ROMANOS 13

1Dios jeto rotimasĩrĩqũẽrẽ jomasĩñami camasãrẽ. Torena, ati yepa quetiuparã cũ̶ã Dios cũ̶ carotimasĩrĩjẽ jũ̶gori ati yepa macããna camasãrẽ na rotimasĩnucũñama. Cũ̶ cacũrĩcãrã majũ niñama. Bairi nipetiro na quetiuparã na caátirotirore bairo jĩcãrõ tũ̶ni tũ̶gou̶saya. 2Bairi ni jĩcãũ̶ ũcũ̶ ati yepa quetiuparãrẽ cabaibotiou̶, Dios cũ̶ caátiroticũrĩqũẽrẽ cabaibotiou̶re bairo tuayami. Bairo roro cabaibotiorãrẽ popiye na baio joroque na átigu̶mi Dios. 3Ati yepa macããna quetiuparã, caroaro caátiãna camasãrẽ roro caátiparã mee niñama. Camasã roro caátipairã roquere, uwitũ̶goñao joroque roro na átinucũñama na yaye wapa. Bairi quetiuparã mena tũ̶goña uwiricaro mano mu̶jãã caãnigaata, caroaro átiãnajẽ cu̶timasĩña. Bairo caroaro mu̶jãã caátiãnimasĩata, quetiuparã pu̶ame, “Caroaro mu̶jãã átiãnimasĩña mu̶jãã roque,” mu̶jãã ĩgarãma. 4Ãnoa quetiuparã Dios cũ̶ cacũrĩcãrã cũ̶ caborore bairo mu̶jããrẽ caju̶átiparã majũrẽ na cũñupĩ. Tore bairo cũ̶ cacũrĩcãrã na caãnimiatacũ̶ãrẽ, roro caána mu̶jãã caãmata, na mu̶jãã uwigarã mu̶jãã quetiuparãrẽ. Na pu̶ame cabu̶goro majũã carotimasĩparã, Dios cũ̶ cacũrĩcãrã mee niñama. Dios roro caánarẽ na caĩñabeseparore bairo ĩ, quetiuparãrẽ bairo cũ̶ cacũrĩcãrã niñama. 5Bairi mu̶jãã quetiuparã na caĩrĩjẽrẽ caroaro tũ̶gopeorotiya, mu̶jããrẽ popiye na áperio joroque ĩrã. Tunu bairo, “Dios, marĩ quetiuparã marĩ na carotiro boyami,” mu̶jãã yeripu̶ ĩ tũ̶goñarĩ, mu̶jãã quetiuparãrẽ caroaro tũ̶gopeorotiya. 6Dios cũ̶ caborore bairo capaacoteparã majũrẽ bairo cũ̶ cacũrĩcãrã na caãno jũ̶gori, impuestos gobierno yaye na cawapajẽnirĩjẽ ũnie cũ̶ãrẽ na wapa joya. 7Tocãnacãũ̶pu̶a ati yepa macããna quetiuparãrẽ caroaro mu̶jãã caátipeere na caátirotirore bairo na átibojaya. Ni ũcũ̶rẽ apeye ũnierẽ cũ̶ mu̶jãã cawapamoata, tie wapare cũ̶ wapa joya. Tunu bairo impuestos na cawapajẽnirĩjẽ ũnie cũ̶ãrẽ na wapa joya. Nipetiro na ũnarẽ nu̶cũ̶bu̶gorique mena ĩñarĩ, caroaro na ĩroaya. 8Aperãrẽ na wapamoeticõãña. Jicoquei na mu̶jãã cawapamorĩjẽrẽ na wapatipeyocõãña. Ãmeo mairĩqũẽ pu̶ame capetietie niña. Bairi ãmeo maicõãninucũña. Ni ũcũ̶ aperãrẽ camaicõãninucũũ̶ pu̶ame Dios cũ̶ caátiroticũrĩqũẽ nipetirijere caroaro cariape ácu̶ átiyami. 9Dios atore bairo átiroticũñupĩ: “Mu̶jãã nu̶moa caãmerã mena, o mu̶jãã manapũ̶ã caãmerã mena roro átiepeeticõãña. Tunu camasãrẽ na pajĩãẽtĩcõãña. Tunu yajaeticõãña. Tunu aperã yaye cũ̶ãrẽ ĩñau̶goeticõãña,” ĩ cũñupĩ Dios. Atie, bairi apeye roticũrĩqũẽ mena neñorĩ jĩcã risero mena atore bairo marĩ ĩ quetibu̶ju̶ masĩña: “Mu̶jãã majũ rupau̶re mu̶jãã camairõrẽã bairo aperã camasã cũ̶ãrẽ na maiña,” marĩ ĩ masĩña. 10Camaimasĩrã pu̶ame aperãrẽ roro áperinucũñama. Bairi tore bairo narẽ na camaimasĩcõãmata, Dios cũ̶ caroticũrĩqũẽrẽ caátipeyocõãrãrẽ bairo tuayama. 11Atie nipetirije ãme marĩ caãnierẽ catũ̶goñamasĩnemocõãnipee niña. Merẽ Dios marĩrẽ cũ̶ canetõõpa rũ̶mu̶ cõñarõ majũ baiya. Cajũ̶goyepu̶ Dios yaye quetire cariape marĩ catũ̶gou̶sajũ̶gorica rũ̶mu̶ netõjãñurõ cõñarõ majũ baiya. Bairi ãmea masacatiri caãnijũ̶goyecu̶tiparã marĩ ãniña. Cacãnirãrẽ bairo baietirotiya. 12Jesucristo cũ̶ caetapa rũ̶mu̶ cõñarõ majũ baiya. Ape rũ̶mu̶ cabusuatóre bairo merẽ ti rũ̶mu̶ etaro baiya. Bairi ati u̶mu̶recóo macããna cañuena canaitĩãrõpu̶ caãnarẽ bairo caãna roro na caátiere bairo áperirotiya. Jĩcãũ̶ soldau cũ̶ wapana mena ãmeo qũẽgu̶, ãpõã jutirore jãñarĩ, cũ̶ besu mena cũ̶ caãnorẽã bairo marĩ cũ̶ã wãtĩ marĩ wapacu̶ roro marĩ cũ̶ caátigarijere netõnu̶cãcõãgarã, Jesucristo mena tũ̶goñatutua nemorotiya. 13Bairi u̶mu̶reco cabaupetiro majũ caãnarẽ bairo caãna ãnirĩ caroa macããjẽ jeto caátiparã marĩ ãniña. Ati u̶mu̶recóo macããna bose rũ̶mu̶ caãno eticũmurĩ na caawajañesẽãrõrẽ bairo cabaietiparã marĩ ãniña. Tunu carõmia mena roro caáperiparã marĩ ãniña. Carõmia cũ̶ã caũ̶mu̶a mena roro caáperiparã niñama. Ãmeo qũẽrĩqũẽ cũ̶ãrẽ caáperiparã marĩ ãniña. Tunu aperã yayere caĩñau̶garipeaetiparã marĩ ãniña. 14Bairo pu̶ame marĩ átigarã: Soldau cũ̶ rupau̶re cũ̶ caqũẽnorõrẽ bairo marĩ cũ̶ã marĩ Quetiupau̶ Jesucristo cũ̶ catutuarije mena tutuaro marĩ yeri tũ̶goñatutuagarã. Ati rupau̶ mena roro marĩ caátiganucũrõrẽ bairo marĩ átiãmerĩgarã yua.

will be added

X\