ̶goñaña. Cariacoatana ãnana carorijere na caátimasĩẽtõrẽã bairo mu̶jãã cũ̶ã tiere tũ̶gou̶sanemoeticõãña. Jesucristo mena caãna ãnirĩ, mu̶jãã caátiãnipeere Dios cũ̶ caborore bairo jeto átiãnicõãña. 12Bairo bairi yua, mu̶jãã pu̶ame ati rupau̶ bu̶tioro roro mu̶jãã caátiganucũrĩjẽrẽ mu̶jãã majũrẽ átijĩãtirotieticõãña. Roro marĩ rupau̶ caátiganucũrĩjẽrẽ tũ̶goñaenarẽ bairo tiere tũ̶goñanetõcõãña. 13Marĩ caĩñarĩjẽ, marĩ cabu̶su̶rije nipetirije marĩ rupau̶ macããjẽ mena roro marĩ áperigarã. Bairo roro átajere átato ũnorẽã, Dios cũ̶ caborore bairo caroa macããjẽ pu̶amerẽ marĩ átiãnigarã. Riacoati tunu cacatiricarãrẽ bairo caroa macããjẽrẽ marĩ áticõã ninucũgarã. 14Bairi yua, ãmerẽ roro átiãnajẽ mu̶jãã catũ̶goñarĩjẽ mu̶jãã netõnu̶cãẽtĩgaro. Ãmerẽ yua, Moisés ãnacũ̶ cũ̶ caroticũrĩqũẽrẽ carotiecocõãna mee mu̶jãã ãniña. Dios pu̶ame roque mu̶jããrẽ mairĩ, caroaro mu̶jãã rotiyami mu̶jãã yeripu̶. Bairo cũ̶ mena mu̶jãã caãnoi, carorije átaje mu̶jããrẽ ẽmu̶etaetiya. 15Bairi yua, yu̶ caĩatajere tũ̶gori bero, ¿dope marĩ caáto to ñucu̶ti? ¿Moisés ãnacũ̶ cũ̶ caroticũrĩqũẽrẽ carotiecocõãna mee, Dios yayere caĩroarã ãnirĩ carorije macããjẽrẽ marĩ átinemocõãnicu̶ti? Tore bairo marĩ áperigarã. 16Caroaro mu̶jãã masĩña merẽ atiere: Mu̶jãã pu̶ame apei cũ̶ carotirore bairo mu̶jãã caáticõãmata, cũ̶rẽ capaabojacoteri majã majũ jããrã mu̶jãã baiya. Cũ̶ã, mu̶jãã quetiupau̶re bairo tuau̶ baiyami. Torea bairo carori wãmerẽ mu̶jãã caáticõãmata, tie carorijere caátirotiecocotenucũrã majũ mu̶jãã tuaya. Dios cũ̶ carotirore bairo marĩ caáticõãmata roque, cũ̶rẽ capaacoterãrẽ bairo marĩ ãnigarã. Bairo cũ̶ carotirore bairo ána carorijere átato mano marĩ ãnigarã. 17Mai, mu̶jãã pu̶ame cajũ̶goyepu̶re carorijere áticõã ninucũrã tiere caẽñotamasĩẽna majũrẽ bairo mu̶jãã baiyupa. Cabaimirĩcãrã ãmerẽ yua aperã Jesucristo yaye quetire mu̶jãã na caquetibu̶ju̶ro tũ̶gori, mu̶jãã yeripu̶ tiere mu̶jãã tũ̶gou̶sajũ̶goyupa. Bairi Jesucristo jũ̶gori roro átajere caẽñotamasĩrã ãnirĩ caroa macããjẽ majũrẽ mu̶jãã átiãnicõã jũ̶goyupa. Bairo mu̶jãã caãnajẽ cu̶tiere tũ̶goñarĩ, yu̶ pu̶ame Diore, “Mu̶ ñujãñuña,” cũ̶ ñinucũña. 19(Bairãpu̶a mai, catũ̶goñatutuawẽpũ̶ẽna mu̶jãã caãnoi, camasã na cabairijere ĩcõñarĩ mu̶jãã yu̶ quetibu̶ju̶ya.) Mu̶jãã pu̶ame cajũ̶goyepu̶re mu̶jãã caĩñarĩjẽ, mu̶jãã cabu̶su̶rije nipetirije mu̶jãã rupau̶ macããjẽ mena roro átiãnajẽrẽ mu̶jãã átiãñupã. Bairo roro átajere átato ũnorẽã, ãme roque Dios cũ̶ caborore bairo caroa macããjẽ pu̶amerẽ átiãña. “Cũ̶ mena caãnimajũcõãrã ãnirĩ nemojãñurõ cũ̶ caborore bairo marĩ átigarã,” ĩ tũ̶goñarĩ caroaro áticõã ninucũña. 20Mai mu̶jãã, cajũ̶goyepu̶re roro caáticõãna ãnirĩ tie carorijere caáticotenucũrã majũ mu̶jãã ãñupã. Bairo caãna ãnirĩ ñe ũnie caroa macããjẽrẽ mu̶jãã átiga tũ̶goñamasĩẽsupa. 21¿Cajũ̶goyepu̶re roro mu̶jãã caátiãnajẽ mena ñe ũnie caroare mu̶jãã bócari? Mu̶jãã bócaesupa. Tiere tũ̶goñamasĩrĩ yua, ãmerẽ mu̶jãã bobotũ̶goñaña. Roro mu̶jãã caátaje wapa peero yasiricaropu̶ roro mu̶jãã baibujioyupa. 22Bairo baibujiomirãcũ̶ã, ãmerẽ yua roro mu̶jãã caátiganucũrĩjẽrẽ ẽñotamasĩrĩ, Dios cũ̶ caátirotirore bairo caroa macããjẽ pu̶amerẽ mu̶jãã átijũ̶goyupa. Tie roque wapacu̶tiya mu̶jããrẽ. Bairi nemojãñurõ cũ̶ caborore bairo mu̶jãã caápata, cũ̶ caátiãnirotirijere caána majũ mu̶jãã tuaya. Bairo mu̶jãã caáticõãninucũata yua, yeri capetieti pũnarẽ mu̶jãã jogu̶mi Dios. 23Bairi roro camasã caátipairã na yaye wapa peeropu̶ caápárã niñama. Dios marĩrẽ cũ̶ cajorije pu̶ame roque yeri capetietie niña. Jesucristo marĩ quetiupau̶ jũ̶gori wapa jẽnirĩcãrõ mano tiere marĩ joyami.

will be added

X\