ROMANOS 12

1Yu̶ yarã, yu̶ bairãrẽ bairo caãna, Dios marĩrẽ caroaro ĩñamai ãninucũñami. Bairi mu̶jããrẽ tutuaro mena atore bairo mu̶jãã yu̶ átirotiya: Diore qũĩroarã camasã waibu̶cu̶ riire altar mesapu̶ cũrĩ na cajoemu̶gõjoricarore bairo mu̶jãã cũ̶ã Diore qũĩroarã mu̶jãã rupau̶ mena roro mu̶jãã caátiganucũrĩjẽrẽ cũcõãrĩ cũ̶ carotirore bairo jeto áticõã ninucũña. “Mu̶ yarã majũ jãã ãniña,” cariape qũĩrĩ, caroa macããjẽrẽ áticõã ninucũña. Dios mu̶jãã mena cũ̶ cau̶seaniparore bairo ĩrã, tore bairo mu̶jãã caáto ñuña. Tore bairo átiri, Dios mena mu̶jãã catũ̶goñatutuarijere cariape cũ̶ masĩõ joroque mu̶jãã átigarã. 2Ati u̶mu̶recóo macããna cañuena na caátiãninucũrõrẽ bairo átiãmerĩcõãña. Atore bairo pu̶ame mu̶jãã caátipee ñuña: Mu̶jãã cacatiri rũ̶mu̶ cãrõ nemojãñurõ mu̶jãã catũ̶goñarĩjẽrẽ tũ̶goñawasoacõã ninucũña, caroaro cariape mu̶jãã caátiãnimasĩparore bairo ĩrã. Bairo mu̶jãã caátiãmata, caroaro Dios cũ̶ caborore bairo mu̶jãã caátiãnipeere mu̶jãã masĩgarã. Caroaro átajere, bairi Dios cũ̶ caĩñajesorije ũnierẽ, bairi ñe ũnie caru̶saetie cariape macããjẽ átaje cũ̶ãrẽ mu̶jãã átimasĩgarã. 3Dios, yu̶re mairĩ mu̶jãã quetibu̶ju̶rotijogu̶ yu̶ besewĩ. Bairi mu̶jãã nipetirore ñiña: Ni ũcũ̶ mu̶jãã mena macããcũ̶ cũ̶ caátiãninucũmasĩrĩjẽ mena netõjãñurõ caãnimajũũ̶rẽ bairo cũ̶ majũã cũ̶ tũ̶goñaeticõãto. Atore bairo pu̶ame cũ̶ catũ̶goñarõ boya: “Jesucristo mena yu̶ catũ̶goñatutuaro jũ̶gori cũ̶ caátiãnimasĩpeere yu̶ cũ̶ cajorica wãme cãrõ yu̶ caátimasĩrõ jeto ñuña,” qũĩ tũ̶goñaáto. 4Ĩcõñarĩ mu̶jãã yu̶ quetibu̶ju̶pa mai: Marĩ rupau̶ jĩcã rupau̶a nimirõcũ̶ã, capee wãmecu̶ti ricawatiya. Tie nipetirije jĩcãrõrẽ bairo ãmerĩña. Ricaati jeto niña. Marĩ caapee mena marĩ ĩñaña. Marĩ ãmoo operi mena marĩ tũ̶goya. Marĩ ru̶pori mena marĩ áya. 5Marĩ, Jesucristo mena catũ̶goñatutuarã cũ̶ã torea bairo marĩ ãniña. Capããrã nimirãcũ̶ã, cũ̶ mena macããna jĩcã rupau̶re bairo caãna marĩ ãniña. Marĩ nipetiro jĩcã rupau̶ ãnituroricarore bairo marĩ ãniña. 6Marĩ tocãnacãũ̶pu̶rea ricaati wãme jeto cariape marĩ caátimasĩpee ũnierẽ marĩ joyupi Dios. Noo cũ̶ cajogarijere marĩ joyupi. Bairi tiere caroaro marĩ átigarã. Dios yaye quetire marĩ caquetibu̶ju̶masĩpeere cũ̶ cajoricarã marĩ caãmata, marĩ catũ̶goñatutuaro cãrõ tiere camasãrẽ na marĩ quetibu̶ju̶garã. 7Camasãrẽ ju̶átinemomasĩrĩqũẽrẽ cũ̶ cajoricarã marĩ caãmata, caroaro mena na marĩ ju̶átinemogarã. Tunu bairo jũ̶gobuemasĩrĩqũẽrẽ cũ̶ cajoricarã marĩ caãmata, camasãrẽ caroaro na marĩ buegarã. 8Camasãrẽ yeri ñajããõ joroque átimasĩrĩqũẽrẽ cũ̶ cajoricarã marĩ caãmata, caroaro mena na tũ̶goñao joroque na marĩ áticõã ninucũgarã. Tunu bairo camasãrẽ dinero, o apeye ũnierẽ jomasĩrĩqũẽrẽ cũ̶ cajoricarã marĩ caãmata, u̶seanirĩqũẽ mena na marĩ cajoro ñuña. Camasãrẽ átijũ̶goãnimasĩrĩqũẽrẽ cũ̶ cajoricarã marĩ caãmata cũ̶ãrẽ, caroaro tũ̶goñamasĩrĩ, nu̶cũ̶bu̶gorique mena na marĩ caátiãnijũ̶goãnimasĩrõ ñuña. Tunu bairoa camasãrẽ ĩñamaimasĩrĩqũẽrẽ cũ̶ cajoricarã marĩ caãmata cũ̶ãrẽ, u̶seanirĩqũẽ mena na marĩ ju̶átinemogarã. 9Cariape ãmeo maiãña. Di rũ̶mu̶ ũno carorije macããjẽrẽ ĩñaboeticõãña. Caroa macããjẽ pu̶amerẽ átiãnicõã ninucũña. 10Jesucristore catũ̶gou̶sarã ãnirĩ jĩcãũ̶ pũnaarẽ bairo ãmeo maiña. Mu̶jãã caborore bairo mu̶jãã caátigaparo ũnorẽã, aperã na caborore bairo pu̶ame ása. Nu̶cũ̶bu̶gorique mena ãmeo ĩñaña. 11Yeri tũ̶goñatutuarique mena Dios cũ̶ caborore bairo átijĩãticõã ninucũña. Cateeyepairãrẽ bairo tũ̶goñaeticõãña. 12“Caroaro majũ marĩ átigu̶mi Dios,” ĩ tũ̶goña u̶seanicõã ninucũña. Popiye tãmu̶omirãcũ̶ã, tũ̶goñaenarẽ bairo tiere tũ̶goñanetõõcõãña. Di rũ̶mu̶ ũno Diore cũ̶ jẽnijãnaeticõãña. 13Jesucristore catũ̶gou̶sarã na cabopacarijere mu̶jãã cacũ̶gorije mena na ricawoya. Tunu mu̶jãã tu̶pu̶ caetarãrẽ caroaro mena na qũẽnoña. 14Mu̶jããrẽ roro caánarẽ, “Caroare mu̶jãã cũ̶ joáto Dios,” na ĩña. Caroaro na cabaipee pu̶amerẽ Diore na jẽnibojaya. “Roro cũ̶ áparo mu̶jããrẽ Dios,” na ĩẽtĩcõãña. 15Noa ũna cau̶seanirã na caãmata, na ju̶u̶ u̶seaninemoña. Tunu noa ũna cayapapuarã na caãmata, na mena otiri na yeri tutuao joroque na átinemoña. 16Jĩcã majãrẽ bairo u̶seanirõ jĩcãrõ mena caroaro ãnajẽcu̶sa. “Jãã, aperã netõrõ caãnimajũrã jãã ãniña,” ĩ tũ̶goñaeticõãña. Tore bairo caĩẽna ãnirĩ, cabu̶goro macããna na caãnajẽ cu̶tiere bairo ãnajẽcu̶sa. “Aperã netõrõ camasĩrã majũ jãã ãniña,” ĩ tũ̶goñaeticõãña. 17Noa ũna mu̶jããrẽ roro na caáto, mu̶jãã cũ̶ã roro na átiãmeeticõãña. Caroaro átiãnajẽcu̶sa, noa ũna mu̶jããrẽ na bu̶su̶paietio joroque ĩrã. 18Noo mu̶jãã caátijĩãtiro cãrõ nipetiro camasã mena jĩcã majãrẽ bairo u̶seanirõ jĩcãrõ mena caroaro ãnajẽcu̶sa. 19Yu̶ yarã, yu̶ bairãrẽ bairo caãna, yu̶ camairã, mu̶jããrẽ ñiña: Noa ũna mu̶jããrẽ roro na caáto, mu̶jãã majũ roro na áticãnamueticõãña. Dios pu̶ame roque mu̶jããrẽ roro caánarẽ na ĩñabesegu̶mi. Cũ̶ yaye woaturica tutipu̶ cũ̶ãrẽ atore bairo ĩ woatuyupa: “ ‘Yu̶ roque camasãrẽ caĩñabesepau̶ yu̶ ãniña. Roro na caátajere cariape na ñiñabesegu̶,’ ĩñupĩ marĩ Quetiupau̶,” ĩ woatuyupa cũ̶ ya tutipu̶ cũ̶ãrẽ. 20Aperopu̶ cũ̶ãrẽ atore bairo ĩ woatunemoñupã: “Mu̶ pesu, mu̶rẽ catutii, cũ̶ caau̶ariata, cũ̶ u̶garique nuña. Cũ̶ cañemejipiata, cũ̶ etirique joya. Bairo cũ̶rẽ caroaro mu̶ caápata, roro mu̶ cũ̶ caátajere bobotũ̶goñagu̶mi,” ĩ woatuyupa. 21Bairi aperã mu̶jããrẽ roro na caátimiatacũ̶ãrẽ, roro na átiãmeeticõãña. Caroa pu̶amerẽ na átiãmeña. Bairo mu̶jãã caápata, roro mu̶jãã caãmeo átibujioataje buipearo ãninemoetigaro yua.

will be added

X\