ROMANOS 1

1Yu̶, Pablo cawãmecu̶cu̶ Jesucristore capaabojari majõcu̶ yu̶ ãniña ati cartare cawoajou̶. Yu̶ beseri, yu̶ piijowĩ Dios, cũ̶ yau̶ apóstol yu̶ caãnipeere bou̶. Cũ̶ yaye queti camasãrẽ cũ̶ canetõõrĩqũẽ quetire yu̶ quetibu̶ju̶ rotijowĩ Dios. 2Merẽ baipu̶a, cũ̶ caquetibu̶ju̶rotijorã cũ̶ yarã profeta majã ãnana mena jũ̶gori quetibu̶ju̶cũñañupĩ camasãrẽ cũ̶ ya tutipu̶ atie caroa quetire. 3Atie yu̶ caquetibu̶ju̶pee pu̶ame marĩ Pacu̶ Dios macũ̶ Jesucristo marĩ Quetiupau̶ yaye queti, caroa queti niña. Mai, cũ̶ pu̶ame ati yepapu̶re buiau̶, ati rupau̶ cu̶tiri buiayupi rey David ãnacũ̶ pãrãmirẽ bairo. 4Cabero cũ̶ cariacoamiatacũ̶ãrẽ, Dios pu̶ame cũ̶ camasĩrĩjẽ jũ̶gori cũ̶ catioyupi Jesure. Bairi marĩ camasã pu̶ame tiere ĩñarĩ, “Jesús, Dios macũ̶ catutuau̶ majũ ñe ũnie caru̶saecu̶ niñami,” marĩ caĩmasĩparore bairo ĩ, cũ̶ catioyupi. Tunu bairoa, “Cũ̶ cũ̶ã Dios cũ̶ caãnajẽ cu̶tie nipetirijere cacũ̶gou̶ majũ niñami,” marĩ caĩmasĩparore bairo ĩ, cũ̶ catioyupi Dios Jesure. 5Dios pu̶ame Jesucristo jũ̶gori yu̶ besewĩ. Cũ̶ yau̶ apóstol paarique, caroa macããjẽ paarique majũrẽ yu̶ cũwĩ. Bairo yu̶ quetibu̶ju̶ rotijowĩ ati u̶mu̶recóo macããna nipetiropu̶ cũ̶ yaye nocãrõ caroa quetire tũ̶gou̶sari, cũ̶ carotirore bairo na caátiparore bairo ĩ. 6Bairi mu̶jãã, Roma macã macããna cũ̶ãrẽ Jesucristo yarã mu̶jãã ãnio joroque mu̶jãã ásupi Dios, tie caroa quetire mu̶jãã catũ̶gou̶saro jũ̶gori. Bu̶tioro mu̶jãã maiñami. Cũ̶ ya poa cũ̶ cabeserica poa macããna mu̶jãã ãnio joroque mu̶jãã ásupi. Bairi mu̶jããrẽ ñiña: Marĩ Pacu̶ Dios, bairi marĩ Quetiupau̶ Jesucristo mena caroare mu̶jããrẽ na jonemoáto. Tunu bairoa caroa yericu̶taje cũ̶ãrẽ na jonemoáto, ñiña. 8Caãnijũ̶goro atiere mu̶jããrẽ yu̶ quetibu̶ju̶jũ̶goya mai: Nipetiropu̶ macããna u̶seanirĩqũẽ mena tũ̶gonucũñama Jesucristo mena caroaro mu̶jãã catũ̶goñatutuãnierẽ. Bairo tocãnacãũ̶pu̶a mu̶jãã cabaiãnierẽ tũ̶gori, yu̶ pu̶ame, “Jãã Pacu̶, mu̶ ñujãñuña jãã mena,” ñinucũña Diopu̶re. Jesucristo jũ̶gori bairo ñi jẽninucũña. 9Nipetirije yu̶ catutuarije mena Dios cũ̶ carotirore bairo yu̶ átinucũña, cũ̶ macũ̶ yaye caroa quetire quetibu̶ju̶. Bairi Dios pu̶ame masĩñami tocãnacãnia cũ̶rẽ mu̶jãã yu̶ cajẽnibojanucũrĩjẽrẽ. 10Apeye cũ̶ãrẽ atore bairo cũ̶ ñi jẽninucũña: “Mu̶ caborije caãmata, yu̶re Roma macãpu̶ yu̶ mu̶ árotigu̶. Mu̶rẽ catũ̶gou̶sarãrẽ na ñiñagaya,” cũ̶ ñi jẽninucũña tocãnacãnia. 11Yoaro mu̶jãã tu̶pu̶ yu̶ ágatũ̶goña ãninucũmiña. Mu̶jãã, to macããnarẽ nemojãñurõ Jesucristo mena catũ̶goñatutuarã mu̶jãã caãnipeere bou̶, mu̶jããrẽ yu̶ quetibu̶ju̶nemogaya. Bairi mu̶jãã tu̶pu̶ yu̶ ágatũ̶goñanucũmiña bu̶tioro. 12Bairo mu̶jããrẽ ĩgu̶ ñiña: Yu̶, mu̶jãã cũ̶ã, pu̶ga nu̶gõãpu̶a Jesucristo mena marĩ tũ̶goñatutuaya. Bairo marĩ catũ̶goñatutuarijere caroaro yerijõrõ marĩ caãmeoquetibu̶ju̶parore bairo ĩ, mu̶jãã tu̶pu̶ yu̶ áganucũmiña bu̶tioro. 13Yu̶ bairãrẽ bairo caãna, atiere mu̶jãã camasĩrõ yu̶ boya: Ape yepaa macããna judío majã caãmerãrẽ na yu̶ caquetibu̶ju̶ro tũ̶gori bero, jĩcããrã cũ̶ tũ̶gou̶sanucũñama Jesure. Torea bairo mu̶jããtu̶ macããna cũ̶ã na catũ̶gou̶saparore bairo ĩ, mu̶jãã tu̶pu̶ yu̶ áganucũmiña. Bairo áganucũmicũ̶ã, mu̶jãã tu̶pu̶ yu̶ ámasĩẽtĩña mai. 14Tocãnacãũ̶pu̶rea camasãrẽ besericaro mano caroaro mena yu̶ quetibu̶ju̶ rotiwĩ Dios: Marĩ yaye cabu̶su̶rã, aperã marĩ yayere cabu̶su̶ena, bueri majã camasĩrã, aperã camasĩẽna cũ̶ãrẽ nipetirore yu̶ quetibu̶ju̶ rotijowĩ. 15Bairi mu̶jãã ya macã macããna Jesucristore catũ̶gou̶saenarẽ cũ̶ yaye quetire bu̶tioro na yu̶ quetibu̶ju̶ganucũña. 16Noa ũna camasã tie caroa quetire na catũ̶gou̶saata, na netõõgu̶mi Dios peeropu̶ na caábujiopeere. Bairi tie caroa quetire di rũ̶mu̶ ũno yu̶ quetibu̶ju̶boboetiya. Caãnijũ̶goro tie caroa quetire nipetiro judío majãrẽ na quetibu̶ju̶jũ̶goyupa Jesujãã. Bairi ãmerẽ yua judío majã caãmerã cũ̶ãrẽ quetibu̶ju̶rã jãã átiya. 17Atie queti bairo marĩ masĩõña: “Jesucristo mena na catũ̶goñatutuari wãme mena jeto jũ̶gori carorije cawapa cũ̶goenarẽ bairo na ĩñañami Dios,” marĩ ĩ masĩña. Torea bairo na ĩñañami cũ̶ mena catũ̶gou̶sajũ̶gorãrẽ. Atiere torea bairo ĩ quetibu̶ju̶ woatuyayupa tirũ̶mu̶pu̶re: “Cañuu̶rẽ, cũ̶ mena catũ̶goñatutuau̶ cũ̶ caãnie jũ̶gori, ‘Ñe ũnie carorije cawapa cũ̶goecu̶ niñami,’ qũĩ ĩñagu̶mi Dios,” ĩ woatuyupa Dios ya tutipu̶. 18Bairi bairo baiya: Marĩ Pacu̶ Dios u̶mu̶recóopu̶ caãcũ̶ ati yepa macããna cañuena, cariape caátiãmerãrẽ roro popiye na tãmu̶o joroque na átimasĩñami. Na pu̶ame roro na caátie mena aperãrẽ caroa cariape quetire na tũ̶gou̶saetio joroque na átiyama aperã camasãrẽ. 19Bairo na caátimiatacũ̶ãrẽ, Dios pu̶ame nipetiro camasãrẽ cũ̶ caátiãnierẽ na camasĩrõ boyami. Merẽ cũ̶ camasĩrĩjẽrẽ na ĩñoñupĩ. Na, cañuena cũ̶ãrẽ tiere na ĩñoñupĩ. 20Caãnijũ̶goripau̶pu̶a nipetiro camasã ĩñajũ̶goasúpa ati yepa, ati u̶mu̶recóo, caãno cãrõ Dios cũ̶ caqũẽnorĩqũẽrẽ. Tiere caĩñarã majũ ãnirĩ Diore ĩñaetimirãcũ̶ã, “Ati u̶mu̶recóore caqũẽnorĩcũ̶ Dios niñami. Cũ̶ catutuarije petietiya,” na caĩpea niña. Bairi, “ ‘¿Dios, cũ̶ ãnicu̶ti? Yu̶ra mácũ̶mi,’ ĩ tũ̶goñarĩ mu̶rẽ jãã ĩroaepu̶,” Diore na caĩpee mee niña. 21Bairo ĩrĩcãrõ mano merẽ caroaro majũ cũ̶ caãnierẽ masĩñama. Bairo cũ̶ masĩmirãcũ̶ã, “Ãniñami Dios ati u̶mu̶recóore caqũẽnorĩcũ̶,” qũĩ nu̶cũ̶bu̶goetinucũñama. Diore qũĩroagaetiyama. Tunu bairoa tocãnacã rũ̶mu̶ camasãrẽ na cũ̶ caĩñaricanu̶gõmiatacũ̶ãrẽ, “Jãã mena mu̶ ñujãñuña,” qũĩ basapeogaetinucũñama Diore. Nemojãñurõ cañuena ãnirĩ ricaati majũ tũ̶goñarĩqũẽ jetore tũ̶goñanucũñama. Torena, caroa macããjẽ cariape quetire tũ̶gomasĩẽtĩñama. 22“Jãã, camasĩrã majũ jãã ãniña,” caĩrã nimirãcũ̶ã, catũ̶gomasĩẽna majũ niñama. 23Bairo caãna ãnirĩ Dios tocãnacã rũ̶mu̶a caãnicõãninucũũ̶rẽ qũĩroaetiyama. Bairo qũĩroaetiri yua, yucu̶, ũ̶tã ũnie mena camasã bauriquere bairo cabaurãrẽ na qũẽnonucũñama. Camasã cayasiparã na caãnimiatacũ̶ãrẽ, na bauriquere bairo cabaurãrẽ na ĩroanucũñama. Tunu macãnu̶cũ̶ macããna minia, ãña, aperã waibu̶toa bauriquere bairo cabaurã cũ̶ãrẽ na qũẽnorĩ na ĩroanucũñama. 24Bairo cũ̶rẽ na caĩroaetie wapa Dios cũ̶ã na piticõãñami. Na caboro carorije nipetirije na caátigarijere na áparo ĩ, na piticõãñami. Bairo na cũ̶ capitiro yua, na pu̶ame netõjãñurõ roro caboborije ũnierẽ ãmeo átinucũñama. 25Cariape macããjẽ quetibu̶ju̶riquere tũ̶gou̶saricaro ũnorẽã, ricaati roro ĩtorique majũrẽ tũ̶gou̶sanucũñama. Tunu Diore qũĩroaricaro ũnorẽã, ati u̶mu̶recóo macããna cũ̶ caqũẽnorĩcãrã bauriquere bairo cabaurãrẽ na ĩroanucũñama. Bairo na caĩroamiatacũ̶ãrẽ, Dios roque nipetirijere caátacu̶ cũ̶ caãnoi tocãnacã rũ̶mu̶a cũ̶ marĩ cabasapeocõã ninucũrõ ñuña. Bairoa to baiáto. 26Bairo cũ̶rẽ na caĩroatie wapa Dios cũ̶ã na piticõãñami, na rupau̶ caborore bairo carorije nipetirije na caátigarije caboborijere na áparo ĩ. Bairo na pitiri yua, carõmia, caũ̶mu̶a mena na caãmeo átiparo ũnorẽã, ricaati na majũ carõmia pu̶garãpu̶a roro ãmeo átiepenucũñama. 27Caũ̶mu̶a cũ̶ã na majũ roro ãmeo átinucũñama. Roro átaje caboborije ũnie majũrẽ átinucũñama. Carõmia mena na caãmeo átiparo ũnorẽã, na majũ caũ̶mu̶a pu̶garãpu̶a roro ãmeo átiepenucũñama. Bairo roro ána yua, na majũ na rupau̶re rorije riaye to baio joroque átinucũñama. 28Nipetirije cũ̶ caátajere ĩñamirãcũ̶ã, Diore qũĩroagaetiyama. Bairo cũ̶ na caĩroagaetie wapa, Dios cũ̶ã na piticõãñami. “Na caboro roro ricaati na catũ̶goñarĩjẽ mena na tũ̶goña ãmarõ,” ĩ, na piticõãñami. Bairo cũ̶ caáto, na pu̶ame nemojãñurõ roro átinucũñama. 29Nipetiri wãme carorijere caátinetõmajũcõãrã niñama. Bairo caána ãnirĩ bopaca ĩñarĩcãrõ mano roro átiganucũñama camasãrẽ. Tunu carõmia mena roro átiepepainucũñama. Tunu bairoa apeye ũnierẽ cacũ̶gorã nimirãcũ̶ã, netõjãñurõ cũ̶gonemoganucũñama. Nipetirije carori wãmerẽ átinucũñama. Aperã yayere ĩñau̶garipeanucũñama. Ãmeo pajĩãganucũñama. Roro ãmeo tutinucũñama. Camasãrẽ na ĩtoepenucũñama. Aperã cũ̶ã roro bu̶su̶painucũñama. 30Aperã cũ̶ãrẽ roro na átigarã, na caáperimiatacũ̶ãrẽ, roro na bu̶su̶jãnucũñama. Diore cateerã majũ niñama. Aperãrẽ na tũ̶goña yapapuao joroque na átinucũñama. “Jãã roque caãnimajũrã jãã ãniña aperã netõrõ,” ĩnucũñama. Na majũ na catũ̶goñarĩjẽ mena roro na caátipeere tũ̶goñabócari roro átinucũñama. Na pacu̶a cũ̶ãrẽ na baibotionucũñama. 31Cariape tũ̶gogaetimajũcõãñama. “Bairo jãã átigarã,” na caĩrĩjẽ cũ̶ãrẽ na caĩrõrẽ bairo áperinucũñama. Ni jĩcãũ̶ ũcũ̶rẽ cũ̶ maiẽtĩñama. Tunu apeyera roro aperã na na caĩrĩjẽrẽ tũ̶gori, na masiriyobojagaetinucũñama. Aperã cũ̶ãrẽ na bopaca ĩñagaetinucũñama. 32Bairo cabaiãnarẽ cabero na recõãgu̶mi Dios peeropu̶. Tiere ati yepapu̶ Dios cũ̶ caĩcũrĩqũẽrẽ masĩmirãcũ̶ã, na pu̶ame carorijere áticõã ninucũñama. Bairo caána ãnirĩ aperã narẽ ĩñacõrĩ roro na caátiere ĩñarã, “Marĩ caátorea bairo na cũ̶ã roro átiyama,” ĩ u̶seaninucũñama.

will be added

X\