ROMANOS 2

1Bairi noo caãna mu̶jãã mena macããna pu̶ame, “Ãnoa carorã cañuena niñama,” na caĩata, camasã na caátiere caĩñabeserãrẽ bairo bainucũñama. Mu̶jãã cũ̶ã narẽã bairo roro caátipairã mu̶jãã ãniña. Bairi mu̶jãã pu̶ame aperãrẽ, “Mu̶jãã yaye wapa mu̶jãã buicu̶tiya,” na mu̶jãã caĩata, mu̶jãã cũ̶ã narẽã bairo cabuicu̶na mu̶jãã tuacõãña. 2Atore bairo marĩ ĩ masĩña: “Dios pu̶ame roro caánarẽ, ‘Na yaye wapa popiye na baio joroque na yu̶ átigu̶,’ cariapea cũ̶ caĩcũrĩcãrõrẽã bairo átimajũcõãgu̶mi,” marĩ ĩ masĩña. 3Mu̶jãã, “Ãnoa roro caána niñama,” camasãrẽ caĩbeserã nimirãcũ̶ã, mu̶jãã cũ̶ã narẽã bairo roro mu̶jãã átinucũña. Bairi, “Jãã caátiere ĩñabeseecu̶mi Dios,” mu̶jãã ĩ masĩẽtĩña. Mu̶jãã cũ̶ãrẽ mu̶jãã caátiere ĩñabesemajũcõãgu̶mi Dios. 4Baipu̶a mai, mu̶jããrẽ caĩñamai ãnirĩ jicoquei mu̶jããrẽ ĩñabeseetigu̶mi. Roro mu̶jãã caátiãnierẽ tũ̶goña yapapuari mu̶jãã catũ̶goñawasoarore bori caroaro yerijõrõ cotei átiyami Dios. Mu̶jãã pu̶ame roque ricaati tũ̶goñarĩ, “Marĩ caátiãnie, ñurõ Dios cũ̶ caĩñajoro. Bairi ñe ũnie cawapa cũ̶goena marĩ ãna,” mu̶jãã ĩ tũ̶goñanucũña. 5Catũ̶gomasĩẽna mu̶jãã ãniña. Dios pu̶ame caroaro yerijõrõ roro mu̶jãã caátiere mu̶jãã catũ̶goñawasoapeere cũ̶ cacotemiatacũ̶ãrẽ, mu̶jãã pu̶ame yapapuari roro mu̶jãã caátiere mu̶jãã tũ̶goña wasoagaetiya. Bairo caãna mu̶jãã caãnoi, mu̶jãã yaye wapa pairo ãninemorõ baiya. Bairi cabero Dios cũ̶ caĩñabeseri rũ̶mu̶ caetaro, cũ̶ caĩrĩcãrõrẽã bairo cariapea netõjãñurõ popiye mu̶jãã baio joroque mu̶jãã átigu̶mi. 6Ti rũ̶mu̶ caãno Dios pu̶ame camasã tocãnacãũ̶pu̶rea na caátawãmerĩ caãno cãrõrẽ ĩñacõñarĩ na ĩñabesegu̶mi. 7Camasã jĩcããrã caroaro áticõã ninucũñama. Caroaro caroa macããjẽrẽ átiãniganucũñama. Dios cũ̶ caĩñajesorije ũnierẽ átiãninucũñama. Tocãnacã rũ̶mu̶a Dios mena ãnijãnagaetinucũñama. Na ũna roquere yeri capetietie majũrẽ na jogu̶mi Dios. 8Aperã roque na caátore bairo áperinucũñama. Na ũna Diore baibotiori cũ̶ yaye cariape macããjẽ quetire catũ̶gou̶sagaena roquere tutuaro mena popiye na baio joroque na átigu̶mi. Carorije macããjẽrẽ na caborije jũ̶gori tutuaro mena popiye na baio joroque na átigu̶mi. 9Nipetiro roro caátipairã roro popiye tãmu̶ogarãma. Caãnijũ̶goro judío majã cañuena tore bairo tãmu̶ojũ̶gogarãma. Na bero judío majã caãmerã cũ̶ã cañuena popiye tãmu̶ogarãma. 10Aperã caroa macããjẽrẽ caátiãninucũrã roquere caroaro na átigu̶mi Dios. Nipetiro camasã na catũ̶goro, “Caroaro majũ mu̶jãã ápu̶,” na ĩgu̶mi. Tunu caroa yericu̶tajere na jogu̶mi. Caãnijũ̶goro tore bairo na átigu̶mi judío majã cañurãrẽ. Na bero judío majã caãmerã cañurã cũ̶ãrẽ bairoa na átigu̶mi. 11Bairi judío majã, aperã judío majã caãmerã cũ̶ãrẽ na ĩñaricawoetiyami Dios. Jĩcãrõ tũ̶ni caroaro cariape na ĩñañami nipetiro camasãrẽ. 12Judío majã caãmerã, Moisés ãnacũ̶ cũ̶ caroticũrĩqũẽrẽ masĩẽtĩñama. Bairo tiere masĩẽtĩmirãcũ̶ã, tocãnacãũ̶pu̶a yasicoagarãma, roro na caátie jũ̶gori. Judío majã roque cũ̶ caroticũrĩqũẽrẽ masĩñama. Bairo masĩmirãcũ̶ã, tiere na cabaibotiorije wapa yasicoagarãma na cũ̶ã. 13“Moisés ãnacũ̶ cũ̶ caroticũrĩqũẽrẽ na catũ̶gorije jũ̶gori, ñe ũnie carorije wapa cacũ̶goena niñama,” na ĩ, ĩñaẽtĩñami Dios camasãrẽ. Cũ̶ caroticũrĩqũẽrẽ tũ̶gori bero caroaro caána roquere, “Ñe ũnie carorije wapa cacũ̶goena niñama,” na ĩ, ĩñañami. 14Judío majã caãmerã Moisés ãnacũ̶ cũ̶ caroticũrĩqũẽrẽ masĩẽtĩmirãcũ̶ã, na majũ caroa macããjẽrẽ na caápata, Dios cũ̶ carotirore bairo ána átiyama. Bairo na caápata, na yeripu̶ tie carotirore bairo caátimasĩrã tuayama. 15Bairi caroaro na caátiãnie mena cariape na caãnierẽ marĩ masĩõ joroque átiyama. Moisés ãnacũ̶ cũ̶ caroticũrĩqũẽrẽ camasĩrãrẽ bairo niñama. Bairi cariape na caápericõãta, na majũ na yeripu̶, “Marĩ buicu̶tiya,” ĩ masĩñama. Tunu bairoa caroa macããjẽrẽ na caátiatato bero caãmata roque, “Cabuimána marĩ ãniña,” ĩ masĩnucũñama. 16Atie Dios yaye queti yu̶ caquetibu̶ju̶rore bairo baicoagaro: Dios cũ̶ macũ̶ Jesure cũ̶ caĩñabeserotiri rũ̶mu̶ caetaro nipetiro roro na catũ̶goñarĩjẽrẽ, yasioropu̶ na caátaje cũ̶ãrẽ ĩñabesegu̶mi Dios. 17Mu̶jãã, judío majã atore bairo mu̶jãã ĩrĩqũẽ cu̶tinucũña: “Jãã judío majã jãã ãniña. Bairi Dios pu̶ame caroaro jãã átigu̶mi, Moisés ãnacũ̶ cũ̶ caroticũrĩqũẽrẽ camasĩrã jãã caãnoi,” mu̶jãã ĩ tũ̶goña wẽpũ̶nucũña. Tunu bairoa aperãrẽ na mu̶jãã ĩnucũña: “Jãã, jãã ãniña Dios yarã cũ̶ cabesericarã majũ,” mu̶jãã ĩ wẽpũ̶nucũña. 18Bairo caĩwẽpũ̶rã ãnirĩ atore bairo mu̶jãã ĩnemonucũña: “Jãã, Dios cũ̶ caborije ũnie jãã caátipeere jãã masĩjãñuña. Tunu bairoa Moisés ãnacũ̶ cũ̶ caroticũrĩqũẽrẽ jãã camasĩrõ jũ̶gori caroa macããjẽ jetore jãã ĩñabesemasĩña,” mu̶jãã ĩnucũña. 19Tunu cacaapee ĩñaenarẽ bairo caãnarẽ cajũ̶gomasĩrãrẽ bairo, Dios yaye quetire camasĩẽnarẽ, “Jãã quetibu̶ju̶ masĩña,” mu̶jãã ĩnucũña. Tunu bairoa canaitĩãrõpu̶ caãnarẽ cajĩñaworãrẽ bairo, roro caánarẽ, “Caroaro na jãã átirotimasĩña,” mu̶jãã ĩnucũña. 20Tunu, “Jãã pu̶ame Dios yaye quetire camasĩẽnarẽ tie quetire jãã quetibu̶ju̶ masĩña. Tunu bairoa catũ̶goñatutuawẽpũ̶ẽna cũ̶ãrẽ caroaro na átiãnio joroque jãã átimasĩña,” mu̶jãã ĩnucũña. “Jãã, merẽ jãã cũ̶goya Moisés ãnacũ̶ cũ̶ caroticũrĩqũẽ cariape quetibu̶ju̶rique majũrẽ. Tie jũ̶gori tore bairo jãã átimasĩña,” mu̶jãã ĩ tũ̶goñanucũmiña. 21Bairo, “Aperãrẽ caquetibu̶ju̶masĩrĩ majã jãã ãniña,” caĩrã nimirãcũ̶ã, ¿nopẽĩrã mu̶jãã majũ yeri roro mu̶jãã caátie pu̶amerẽ mu̶jãã quetibu̶ju̶gaetiyati? “Yajaeticõãña,” caĩquetibu̶ju̶rã nimirãcũ̶ã, ¿nopẽĩrã mu̶jãã cũ̶ã mu̶jãã yajapainucũñati? 22Tunu aperãrẽ, “Apei nu̶mo mena roro átiepeeticõãña,” caĩquetibu̶ju̶rã nimirãcũ̶ã, ¿nopẽĩrã tore bairo mu̶jãã cũ̶ã apei nu̶mo mena mu̶jãã átiepenucũñati? Tunu camasã na cawericarãrẽ, “Na ĩroaeticõãña,” caĩquetibu̶ju̶rã nimirãcũ̶ã, ¿nopẽĩrã na caĩroari wii macããjẽrẽ mu̶jãã yajanucũñati? 23Tunu, “Jãã, Moisés ãnacũ̶ cũ̶ caroticũrĩqũẽrẽ camasĩrã majũ jãã ãniña aperã netõrõ,” caĩrã nimirãcũ̶ã, tiere cabaibotiorãrẽ bairo mu̶jãã tuaya, tie quetire tũ̶gou̶saena. Tie jũ̶gori aperã pu̶ame Diore cũ̶ na boyetiepeo joroque ána mu̶jãã átiya. 24Torea bairo cariape ĩ quetibu̶ju̶yupa Dios ya tutipu̶ cũ̶ãrẽ: “Mu̶jãã, judío majã Dios cũ̶ caroticũrĩqũẽrẽ mu̶jãã cabaibotioĩñorĩjẽ jũ̶gori, aperã judío majã caãmerã pu̶ame Diore roro cũ̶ na bu̶su̶paio joroque mu̶jãã átiya,” ĩ quetibu̶ju̶yupa. 25Bairopu̶a, judío majã na caãnierẽ áti ĩñorã rupau̶ macããjẽrẽ yisetarique ñujãñuña, ni ũcũ̶ Moisés ãnacũ̶ cũ̶ caroticũrĩqũẽrẽ catũ̶gou̶sau̶ cũ̶ caãmata. Moisés ãnacũ̶ cũ̶ caroticũrĩqũẽrẽ catũ̶gou̶saecu̶ cũ̶ caãmata roque, cũ̶ rupau̶ macããtõrẽ cayisetarotiricu̶ nimicũ̶ã, cayisetaa mácũ̶rẽã bairo tuacõãñami cũ̶ catũ̶gou̶saetie jũ̶gori. 26Baipu̶a, apei cũ̶ rupau̶ macããtõrẽ cayisetaa mácũ̶ nimicũ̶ã, Moisés ãnacũ̶ cũ̶ caroticũrĩqũẽrẽ bairo caroaro cũ̶ caátie jũ̶gori, cũ̶ rupau̶ macããtõrẽ cayisetarotiricu̶re bairo tuayami Dios cũ̶ caĩñajoro. 27Bairo judío yau̶ caãmei cũ̶ rupau̶pu̶ cayisetarotiecu̶ nimicũ̶ã, Dios cũ̶ carotirore bairo caácu̶ pu̶ame qũĩñabesegu̶mi apei cũ̶ rupau̶pu̶re cayisetarotiricu̶ nimicũ̶ã, tunu bairoa Moisés ãnacũ̶ cũ̶ caroticũrĩqũẽrẽ cũ̶gomicũ̶ã, tiere catũ̶gou̶saecu̶ pu̶amerẽ. 28Judío majãrẽ bairo ãnajẽ cu̶taje pu̶ame bui macããjẽ átiãnajẽ mee niña. Marĩ rupau̶ macããjẽ yisetarotirique cũ̶ã bui marĩ rupau̶ macããjẽ átaje jeto mee niña. 29Cariape judío majãrẽ bairo majũ ãnajẽ cu̶taje pu̶ame marĩ yeri marĩ pupeapu̶ ãnajẽ cu̶taje niña. Tunu bairoa marĩ rupau̶ yisetarotirique mena átiãnajẽ cu̶taje cũ̶ã rotirique woaturique mee niña. Marĩ yeripu̶ macããjẽ Espíritu Santo jũ̶gori marĩ catũ̶goñawasoarique niña cariape judío majã majũ ãnajẽ cu̶taje. Tore bairo cũ̶ yeripu̶ catũ̶goñawasoaricu̶ roquere, “Ñe ũnie carorije wapa cacũ̶goecu̶ niñami,” qũĩ ĩñañami Dios, aperã camasã tore bairo cũ̶ na caĩ ĩñaetimiatacũ̶ãrẽ.

will be added

X\