EL APOCALIPSIS 17

1Tie cabairo bero, atore bairo baiwu̶ tunu. Jĩcã wãmo peti pu̶ga pẽnirõ caãnacãũ̶ caãna, capũnirĩjẽ jĩcã wãmo peti pu̶ga pẽnirõ cãnacã bapaarire capobatowẽátana mena macããcũ̶ jĩcãũ̶ ángel yu̶tu̶ etawĩ. Bairo yu̶tu̶ etari, ñiwĩ: “Tiaya mai yu̶ mena. Mu̶ ñiñopa carõmio, caũ̶mu̶a mena roro caátiepenucũõrẽ Dios roro bopacooro cõ cũ̶ caátipeere. Oco bui, riapu̶ caruiore roro cũ̶ caátipacopeere mu̶ ñiñopa,” ñiwĩ. 2“Cõ, caróo mena, quetiuparã ati u̶mu̶recóo macããna reyes na rupau̶ caborore bairo roro átiepenucũwã. Roro majũ cõ rupau̶ cõ caátieperije mena na átimecũ̶õ epenucũwõ ati yepa macããna camasãrẽ. Roro áco cõ caeticũmurĩjẽ u̶se oco mena na átimecũ̶õ epenucũwõ camasãrẽ,” ñi quetibu̶ju̶wĩ ángel, caũ̶mu̶arẽ caepeo cõ cabairijere. 3To bero Espíritu Santo cũ̶ camasĩõrĩjẽ jũ̶gori qũẽguericarore bairo yu̶ caĩñarõpu̶ yu̶ caĩñaata yua, desierto camasã manopu̶ yu̶ necoámí ángel. Topu̶ ñiñaroyawu̶ jĩcãõ carõmio moecũ̶ monstruo cajũãũ̶ bui caruiorore. Cũ̶, monstruo pu̶ame Dios cũ̶ caĩñajesoetie patore cũ̶ rupau̶re woaturique cacũ̶gou̶ ãmi. Jĩcã wãmo peti pu̶ga pẽnirõ cãnacãã majũ ru̶poocu̶mi. Tunu bairoa ti ru̶poo nipetiro pu̶ga wãmo petiro cãnacã majũ jawiicu̶pu̶. 4Cõ, carõmio, monstruo bui caruio pu̶ame jutii cajũãpuarije apeye cajũãrĩjẽ mena asuyaro jãñarĩqũẽcu̶mo. Tunu bairoa cõ rupau̶re capee wãmagariquecu̶mo: Oro mena, ũ̶tã rupaaca caroa caasiyarije mena, ũ̶tããcã caroa cabotirije mena wãmagawõ. Pairo tie ũnierẽ cõ rupau̶pu̶ bu̶sawõ. Apeyera cõ wãmopu̶ copa jotu̶ oro mena qũẽnorĩcãru̶re cũ̶goruiwõ. Ti ru̶pu̶re tocãnacã wãme carorije Dios cũ̶ cateerije majũ jãñawũ̶. Carorije cõ rupau̶ jũ̶gori caũ̶mu̶a mena roro cõ caátinucũrĩjẽ cũ̶ã ti ru̶pu̶ ãnicõñarõrẽ bairo jãñawũ̶. 5Tunu bairoa cõ riapoa buire itia wãme ãmu̶ woaturique caĩñaña manie majũ. Atore bairo ĩ tusawu̶:|sc CAPAIRI MACÃ BABILONIA, CAŨ̶MU̶ARẼ CAÁTIROTIEPERÃ RÕMIRĨ PACO, BAIRI NIPETIRO CAROARÃRẼ CATEERIJE PACO|r, ĩ woaturique tusawu̶ cõ riapoapu̶re. 6Tiere ĩñarĩ bero yua, yu̶ tũ̶goñamasacati rocajowu̶. ¡Tame, cõ pu̶ame Dios ya poa macããna cõ capajĩãrericarã rií mena cũmumecũ̶õ baiwõ! Jesús yaye quetire na caquetibu̶ju̶rije jũ̶gori cõ capajĩãrericarã yaye rií mena cũmumecũ̶õ baiwõ. Bairo cõ cabairijere ĩñarĩ yu̶ pu̶ame yu̶ acu̶anetõcoapu̶. 7Bairo yu̶ cabairo ĩñarĩ yua, ángel pu̶ame ñiwĩ: “¿Nopẽĩ miñaacu̶ayati, tame?” ñiwĩ. “Mai, mu̶ yu̶ quetibu̶ju̶ masĩõgu̶ cõ, carõmio, cõ cabaiãnierẽ. Tunu bairoa cõ carui monstruo, jĩcã wãmo peti pu̶ga pẽnirõ cãnacã majũ, pu̶ga wãmo petiro cãrõ majũ cajawiicu̶cu̶ cũ̶ cabaiãnie cũ̶ãrẽ mu̶ yu̶ quetibu̶ju̶ masĩõgu̶,” ñiwĩ. 8Bairi yua, bairo ñiwĩ: “Cũ̶, monstruo caroagou̶, mu̶ caĩñau̶ pu̶ame tirũ̶mu̶pu̶ atore caãnimirĩcũ̶ niñami. Ãmerẽ baipu̶a maami mai. Ãmerẽ manimicũ̶ã, cabero caũ̶cũ̶ãrĩ opepu̶ caãniatacu̶ wãmu̶etagu̶mi, peero caũ̶petietopu̶ cũ̶ cayasimajũũ̶ ápáro jũ̶goye yua. Cũ̶, monstruore ĩñarã, ati yepa macããna camasã qũĩña acu̶acoagarãma. Ati u̶mu̶recóo Dios cũ̶ caqũẽnojũ̶gori rũ̶mu̶pu̶ina Dios ya tutipu̶ na wãme catusaena cũ̶rẽ ĩñarã, qũĩña acu̶acoagarãma. Cũ̶, monstruo tirũ̶mu̶pu̶re caãnacũ̶, cabero tunu caátipau̶re qũĩñarã, qũĩña acu̶acoagarãma,” ñi quetibu̶ju̶wĩ ángel. 9Bairi ñinemowĩ tunu ángel: “Atie yu̶ caquetibu̶ju̶rije cabu̶goro macããjẽ mee niña. Ni ũcũ̶ cariape catũ̶goñarĩqũẽcu̶cu̶, catũ̶gojĩãti majũ tũ̶gopeyorique niña: Jĩcã wãmo peti pu̶ga pẽnirõ cãnacã ru̶poo pu̶ame jĩcã wãmo peti pu̶ga pẽnirõ cãnacã ũ̶tã buri carõmio cõ caruirijere cõñarõ baiya. Tunu bairoa ti ru̶poo, jĩcã wãmo peti pu̶ga pẽnirõ cãnacãũ̶ caãna reyes quetiuparãrẽ na ãnicõñarõ baiya. 10Bairi na, quetiuparã reyes, jĩcã wãmo peti pu̶ga pẽnirõ cãnacãũ̶ caãna mena macããna jĩcã wãmo petiro cãrõ merẽ yasipeticoama. Pu̶garã yua ru̶sayama. Jĩcãũ̶ ãme ati yu̶teare quetiupau̶ reyre bairo niñami. Apei quetiupau̶ pu̶ame mai etaetiyami. Cũ̶, quetiupau̶, na tu̶sau̶ etau̶, yoari yu̶tea quetiupau̶ ãniãmerĩgu̶mi. Yoaro mee yasicoagu̶mi. 11Moecũ̶ monstruo cajũ̶goyepu̶re caãnimirĩcũ̶ ãmerẽ camácũ̶ cũ̶ã quetiupau̶ rey niñami. Jĩcã wãmo peti pu̶ga pẽnirõ cãnacãũ̶ quetiuparã caãna bero macããcũ̶ quetiupau̶ rey niñami cũ̶ cũ̶ã. Cũ̶ mena jĩcã wãmo peti itia pẽnirõ majũ niñama yua quetiuparã reyes. Tunu bairoa cũ̶, monstruo pu̶ame aperã quetiuparã jĩcã wãmo peti pu̶ga pẽnirõ cãnacãũ̶ mena macããcũ̶ niñami. Cũ̶ pu̶ame yua, yasi majũũ̶ ácú̶ baiyami. Cũ̶ tu̶saye niña yua. 12“Apeyera tunu pu̶ga wãmo petiro cãnacã jawii mu̶ caĩñaataje pu̶ame aperã quetiuparã pu̶ga wãmo petiro cãnacãũ̶ caãnarẽ cõñarõ baiya. Na pu̶ame mai quetiuparã reyre bairo jããẽtĩñama. Bairãpu̶a quetiuparã reyre bairo na cajããrĩ rũ̶mu̶rẽ jĩcã hora cãrõã rotimasĩgarãma. Torea bairo monstruo cũ̶ã na mena jĩcãrõ yoaro mea rotimasĩgu̶mi. 13Bairi yua, pu̶ga wãmo petiro cãnacãũ̶ caãna quetiuparã na majũ jĩcãrõrẽ bairo tũ̶goñaqũẽnorĩ monstruo cũ̶ carotijũ̶goro bogarãma. Cũ̶ catutuarije, cũ̶ carotimasĩrĩjẽrẽ cũ̶ átirotigarãma. Na pu̶ame cũ̶ rocare rotimasĩgarãma. 14Bairo na, quetiuparã, monstruo mena neñarĩ Dios macũ̶ Cordero mena ãmeo qũẽgarãma. Bairo cũ̶rẽ na caãmeoqũẽmiatacũ̶ãrẽ, Cordero pu̶ame na netõ nu̶cãcõãgu̶mi. Dios yarã caãniparã cũ̶ cabesericarã cũ̶rẽ caĩroarã mena na netõ nu̶cãcõãgu̶mi Cordero, na, quetiuparãrẽ yua. Torecu̶na cũ̶, Cordero, cabu̶goro macããcũ̶ mee niñami. Cũ̶ roque quetiuparã quetiupau̶ majũ niñami. Quetiuparã reyes quetiupau̶ rey majũ niñami,” ñi quetibu̶ju̶wĩ ángel. 15Bairo ñi quetibu̶ju̶ri bero, ñinemowĩ tunu ángel: “Carõmio caũ̶mu̶arẽ caepepaio cõ caruiataje oco mu̶ caĩñaataje pu̶ame camasãrẽ ĩcõñarõ baiya. Camasã na caãni macãã, apeye bu̶su̶ri majã, tocãnacã yepaa macããnarẽ ĩcõñarõ baiya. 16Bairi apeyera monstruo ya jawiire bairo pu̶ga wãmo petiro cãrõ caãniatana quetiuparã reyes cõ, carõmio, caróore cõ teejãñugarãma yua. Cõ rocacõãgarãma. Capee cawapacu̶tiere cacũ̶gomirĩcõrẽ yua jutii mácõ cõ átirocacõãgarãma. Bairo átiyaparori, cõ riire u̶garecõãgarãma. Bairo átiri cõ ãnacõ rii caru̶saata, peeropu̶ joere peyocõãgarãma yua. 17Dios pu̶ame cũ̶ caborore bairo na átio joroque ĩ, na yeripu̶ tore bairo na átirotigu̶mi. Bairo cũ̶ caátirotiroi yua, jĩcãrõrẽ bairo tũ̶goñarĩqũẽ cu̶tiri, reyre bairo na caãnierẽ jãnacõãgarãma. Monstruo jetore yua, na carotimasĩmiatajere cũ̶ átirotigarãma. Dios tore bairo na caáto, cũ̶ cabori yu̶tea capetietaropu̶ tore bairo átijãnagarãma. 18Bairi cõ, carõmio, mu̶ caĩñaataco pu̶ame capairi macãrẽ nicõñao baiyamo. Cõã niñamo Babilonia capairi macã. Ti macã pu̶ame ati yepa macããna reyes quetiuparãrẽ roro na átio joroque ápu̶ carorije ti macã macããjẽ mena yua,” ñi quetibu̶ju̶wĩ ángel caróo carõmio yu̶ caĩñaataco cõ cabairijere.

will be added

X\