EL APOCALIPSIS 15

1To bero apeye u̶mu̶recóopu̶ acu̶orije cabaicõña nu̶cãetarijere ñiñajowu̶. Tame, jĩcã wãmo peti pu̶ga pẽnirõ cãnacãũ̶ majũ ángelea majã baujaetanu̶cãwã. Jĩcã wãmo peti pu̶ga pẽnirõ cãnacã wãme roro na caátipee Dios na cũ̶ carotirije mena baujaetanu̶cãwã. Tie roro na caátipee mena merẽ Dios cũ̶ caasiarijere átirotitu̶sagu̶ baiwĩ. 2Tunu bairoa ñiñaroyawu̶ ria capairiya oco tusurije ĩña ãmewiyoricaya peero asuyaro caãniyare. Tiya tũ̶nipu̶re nucũroyawã camasã Dios cũ̶ cajoatato arpare cacũ̶gorã. Mai, na pu̶ame moecũ̶ monstruore, o cũ̶ cabauriquere bairo cabauu̶re catũ̶gogaetibotioricarã ãma. Dios jetore bori cũ̶, moecũ̶ wãme macããtõ número cũ̶ãrẽ catuecoetana canetõrĩcãrã majũ ãma. 3Bairi na pu̶ame Moisés ãnacũ̶ Dios yau̶ cũ̶ paabojari majõcu̶ yaye basariquere basawã. Dios macũ̶ Cordero yaye basarique mena atore bairo ĩ basawã: “Nocãrõ carotimasĩ majũ mu̶ ãniña. Nipetirije mu̶ caátie ñumajũcõãña. Mu̶ roque Quetiupau̶ nipetirore carotimasĩ majũ mu̶ ãniña. Dise mu̶ carotimasĩẽtĩẽ maniña. Caria, cariape majũ niña nipetirije mu̶ caátiãnie. Nipetiro camasã poari Quetiupau̶ Rey majũ mu̶ ãniña mu̶ roque. 4Bairi, ¿noa ũna mu̶rẽ na uwietibujiocu̶ti? ¿Noa ũna mu̶rẽ ĩroari na basapeoetibujiocu̶ti? Bairi mu̶ jetorea na basapeoáto. Mu̶ jetoa mu̶ ãniña cañuu̶ majũ. Bairi nipetiro camasã poari macããna atíri, mu̶ jetorea mu̶ basapeogarãma. Bairi merẽ na mu̶ áti ĩñoñupã nocãrõ tutuaro camasãrẽ mu̶ caátimasĩrĩjẽrẽ,” ĩ basawã na pu̶ame yua, tiya tũ̶nipu̶ nucũrĩ. 5Bairo na caĩbasaro bero, ñiñajoroyawu̶ tunu. Tame, u̶mu̶recóopu̶ Dios ya aru̶a santuario pããnu̶cãcoapu̶. Dios camasãrẽ cũ̶ caroticũrĩqũẽ caãni aru̶a majũ pããnu̶cãcoapu̶ yua. 6Ti aru̶a, Dios ya aru̶apu̶ jĩcã wãmo peti pu̶ga pẽnirõ cãnacãũ̶ caãniatana ángelea majã witiamá. Jĩcã wãmo peti pu̶ga pẽnirõ cãnacãũ̶ caãna jĩcã wãmo peti pu̶ga pẽnirõ cãnacã wãme carorijere caátitu̶saparã majũ witiamá. Jutii, lino mena qũẽnorĩqũẽ cau̶gueri manie, caasiyarije majũrẽ jãñawã. Tunu bairoa wẽñarĩcãwẽ, oro mena qũẽnorĩcãwẽrẽ na cotiapu̶ esaro wẽñarĩ witiamá. 7Narẽ yua, baparicãnacãũ̶ seres majã cacatirã mena macããcũ̶ jĩcãũ̶ pu̶ame jotu̶ bapaari oro mena qũẽnorĩqũẽrẽ na jowĩ tocãnacãpu̶rea. Ti bapaaripu̶re carorije, roro camasãrẽ Dios cũ̶ caátirotijorije capũnirĩjẽ majũ jãñaroyawu̶. Dios, tocãnacã rũ̶mu̶a caãnicõãninucũũ̶ majũ roro cũ̶ caátirotijorije ãmu̶ ti bapaaripu̶re. 8Tocãrõã yua, Dios ya aru̶a santuario pu̶ame busejiracoápu̶. Dios cũ̶ catutuarije cũ̶ carotimasĩrĩjẽ cũ̶tu̶i caatíe majũ ãmu̶ tie buseri. Bairi ti aru̶a Dios ya aru̶are noa ũna jããmasĩẽma. Jĩcã wãmo peti pu̶ga pẽnirõ cãnacãũ̶ caãna ángelea majã jĩcã wãmo peti pu̶ga pẽnirõ cãnacã wãme rorije na caátipee cabaipetiparo jũ̶goye ti aru̶are noa ũna jããmasĩẽma.

will be added

X\