ROMANOS 10

1Bairi yu̶ bairãrẽ bairo caãna, yu̶ pu̶ame, yu̶ yarã Israel ya poa macããna na canetõjĩãtipeere bu̶tioro yu̶ boya. Bairo bori yua, bu̶tioro Diopu̶re na yu̶ jẽnibojanucũña. 2Na pu̶ame Dios cũ̶ caborore bairo caroaro átiganucũmiñama. Bairo átiga ãninucũmirãcũ̶ã, na majũ na ya wãme ũnierẽ átiri, cũ̶ caborore bairo átijĩãtietinucũñama. 3Bairi, “Dios pu̶ame Jesucristo mena marĩ catũ̶goñatutuaro jũ̶gori, ‘Ñe ũnie carorije cawapa cũ̶goena niñama,’ marĩ ĩ masĩñami,” ĩ tũ̶goñamasĩẽtĩnucũñama. Bairo tũ̶goñamasĩẽtĩrĩ yua, na majũ na caátitutuarije mena ñe ũnie cawapa mánarẽ bairo ãniganucũmiñama. 4Jesucristo ati yepapu̶ etari, marĩ nipetiro camasã cũ̶ mena catũ̶goñatutuarãrẽ, Moisés ãnacũ̶ cũ̶ caroticũrĩqũẽrẽ carotiecocõãna meerẽ bairo caãna marĩ ãnio joroque ásupi, ñe ũnie carorije cawapa cũ̶goenarẽ bairo marĩ caãnimasĩparore bairo ĩ, Dios cũ̶ caĩñajoro. 5Atore bairo ĩ woatuyupi Moisés ãnacũ̶ cũ̶ caroticũrĩjẽrẽ na catũ̶gou̶sarije jũ̶gori canetõparãrẽ: “Ni jĩcãũ̶ ũcũ̶ roticũrĩqũẽ nipetirijere caátipeyomasĩ pu̶ame Dios mena ãnicõã ninucũgu̶mi,” ĩ woatuyupi. 6Baipu̶a, apeyera Jesucristo mena marĩ catũ̶goñatutuarije jũ̶gori marĩ canetõpee pu̶amerẽ tũ̶goñarĩ, apewẽpu̶ Moisés ãnacũ̶ cũ̶ cawoatucũrĩqũẽrẽ marĩ tũ̶goroa mai. Atore bairo ĩ woatuyupi: “¿Ni ũcũ̶ u̶mu̶recóopu̶ cũ̶ wãmu̶ácú̶ati?” ĩ woatuyupi. Bairo ĩgu̶ ĩñupĩ: “Jesucristo marĩ cũ̶ netõapáro ĩrã, ¿ni ũcũ̶rẽ u̶mu̶recóopu̶ cũ̶ wãmu̶árotiri, cũ̶ marĩ piiruiojoroticu̶ti?” ĩgu̶ ĩñupĩ Moisés. 7Apewẽpu̶ tunu ĩ woatunemoñupĩ: “¿Ni ũcũ̶ caũ̶cũ̶ãrĩ ope cariaricarã na caãnopu̶ cũ̶ ruiácú̶ati?” Bairo ĩgu̶ ĩñupĩ: “Jesucristo marĩ cũ̶ netõapáro ĩrã, ¿ni ũcũ̶rẽ ti opepu̶ cũ̶ ruiárotiri cũ̶ marĩ piiwãmu̶ojoroticu̶ti?” ĩgu̶ ĩñupĩ Moisés. 8Bairopu̶a, marĩ cajopee mee niña. Merẽ Moisés ãnacũ̶ cũ̶ cawoaturicarore bairo niña: “Merẽ mu̶jãã masĩña Dios yaye quetire. Bairo mu̶jãã yeripu̶ tie queti caãno jũ̶gorina, tiere mu̶jãã bu̶su̶nucũña,” ĩ woatuyupi. Bairi ni ũcũ̶rẽ marĩ cajopee mee niña. Tie quetibu̶ju̶rique Jesucristo mena tũ̶goñatutuarique macããjẽ quetirea camasãrẽ jãã quetibu̶ju̶nucũña. 9Tie quetibu̶ju̶rique atore bairo ĩ quetibu̶ju̶ya cariape marĩ cabu̶su̶rije mena: “Jesús marĩ Quetiupau̶ niñami,” ĩrĩ bero tunu, “Jesús cũ̶ cariacoamiatacũ̶ãrẽ tunu cũ̶ catioyupi Dios,” marĩ yeripu̶ marĩ caĩtũ̶goñaata, Dios pu̶ame roro marĩ caátaje wapare marĩ netõõgu̶mi. 10Bairi marĩ yeripu̶ Jesucristo mena tũ̶goñatutuari, tunu cũ̶ yarã marĩ caãnierẽ aperãrẽ na marĩ caquetibu̶ju̶ata, Dios pu̶ame, “Caroarã, ñe ũnie carorije cawapa cũ̶goena niñama,” marĩ ĩ ĩñagu̶mi. Bairo marĩ caápata, marĩ netõjĩãtigarã roro marĩ caátaje wapare. 11Torea bairo ĩ quetibu̶ju̶ya Dios ya tutipu̶ cũ̶ãrẽ: “Ni ũcũ̶ cũ̶ mena cariape catũ̶goñatutuau̶ pu̶ame di rũ̶mu̶ ũno, ‘Cabu̶goro majũ cũ̶ yu̶ boyupa,’ ĩ tũ̶goña yapapuaetigu̶mi,” ĩ quetibu̶ju̶ya. 12Bairi Dios pu̶ame judío majã, judío majã caãmerã cũ̶ãrẽ na ĩñaricawoetiyami. Jĩcãrõ tũ̶ni caroaro cariape na ĩñañami Dios camasãrẽ. Cũ̶, marĩ Quetiupau̶, nipetiro Quetiupau̶ jĩcãũ̶ã niñami. Bairi cũ̶rẽ cajẽnirãrẽ tocãnacã wãme caroare netõjãñurõ na jomajũcõãgu̶mi. 13Dios ya tutipu̶ atore bairo ĩ woatuyupa: “Tocãnacãũ̶pu̶a camasã roro na caátaje wapare Dios cũ̶ canetõõrõ borã, marĩ Quetiupau̶ wãmerẽ ĩrĩ cũ̶ na cajẽniata, na netõõgu̶mi,” ĩ woatuyupa. 14Dios yaye quetire caãnorẽ bairo cariape camasã na catũ̶gou̶saeticõãta, marĩ Quetiupau̶re cũ̶ jẽnimasĩẽnama. Bairo Jesucristo yaye quetire na catũ̶goeticõãta, cũ̶ yaye queti cũ̶ãrẽ caãnorẽ bairo cariape tũ̶gou̶samasĩẽnama. Tunu bairoa narẽ caquetibu̶ju̶rã na camanicõãta, tie Jesucristo yaye quetire dope bairo tũ̶gomasĩẽnama. 15Tunu bairoa Dios tocãnacãũ̶pu̶a caquetibu̶ju̶rã cũ̶ cajoeticõãta, cũ̶ yaye quetire camasãrẽ caquetibu̶ju̶parã manibujiorãma. Baipu̶a na joyupi. Dios yaye woarica tutipu̶ cũ̶ãrẽ na caetarijere atore bairo ĩña: “Aperã marĩrẽ, yeri ñajããõ joroque caátie caroa quetire na caquetibu̶ju̶rãetaro ĩñarĩ bu̶tioro marĩ u̶seaniña,” ĩ woatuyupa. 16Atie caroa quetire capããrã tũ̶gomirãcũ̶ã, tocãnacãũ̶pu̶a Israel ya poa macããna tũ̶gou̶sapetietiyama. Isaías ãnacũ̶ cũ̶ caĩwoaturicarore bairo niñama: “Dios, jãã Quetiupau̶, jãã caquetibu̶ju̶rijere ¿noa ũna tiere na tũ̶gou̶sayati? Jĩcããrã ũnaacã jeto tũ̶gou̶sanucũñama,” ĩ woatuyupi. 17Bairi camasã caroa quetire na catũ̶gou̶saro jũ̶gori Jesucristo mena catũ̶goñatutuarã tuanucũñama. Tie caroa queti, Jesucristo yaye majũ niña. 18Yu̶ pu̶ame atiere mu̶jãã yu̶ jẽniñapã mai: ¿Israel ya poa macããna tie quetire na tũ̶goesupari? Tũ̶goricarãma. Dios ya tutipu̶ cũ̶ãrẽ atore bairo ĩ woatuyupa: “Dios yaye quetire caquetibu̶ju̶ri majã nipetiropu̶ quetibu̶ju̶batoyupa. Bairi ati yepa nocãrõ cayoaropu̶ macããna cũ̶ã tie quetire nipetiropu̶ tũ̶goyupa,” ĩ woatuyupa Dios ya tutipu̶. 19Tunu mu̶jãã yu̶ jẽniñanemopa: ¿Israel ya poa macããna caroa quetire tũ̶gomirãcũ̶ã, tiere na tũ̶gomasĩẽsupari? Tũ̶gomasĩrĩcãrãma. Tiere quetibu̶ju̶nemogu̶, Moisés ãnacũ̶ cũ̶ caĩrĩqũẽrẽ mu̶jãã yu̶ quetibu̶ju̶gu̶. Atore bairo ĩ woatuyupi Moisés, Dios cũ̶ yarãrẽ cũ̶ caĩrĩqũẽrẽ: “Yu̶ yarã jeto meerẽ na yu̶ maigu̶. Tore bairo aperãrẽ na yu̶ camairõ ĩñarĩ, mu̶jãã, yu̶ yarã pu̶ame na mu̶jãã pesucu̶tigarã. Na mena mu̶jãã asiajãñugarã,” ĩñupĩ. 20Caberopu̶ tunu Isaías ãnacũ̶ israelita majã caãmerãrẽ ĩgu̶, atore bairo ĩnemoñupĩ: “Noa ũna yu̶re camacãẽtĩmirĩcãrã pu̶ame merẽ ãmerẽ yu̶ masĩjãñuñama. Bairo yu̶re camacãẽtãna pu̶amerẽ yu̶ camasĩrĩjẽrẽ na yu̶ áti ĩñowũ̶.” 21Tunu apewẽpu̶ Isaías pu̶ame israelita majãrẽ ĩgu̶, atore bairo ĩ woatuyupi: “Tocãnacã rũ̶mu̶ yu̶ wãmorĩrẽ jewãmu̶orĩ na yu̶ cotemiwũ̶, yu̶ yarã yu̶tu̶ na apáro ĩ. Na pu̶ame catũ̶gou̶sagaena, cabaibotiorã ãnirĩ yu̶tu̶ atígaema,” ĩ woatuyupi Isaías ãnacũ̶ israelita majãrẽ Dios cũ̶ caĩrĩqũẽrẽ.

will be added

X\