EL APOCALIPSIS 4

1Bairo yu̶ cũ̶ caĩquetibu̶ju̶ro bero, ñiñamu̶gõjowu̶ u̶mu̶recóopu̶re. Bairo ĩñamu̶gõjou̶, u̶mu̶recóo pããnu̶cãrõ caãnorẽ ñiñajowu̶. Bairo yu̶ caĩñarõ yua, bu̶su̶rique nocãrõ pairo trompeta putiricaro cãrõ majũ cabu̶su̶átaje yu̶ catũ̶gojũ̶goataje pu̶ame bairo ñiwũ̶ tunu: “Wãmu̶coasá ato yu̶ tu̶pu̶. Atie bero cabaipee nipetirijere mu̶ ñiñopa. Nipetirije mu̶ yu̶ caĩñopee yu̶ caĩrõrẽã bairo tãmurĩã baimajũcõãgaro,” ñiroyawu̶ bu̶su̶rique pu̶ame. 2Bairo caĩrõ, jicoquei Espíritu Santo cũ̶ catutuarije jũ̶gori u̶mu̶recóopu̶ yu̶ acoápú̶. Topu̶ etari yua, ñiñaroyawu̶ u̶mu̶recóopu̶ carotimasĩ majũ ruiricaro tronorẽ. To ruiricarore jĩcãũ̶ carui cũ̶ãrẽ cũ̶ ñiñaroyawu̶. 3Cũ̶, to ruiricarore carui pu̶ame bu̶tioro majũ asiyawĩ. Ũ̶tã jaspe, o cornalina na caĩrĩjẽ nocãrõ caasiyaro cãrõ majũ cũ̶ rupau̶ asiyawĩ. Tunu bairoa cũ̶ caruiro buire bue beto niãmejorewu̶. Ũ̶tã, esmeralda na caĩrĩjẽrẽ bairo majũ tutuaro asiyawu̶ ti bue beto. 4To ruiricaro trono riapere ñiñawũ̶ apeye ruirique veinticuatro majũ caãnie cũ̶ãrẽ. Tiere caruirã cũ̶ãrẽ ñiñaroyawu̶. Tie ruirique caãno cãrõ veinticuatro majũ cabu̶toa carotimasĩrã caruiãmejorerãrẽ na ñiñaroyawu̶. Naa, cabu̶toa pu̶ame cabotirije jeto jutii jãñawã. Na ru̶poapu̶ quetiuparã na caru̶poapeoro ũno coronarẽ pesawã. Oro mena qũẽnorĩqũẽrẽ pesawã. 5Carotimasĩ ruiricaro tronopu̶ bu̶po cũ̶ cayaberije, bairi nocãrõ pairo bu̶su̶rique, apeye cabu̶poparije cũ̶ã witiwu̶. Tunu apeyera carotimasĩruiricaro riapepu̶re jĩcã wãmo peti pu̶ga pẽnirõ cãnacãrõ majũ jĩñaworique caũ̶rĩjẽ ũ̶nucũwũ̶. Tie jĩñaworique pu̶ame Dios Yeri jĩcã wãmo peti pu̶ga pẽnirõ cãnacã yeri pũna majũ ãno baiwu̶. 6Tunu bairoa carotimasĩruiricaro riapepu̶ ria capairiyare bairo witiwu̶. Tiya oco pu̶ame caroaro majũ ĩña ãmewiyorique ãmu̶. Ẽñoorõ ĩña ãmewiyoricarore bairo caroaro majũ oco tusuriya ãmu̶ tiya ria. To carotimasĩruiricaro recomacãpu̶re bairi to tu̶ri cũ̶ãrẽ marĩ caĩñañaena ũna seres majã cacatirã majũ ãni ãmejorewã. Na pu̶ame na rupau̶ri petiropu̶a caapee cu̶tiãmejore peticõãwã. 7Bairi sere caãnijũ̶gou̶ pu̶ame, macãnu̶cũ̶ yai cajũãũ̶ riapére bairo cacũ̶gou̶ ãmi. Cũ̶ bero macããcũ̶ nurĩcũ̶ wecu̶ riapére bairo cacũ̶gou̶ ãmi. Apei cũ̶ bero caãcũ̶ camasocu̶ riapére bairo cacũ̶gou̶ bauwĩ. Catu̶sau̶ pu̶ame aa bauriquere bairo cabauu̶ majũ wu̶nucũwĩ. 8Na, seres majã cacatirã majũ pu̶ame tocãnacãũ̶pu̶a jĩcã pẽnirõ cãnacã queru̶pu̶u̶ri jeto cũ̶gowã. Na rupau̶ bui, bairi na pupeapu̶ cũ̶ãrẽ caapee cu̶tipeticõãwã. Bairo ãna, na pu̶ame u̶mu̶recóo, bairi ñami cũ̶ãrẽ atore bairo ĩ jãnaema: “¡Caroú̶, caroú̶, nocãrõ caroú̶ majũ niñami marĩ Quetiupau̶ Dios! Nipetiro carotimasĩ majũ niñami. Tirũ̶mu̶pu̶a merẽ caãnijũ̶goatacu̶ niñami. Ãme cũ̶ãrẽ bairoa ãnicõãñami. Ape rũ̶mu̶ caãno, ti yepapu̶ caápau̶ majũ niñami,” ĩ basapeowã jãnarĩcãrõ mano yua. 9Na, seres majã pu̶ame nairõ majũ cũ̶ basapeowã: “Cañuu̶ majũ mu̶ ãniña. Mu̶rẽ nipetiro na ĩroáto. Jãã mena mu̶ ñumajũcõãña.” Carotimasĩ cũ̶ caruiropu̶ carui tocãnacã rũ̶mu̶a caãnicõãcũ̶rẽ seres majã cũ̶ na cabasapeoro cãrõ, cabu̶toa camasĩrã cũ̶ã qũĩroawã Diore. Na ru̶popatuuri mena cũ̶ riapepu̶ etanumurĩ qũĩroawã. Cũ̶ basapeorã yua, na capesarije coronarẽ cũ̶ caruiro riapepu̶ wejonucũrĩ atore bairo ĩ basawã: 11“Jãã Quetiupau̶ Dios, nipetiro na caĩroapau̶ majũ mu̶ ãniña. Nocãrõ catutuau̶ majũ mu̶ caãnoi, mu̶rẽ ĩroari na basapeoáto. Mu̶ roque nipetirije caãnierẽ caqũẽñorĩcũ̶ majũ mu̶ ãniña. Bairi atie nipetirije mu̶ caborore bairo jeto caãnipeere ĩ, mu̶ qũẽnojũ̶goyupa,” ĩ basawã Diore nipetiro cabu̶toa camasĩrã yua.

will be added

X\