ROMANOS 15

1Marĩ, Jesucristo mena tutuaro catũ̶goñatutuawẽpũ̶rã marĩ caãmata, aperã catũ̶goñatutuawẽpũ̶ẽnarẽ na ju̶ána, marĩ majũã catũ̶goñatutuawẽpũ̶ẽnarẽ bairo tũ̶goñarĩqũẽ cu̶tirotiya. Marĩ majũã marĩ caátijesorije ũnie jetore áperirotiya. 2Marĩ nipetiro aperã caroaro na caãnipee, na caĩñajesorije ũnie pu̶amerẽ caátiparã marĩ ãniña, Jesucristo mena nemojãñurõ na catũ̶goñatutuanemoparore bairo ĩrã. 3Jesucristo cũ̶ã cũ̶ yaye caãnipee jetore ápeyupi, ati yepapu̶ ãcũ̶. Dios yaye woaturica tutipu̶ cũ̶ãrẽ cũ̶ cabairiquere atore bairo ĩ woatuyupa: “Mu̶rẽ roro caĩbujioatana yu̶ pu̶amerẽ roro ĩnucũñama,” ĩ woatuyupa Cristo cũ̶ pacu̶re cũ̶ caĩrĩqũẽrẽ. 4Nipetirije tirũ̶mu̶pu̶ Dios yaye queti na cawoaturiquere marĩ masĩrotirã woatuyupa. Bairi popiye baimirãcũ̶ã, tie caquetibu̶ju̶rore bairo caátimasĩrã ãnirĩ Jesucristo mena marĩ tũ̶goñatutuacõã ninucũgarã. Tunu bairoa tiere bueri bero caroaro yerijõrõ marĩ ãnimasĩgarã. Tore bairo caãna ãnirĩ Dios mena marĩ caãnipeere u̶seanirĩqũẽ mena marĩ cotegarã. 5Bairo roro popiye marĩ cabaiata, Dios pu̶ame roque Jesucristo mena marĩ tũ̶goñatutuacõãnio joroque marĩ átinucũñami. Tunu yerijõrõ marĩ ãnio joroque caácu̶ niñami. Bairi mu̶jããrẽ Jesucristo cũ̶ caátiãnatõrẽ bairo, jĩcãrõrẽ bairo caãnajẽcu̶na mu̶jãã ãnio joroque átigu̶mi. 6Bairo cũ̶ caáto jũ̶gori, tocãnacãũ̶pu̶a jĩcãrõrẽ bairo tũ̶goñarĩ u̶seanirõ atore bairo mu̶jãã átigarã: Dios, marĩ Quetiupau̶ Jesucristo pacu̶re jĩcãrõ mena, “Mu̶, cañuu̶ mu̶ ãniña,” cũ̶ mu̶jãã ĩ basapeogarã. 7Jesucristo mu̶jããrẽ cũ̶ caátatorea bairo mu̶jãã cũ̶ã mu̶jãã mena macããnarẽ na ĩñamairĩ caroaro nu̶cũ̶bu̶gorique mena na ĩñaña. Bairo mu̶jãã caáto ĩñarã, “Caroú̶ cañuu̶ niñami Dios,” ĩ ĩñagarãma camasã cũ̶ã. 8Tunu atore bairo mu̶jãã ñi quetibu̶ju̶nemoña: Jesucristo pu̶ame jãã, judío majãrẽ jãã ju̶átigu̶ asúpi ati yepapu̶re. Tie Dios cũ̶ caátipeere jãã ñicũ̶jãã ãnanarẽ cũ̶ caĩjũ̶goyeticũrĩcãrõrẽ bairo cañuu̶ ãnirĩ cũ̶ caátipeyorijere marĩ masĩõ joroque ĩ, asúpi Jesús ati yepapu̶re. 9Tunu bairoa mu̶jãã, judío majã caãmerã cũ̶ã nocãrõ mu̶jãã cũ̶ caĩñamairõ jũ̶gori Diore mu̶jãã cabasapeoparore bairo ĩ, asúpi Jesús ati yepapu̶. Dios ya tutipu̶ cũ̶ã Jesucristo cũ̶ pacu̶re cũ̶ caĩbu̶su̶riquere atore bairo ĩ woatuyupa: “Bairi judío majã caãmerã watoapu̶ ãcũ̶, ¡nocãrõ cañuu̶ majũrẽ mu̶ yu̶ basapeogu̶! ‘¡Nocãrõ Dios catutuau̶ majũ niñami!’ ĩrĩ mu̶ yaye basarique mena mu̶ yu̶ basapeogu̶,” ĩ woatuyupa Cristo cũ̶ caĩrĩqũẽrẽ. 10Tunu apepau̶pu̶ Dios ya tutire na cawoaturique atore bairo ĩnemoña: “¡Dios ya poa macããna cũ̶ cabesericarã mena mu̶jãã ape yepaa macããna judío majã caãmerã cũ̶ã u̶seanirĩ ãña!” 11Tunu aperopu̶ ĩ woatunemoñupã ti tutipu̶re: “Ape yepaa macããna judío majã caãmerã nipetiro tocãnacã poa masapoari macããna cũ̶ã, ¡marĩ Quetiupau̶re cũ̶ basapeoya!” ĩ woatuyupa. 12Isaías cũ̶ã atore bairo ĩ woatuyupi: “Isaí pãrãmi ape tuti bero macããcũ̶ buiagu̶mi. Cũ̶rẽ Dios pu̶ame judío majã caãmerã quetiupau̶re bairo caãcũ̶ cũ̶ cũgu̶mi. Bairi na pu̶ame, ‘Jããrẽ canetõõpau̶ niñami,’ cũ̶ mena ĩ tũ̶goñatutuagarãma,” ĩ woatuyupi Isaías ãnacũ̶. 13Bairi camasãrẽ Jesucristo mena tũ̶goñatutua masĩrĩqũẽrẽ cajonucũũ̶ Dios pu̶ame u̶seanirĩqũẽ, yerijõrõ ãnajẽ cu̶taje cũ̶ãrẽ ñe ũnie ru̶saricaro mano mu̶jããrẽ cũ̶ jonemoáto. Tunu bairoa Espíritu Santo cũ̶ camasĩrĩjẽ jũ̶gori nemojãñurõ cũ̶ mena mu̶jãã catũ̶goñatutuamasĩpeere cũ̶ jonemoáto. 14Yu̶ yarã, yu̶ bairãrẽ bairo caãna, ñe ũnie ru̶saricaro mano mu̶jããrẽ atore bairo ñi tũ̶goñatutuacõãña: Caroaro ñe ũnie ru̶saeto caátiãna mu̶jãã ãniña. Tunu Jesucristo yayere caroaro majũ camasĩrã mu̶jãã ãniña. Bairo caãna ãnirĩ mu̶jãã majũ mu̶jãã ãmeo quetibu̶ju̶ masĩña caroaro mu̶jãã caãnajẽ cu̶tipeere. 15Mu̶jãã, bairo caátiãnimasĩrã mu̶jãã caãnimiatacũ̶ãrẽ, ati tutipu̶re tutuaro mena yu̶ quetibu̶ju̶ woajoya, mu̶jãã catũ̶gojũ̶gorique jĩcã wãmerĩ mu̶jãã caãnipee caru̶sarijere mu̶jãã camasiritietiparore bairo ĩ. Dios yu̶re caroaro ácu̶, Jesucristo yaye quetire mu̶jããrẽ quetibu̶ju̶ rotijou̶ yu̶ cũwĩ. 16Bairi Jesucristore capaacoteire bairo yu̶ cũwĩ, judío majã caãmerã caroaro na caãniparore bairo ĩ. Bairo Jesucristore capaacoteire bairo yu̶ caãnie pu̶ame atore bairo niña: Dios, judío majã caãmerã cũ̶ãrẽ na cũ̶ canetõõgarije macããjẽ quetibu̶ju̶rique quetire na yu̶ quetibu̶ju̶nucũña. Bairo na quetibu̶ju̶ri yua, sacerdote majã Diore cũ̶ u̶seanio joroque ána waibu̶cu̶ riire na cajoemu̶gõrĩcãrõrẽ bairo yu̶ cũ̶ã Diore, “Ãnoa, mu̶ yarã niñama,” cũ̶ yu̶ caĩquetibu̶ju̶rije jũ̶gori Dios pu̶ame cũ̶ u̶seanio joroque átigu̶, na quetibu̶ju̶ yu̶ átiya judío majã caãmerãrẽ. Bairo yu̶ caáto, Espíritu Santo pu̶ame narẽ Dios yarã na ãnio joroque na átinucũñami. 17Torecu̶, yu̶ pu̶ame Jesucristo mena catũ̶goñatutuau̶ ãnirĩ Dios yu̶re cũ̶ caquetibu̶ju̶rotijocũrĩqũẽrẽ tũ̶goñarĩ bu̶tioro tie paarique mena yu̶ u̶seaniña. 18Judío majã caãmerã Jesucristo yaye quetire na tũ̶gou̶sao joroque ĩ, Jesucristo yu̶ cũ̶ camasĩõjorije mena yu̶ caátimasĩrĩ wãme jetore na yu̶ quetibu̶ju̶nucũña. Ape wãme ũno na yu̶ quetibu̶ju̶etinucũña. Bairi yu̶ caquetibu̶ju̶rije jũ̶gori, tunu yu̶ caátiãni ĩñomasĩrĩjẽ jũ̶gori jĩcããrã na tũ̶gou̶sao joroque na yu̶ átinucũña. 19Tunu Espíritu Santo yu̶ cũ̶ camasĩõjorije mena yu̶ caátijẽño ĩñomasĩrĩjẽ jũ̶gori na tũ̶gou̶sao joroque na yu̶ átinucũña. Tore bairo ácu̶, Jerusalén macãĩ quetibu̶ju̶ jũ̶goacú̶, Iliria cawãmecu̶topu̶ Jesucristo camasãrẽ cũ̶ canetõõrĩqũẽ quetire caroaro jĩcãrõ tũ̶ni cariape na yu̶ quetibu̶ju̶etawu̶. 20Aperã na caquetibu̶ju̶ ñesẽãẽtĩnucũrõpu̶ macããnarẽ Jesucristo yaye quetire yu̶ quetibu̶ju̶ ñesẽãganucũña. Aperã na caquetibu̶ju̶ricaropu̶ yu̶ quetibu̶ju̶buipeo ñesẽãgaetinucũña. 21Tore bairo yu̶ caátie pu̶ame Dios yaye quetire woarica tutipu̶ na cawoatujũ̶goyeticũrĩcãrõrẽã bairo baiya. Mai, atore bairo ĩ quetibu̶ju̶ woatuyupa: “Aperã camasã cũ̶ yaye quetire camasĩẽtãna nimirãcũ̶ã, tiere quetibu̶ju̶ecogarãma. Cũ̶ yaye queti na catũ̶goetajere tũ̶gomasĩjũ̶gogarãma,” ĩ woatuyupa Dios ya tutipu̶. 22Yu̶ caĩrõrẽ bairo ape macããrĩpu̶ macããnarẽ quetibu̶ju̶ñesẽãnucũrĩ, mu̶jãã tu̶pu̶ yu̶ ámasĩẽtĩña mai. “Roma macãpu̶ yu̶ águ̶,” nairõ ĩ tũ̶goñamicũ̶ã, yu̶ ámasĩẽtĩña. 23Baipu̶a, merẽ yu̶ paariquere yu̶ átiyaparoya ati yepaa macããna mena. Nocãrõ yoaro capee cũ̶marĩ majũ mu̶jããrẽ ñiñañesẽãũ̶ áganucũmiña. 24Bairi Españapu̶ ácú̶ roque mu̶jããrẽ ñiñanetõágu̶. Bairo nocãrõ caroaro u̶seanirõ mu̶jããrẽ yu̶ caĩñarõ bero, mu̶jãã pu̶ame roque yu̶re mu̶jãã caju̶áto yu̶ bootũ̶goñaña, Españapu̶ yu̶ caátí rũ̶mu̶ caãno. 25Baimicũ̶ã mai, Jerusalén macãpu̶ yu̶ águ̶, to marĩ yarã Jesucristore catũ̶gou̶sari majãrẽ na ju̶áti ácú̶. 26Jesucristore catũ̶gou̶sari majã Macedonia macããna, bairi Acaya yepa macããna cũ̶ã na majũã na caboro dinerore neñoñupã. Jerusalén macããna Jesucristore catũ̶gou̶sarã cabopacarãrẽ na jogarã, tiere neñoñupã. Torecu̶, tie dinerore Jerusalẽpu̶ na jeábojagu̶ yu̶ átiya mai. 27Na majũã na caboro tie dinerore neñoñupã. Bairo na caátaje ñujãñuña. Mai, cajũ̶goyepu̶re judío majã Jesucristore catũ̶gou̶sajũ̶goricarã cũ̶ yaye macããjẽ caroa quetire na quetibu̶ju̶ batojũ̶goyupa. Bairo caroaro na na caátaje ãmeoñe, na cũ̶ã na cacũ̶gorije ũnie mena na caju̶átinemopea niña. 28Bairo tie dinerore Jerusalén macããnarẽ na nuni yaparori bero, Españapu̶ ácú̶ mu̶jããrẽ ñiñanetõágu̶. 29Bairi ñe ũnie ru̶saricaro mano atore bairo ñi tũ̶goñatutuacõãña: Mu̶jãã tu̶pu̶ yu̶ caetaro marĩ nipetiropu̶rea caroa majũrẽ marĩ jomajũcõãgu̶mi Jesucristo. 30Yu̶ yarã, yu̶ bairãrẽ bairo caãna, mu̶jãã Jesucristore catũ̶gou̶sarã mu̶jãã ãniña. Tunu Espíritu Santo cũ̶ camasĩõjorije jũ̶gori caãmeomaimasĩrã mu̶jãã ãniña. Bairo caãna mu̶jãã caãnoi, yu̶re ju̶átinemorã, atore bairo mu̶jãã caáto yu̶ boya: Popiye baimicũ̶ã caroaro yu̶ caátiãnipeere Diopu̶re yu̶ jẽnibojaya. 31Dios, Judea yepa macããna Jesucristore catũ̶gou̶saena cañuena, roro yu̶re na caátipeere cũ̶ caẽñotaparore bairo ĩrã, Diopu̶re bu̶tioro yu̶ mu̶jãã jẽnibojawa. Tunu bairo Jesucristore catũ̶gou̶sarã Jerusalén macã macããnarẽ na caju̶átijorije na yu̶ cajeátiere ĩñarĩ bero na u̶seanio joroque ĩrã, Diopu̶re yu̶ jẽnibojaya. 32Bairo Diore yu̶ mu̶jãã cajẽnibojaro jũ̶gori u̶seanirĩqũẽ mena mu̶jãã ñiñau̶ etagu̶, Dios cũ̶ cabooata. Bairo topu̶ mu̶jããrẽ ĩñañesẽãũ̶pu̶ roque yua, mu̶jãã tu̶pu̶ yu̶ tũ̶goña yerijãmasĩgu̶. 33Bairi marĩ Pacu̶ Dios caroaro yerijõrõ ãnimasĩrĩqũẽrẽ cajou̶ mu̶jãã nipetiro mena cũ̶ ãnicõã ninucũáto. Bairoa to baiáto.

will be added

X\