ROMANOS 14

1Ni ũcũ̶ Jesucristo mena catũ̶goñatutua wẽpũ̶ẽcũ̶ cũ̶ caãmata, caroaro cũ̶ bocári cũ̶ qũẽnoña ñubueri majã mena. Cũ̶ ũcũ̶ mena bu̶su̶ri, tutuaro mena ãmeo bu̶su̶rique netõẽtĩcõãña. 2Mai, ĩcõñarĩ mu̶jãã yu̶ quetibu̶ju̶pa na ũna na cabairijere: Jĩcããrã, “Nipetiri wãme u̶gariquere jãã cau̶garo ñurõ,” ĩ tũ̶goñanucũñama. Bairo na caĩtũ̶goñamiatacũ̶ãrẽ, aperã Jesucristo mena caroaro catũ̶goñatutua wẽpũ̶ẽna pu̶ame oté jeto u̶gari ãninucũñama. Waibu̶toa rii ũnierẽ u̶gaetinucũñama. 3Bairi ni jĩcãũ̶ ũcũ̶ nipetiri wãme u̶gariquere cau̶gau̶ cũ̶ caãmata, apei jĩcã wãme ũnie cau̶gaetinucũũ̶ pu̶amerẽ cũ̶ qũĩñateeticõãto. Tunu bairo jĩcã wãme ũno u̶gariquere cau̶gaecu̶ pu̶ame cũ̶ã, apei nipetiro u̶gariquere cau̶ganucũũ̶rẽ roro cũ̶ cũ̶ bu̶su̶paicoteeticõãto. Merẽ cũ̶ cũ̶ã Dios cũ̶ cabesericu̶ niñami. 4Bairo Diore capaacoteri majõcu̶ cũ̶ caãnoi roro cũ̶ bu̶su̶paicoteeticõãña. Caroaro cabaimasĩata, o roro cabaiata cũ̶ãrẽ, jĩcãũ̶ cũ̶ quetiupau̶ jeto tie cabairijere qũẽnomasĩñami. Bairi marĩ Quetiupau̶ Jesucristo roque caroaro cũ̶ cabaipeere caátimasĩ majũ niñami. Bairi nipetirije cau̶gamasĩ cũ̶ãrẽ caroaro cũ̶ tuao joroque cũ̶ átigu̶mi cũ̶ caátimasĩrĩjẽ jũ̶gori. 5Apeyere mu̶jãã ñi cõñanemogu̶ tunu: Jĩcããrã, ape rũ̶mu̶ netõjãñurõ caãnimajũrĩ rũ̶mu̶ cũ̶gonucũñama Diore na cañubuepa rũ̶mu̶rẽ. Aperã pu̶ame, “Tocãnacã rũ̶mu̶a jĩcãrõ tũ̶ni Diore cañubuepee niña,” ĩ tũ̶goñanucũñama. “Tore bairo marĩ caáto boyami Dios,” ĩ tũ̶goñarĩ, tore bairo cariape caátiparã mu̶jãã ãniña, mu̶jãã caĩtũ̶goñarõrẽã bairo yua. 6Jĩcãũ̶ ũcũ̶ jĩcã rũ̶mu̶rẽ, “Dios ya rũ̶mu̶ niña,” ĩrĩ Diore cũ̶ caĩroacõãmata, caroaro ácu̶ átiyami. Apei, “Tocãnacã rũ̶mu̶a jĩcãrõ tũ̶ni Diore cañubuepee niña,” ĩ tũ̶goñarĩ Diore cũ̶ caĩroacõãmata, caroaro ácu̶ átiyami cũ̶ cũ̶ã. Torea bairo apei cũ̶ã, “Nipetiri wãme u̶gariquere u̶garotiya,” ĩrĩ Diore cũ̶ caĩroacõãmata, caroaro ácu̶ átiyami. Bairo u̶gari, Diore, “Yu̶ mena mu̶ ñujãñuña,” qũĩnucũñami. Apei, “Waibu̶cu̶ riire u̶gaetirotiya,” ĩ tũ̶goñarĩ Diore cũ̶ caĩroacõãmata, cũ̶ cũ̶ã caroaro ácu̶ átiyami. Cũ̶ cau̶garije otére u̶gari, Diore, “Yu̶ mena mu̶ ñujãñuña,” cũ̶ yeripu̶ qũĩ jẽnimasĩcõãñami cũ̶ cũ̶ã. 7Jesucristo niñami marĩ Quetiupau̶. Bairi marĩ caborore bairo jeto caátiãnimasĩparã mee marĩ ãniña. Marĩ cacatiri rũ̶mu̶ caãno, o marĩ cariaro bero cũ̶ãrẽ marĩ Quetiupau̶ cũ̶ carotirore bairo caátiparã marĩ ãniña. 9Jesucristo pu̶ame riacoamicũ̶ã tunu catiyupi, nipetiro camasã cacatirã, cariaricarã cũ̶ãrẽ quetiupau̶ majũ cũ̶ caãnimasĩparore bairo ĩ. 10Bairi, ¿dopẽĩrã mu̶jãã pu̶ame aperã Jesucristore catũ̶gou̶sarãrẽ na mu̶jãã bu̶su̶paicotenucũñati? ¿Dopẽĩrã narẽ cabu̶goro macããnarẽ bairo na mu̶jãã ĩñanucũñati? Marĩ nipetiro Dios cũ̶ caĩñabeseri rũ̶mu̶ caãno, marĩ caátaje caãno cãrõrẽ marĩ ĩñabese ecogarã. Bairi marĩ yarã Jesucristore catũ̶gou̶sarãrẽ na ĩñabeserãrẽ bairo caĩetiparã marĩ ãniña. 11Dios yaye woaturica tutipu̶ cũ̶ãrẽ Dios cũ̶ caĩrĩqũẽrẽ atore bairo woatuyupa: “Yu̶, caãnicõãninucũũ̶ ãnirĩ mu̶jããrẽ cariape quetibu̶ju̶ ñiña cabaipeere: Nipetiro camasã ñiroagarãma. Ru̶popatuuri mena etanumurĩ nipetiro, ‘Mu̶, Dios, cañuu̶ catutuau̶ majũ mu̶ ãniña,’ ñi basapeogarãma,” ĩ woatuyupa. 12Tie na cawoaturiquere tũ̶gori bero, atore bairo marĩ masĩña: Marĩ, tocãnacãũ̶pu̶rea ati yepapu̶ ãna, nipetirije marĩ caátajere marĩ jẽniñagu̶mi Dios. “¿Dopẽĩrã tore bairo mu̶jãã áti?” marĩ ĩ jẽniñagu̶mi. Bairo cũ̶ caĩjẽniñarõ, cũ̶ marĩ caquetibu̶ju̶pea niña. 13Bairo tiere tũ̶goñarĩ marĩ caãmeobu̶su̶painucũrĩjẽrẽ marĩ jãnarõã. Bairo pu̶ame átirotiya: Mu̶jãã yarã Jesucristore catũ̶gou̶sari majãrẽ, mu̶jãã caátiãnie mena roro na tũ̶goña yapapuao joroque na ápericõãña. Jesucristo mena na catũ̶goñatutuarijere royetueticõãña. 14Yu̶, marĩ Quetiupau̶ Jesucristore catũ̶gou̶sau̶ ãnirĩ, ñe ũnie ru̶saeto atore bairo ñi tũ̶goñatutuacõãña: Nipetirije yu̶ cau̶garije cañurĩjẽ jeto niña. Apei pu̶amerã apeye ũnie u̶gariquere, “Tie u̶garique carorije niña,” cũ̶ caĩtũ̶goñaata, tie cũ̶rẽ carorije niña. 15Bairi aperã na cau̶gaetinucũrĩjẽrẽ na caĩñajoro mu̶jãã cau̶gaata, na pu̶ame roro tũ̶goñabujiorãma. Bairo mu̶jãã caápata, narẽ mairã mee mu̶jãã átiya. Jesucristo yucu̶pãĩpu̶ riari na cũ̶ãrẽ na netõõbojayupi. ¡Bairi u̶garique mu̶jãã cau̶gaãninucũrĩjẽ jũ̶gori Jesucristore na catũ̶goñatutuarije to yasio joroque na ápericõãña! 16Mu̶jãã caátiãnimasĩrĩjẽ jũ̶gori aperãrẽ tũ̶goña yapapuao joroque na mu̶jãã caápata, na caĩñajoro tore bairo átinemoeticõãña, mu̶jãã caátiere bu̶su̶pairema ĩrã. 17Marĩ, Dios cũ̶ carotimasĩrĩpau̶ macããna marĩ caãnoi, jĩcã wãme ũnie u̶gariquere u̶ga, eti, marĩ caátinucũrĩjẽ wapa maniña Dios cũ̶ caĩñajoro. Atore bairo marĩ caátie pu̶ame caãnimajũrĩjẽ niña: Caroaro cariape átiãnajẽ, tunu bairo aperã mena caroaro yerijõrõ mena ãnajẽ, tunu u̶seanio joroque ãmeo átaje pu̶ame roque caãnimajũrĩjẽ niña. Espíritu Santo cũ̶ camasĩõrĩjẽ jũ̶gori tiere caátiparã marĩ ãniña. 18Ni ũcũ̶ tore bairo átiãnajẽ cu̶tiri Jesucristo cũ̶ caborore bairo caácu̶ caroaro ácu̶ átiyami Dios cũ̶ caĩñajoro. Bairo caroaro cũ̶ caáto ĩñarĩ camasã cũ̶ã, “Caroaro átiyami,” qũĩgarãma. 19Bairi marĩ pu̶ame nipetiri wãme yerijõrõ ãnajẽ cu̶taje macããjẽrẽ caátiãninucũparã marĩ ãniña. Tiere caãna ãnirĩ yua, Jesucristo mena tũ̶goñatutuanemo joroque marĩ ãmeo átigarã. 20Bairi u̶garique mu̶jãã cau̶gaãninucũrĩjẽ jũ̶gori Dios cũ̶ caborore bairo na caátiere na átijãnao joroque ápericõãña. Bairopu̶a, nipetirije u̶garique cañurĩjẽ jeto niña. Aperã na cau̶gaetinucũrĩjẽrẽ na caĩñajoro marĩ cau̶garije jũ̶gori Jesucristo mena na catũ̶goñatutuarijere na jãnao joroque átaje pu̶ame roque cañuetie niña. 21Aperã catũ̶goñatutuawẽpũ̶ẽnarẽ, “Marĩ caátiãnie mena jũ̶gori Jesucristore na tũ̶gou̶sajãnao joroque na marĩ átire,” ĩrã, atore bairo marĩ caáto ñuña: Marĩ yau̶ cariire cau̶gaecu̶ cũ̶ caãmata, marĩ cũ̶ã u̶gaetirotiya. U̶se ocore caetiecu̶ cũ̶ caãmata, marĩ cũ̶ã etietirotiya. 22“Nipetiri wãme u̶gariquere cau̶gamasĩrã jãã ãniña,” caĩtũ̶goñatutuarã na caãmata, na caátiãnimasĩrĩjẽrẽ Dios jetore cũ̶ na caquetibu̶ju̶ro ñuña. ¡Ni jĩcãũ̶ ũcũ̶ cũ̶ caátie mena, “Dios cũ̶ caĩñajoro caroaro yu̶ átiya,” caĩtũ̶goñamasĩ pu̶ame u̶seanirĩ niñami! 23Ni ũcũ̶ cũ̶ cau̶gapeere, “Atiere yu̶ cau̶garo ñuetõ,” ĩ tũ̶goñamicũ̶ã, tiere cũ̶ cau̶gaata, tie wapa buicu̶tiyami, cariape cũ̶ catũ̶goñatutuaetie jũ̶gori. Nipetirije marĩ caátipeere, “Atie marĩ caátipee cañurĩjẽ niña Dios cũ̶ caĩñajoro,” caĩtũ̶goñatutuarã nimirãcũ̶ã, ricaati marĩ caápata, carorije macããjẽrẽ ána marĩ átiya.

will be added

X\