EL APOCALIPSIS 13

1Bairo cabairo bero, ñiñajoroyawu̶ tunu ria capairiyapu̶re. Bairo yu̶ caĩñajoro, pĩno caroagou̶ monstruo riapu̶ pãmu̶etawĩ. Cũ̶ pu̶ame jĩcã wãmo peti pu̶ga pẽnirõ cãnacã majũ ru̶poocu̶mi. Tunu bairoa pu̶ga wãmo petiro cãnacãã majũ jawiicu̶mi cũ̶ ru̶pore. Tunu apeyera tocãnacãpu̶a pesarica beto coronarẽ pesawĩ cũ̶ ru̶pore. Tie cũ̶ ru̶poo riapoa buire rorije Dios cũ̶ caboetie cũ̶ caĩñajorore woaturique tusawu̶. 2Cũ̶, monstruo, yu̶ caĩñau̶ pu̶ame yaijũãũ̶rẽ bairo bauriquecu̶mi. Cũ̶ ru̶pori cũ̶ã macãnu̶cũ̶ macããcũ̶ bu̶co ru̶porire bairo ãmu̶. Tunu bairoa macãnu̶cũ̶ yai riserore bairo riserocu̶mi. Bairi yua, dragón pu̶ame tutuariquere cũ̶ jowĩ monstruore. Cũ̶ caruiro trono cũ̶ãrẽ cũ̶ jowĩ. Tutuaro rotimasĩrĩqũẽ cũ̶ãrẽ cũ̶ jomajũcõãwĩ dragón monstruore. 3Mai, cũ̶, monstruo pu̶ame jĩcã cũ̶ ru̶poare roro majũ pairo cãmirõcu̶mi. Bairopu̶a, ti cãmirõ yaticoasupa. Bairo pairi cãmirõ cũ̶gori cũ̶ cariacatiriquere ĩñarĩ nipetiro ati u̶mu̶recóo macããna bu̶tioro qũĩña acu̶acoama. Bairo qũĩña acu̶ari yua, cũ̶ caquetibu̶ju̶rique macããjẽrẽ cũ̶ tũ̶gou̶sawã capããrã camasã cañuena. 4Tunu bairoa apei dragõrẽ qũĩroawã. Rotimasĩrĩqũẽ tutuariquere monstruore cũ̶ cajoataje jũ̶gori bu̶tioro qũĩroawã. Bairi monstruo cũ̶ãrẽ atore bairo qũĩ basapeowã: “¡Ni ũcũ̶ monstruore bairo catutuau̶ majũ mácũ̶mi! ¡Ni jĩcãũ̶ ũcũ̶ cũ̶ mena ãmeoqũẽ netõnu̶cãmasĩẽcũ̶mi!” 5Tunu apeyera monstruo rorije cũ̶ bu̶su̶o joroque cũ̶ ámi dragón. Dios cũ̶ catũ̶gojesoetie ũnie majũrẽ cũ̶ bu̶su̶botio joroque cũ̶ ámi. Tunu bairoa yoaro mee jãñurĩã cuarenta y dos muipu̶a cãrõ majũ camasãrẽ cũ̶ carotimasĩpeere cũ̶ jowĩ. Baipu̶a, Dios pu̶ame roro cũ̶ caátiãnierẽ jãnaoemi mai. 6Bairi monstruo pu̶ame cũ̶ caátirotirore bairo ámi: Diore rorije majũ qũĩ bu̶su̶epewĩ. Dios cũ̶ catũ̶gojesoetiere cũ̶ bu̶su̶wĩ. Cũ̶ ya aru̶a templo wii macãã aru̶a santuario cũ̶ãrẽ roro ĩ bu̶su̶wĩ. Dios yarã u̶mu̶recóo macããna cũ̶ãrẽ roro na ĩ botioepewĩ. 7Tunu bairoa Dios ya poa macããna caãna mena cũ̶ ãmeoqũẽ rotiwĩ monstruore. Narẽ ãmeoqũẽ jĩãtiri tũ̶nipu̶ cũ̶ rotiwĩ. Tunu bairoa nipetiro camasã poari apeye bu̶su̶ri majã tocãnacã macãã macããna tocãnacã yepaa macããnarẽ cũ̶ carotimasĩpeere cũ̶ jowĩ. 8Cũ̶, monstruore nipetiro ati u̶mu̶recóo macããna Dios ya wãmerẽ cawoatua mána qũĩroagarãma. Dios ati yepare cũ̶ caqũẽnorĩpau̶pu̶a Cordero capajĩãecoricu̶ ya tuti Dios mena cacatiãniparã majũ wãme woaturica tutire cawoatuecoetana nipetiro qũĩroagarãma. 9Bairi mu̶jãã caãmoocu̶na ãnirĩ atie quetire caroaro tũ̶gopeoya: 10“Bairi preso jorica wiipu̶ caápárã na caãmata, preso jorica wiipu̶a ámajũcõãgarãma. Aperã ñosẽrĩcãpãĩ mena na capajĩãreparã na caãmata, ñosẽrĩcãpãĩ menapu̶a na pajĩãregarãma.” Bairo cabairi yu̶tea caetaro, mu̶jãã, Dios ya poa macããna ãnirĩ cũ̶ mena jeto tũ̶goñatutuaya. Cũ̶ mena tũ̶goñawẽpũ̶ña. 11To bero ñiñaroyawu̶ tunu monstruo ati yepa rocai cabuiaetanu̶cãũ̶rẽ. Cũ̶ pu̶ame pu̶garo jawiicu̶mi nu̶rĩcũ̶ corderore bairo yua. Baimicũ̶ã, moecũ̶ dragõrẽ bairo rorije bu̶su̶rique cu̶mi. 12Tunu bairoa caãnijũ̶goatacu̶ monstruo cũ̶ camasĩrĩjẽ nipetirijere cũ̶ masĩbojapeticõãwĩ yepai cawitietaatacu̶ cũ̶ã. Bairo masĩrĩ yua, monstruo caãnijũ̶goatacu̶ cũ̶ caĩñajoropu̶ ati u̶mu̶recóo macããna camasã nipetirore cũ̶rẽ na ĩroarotiwĩ. Pairo cacãmirõ cu̶tacu̶ nimicũ̶ã, cacatiricu̶ monstruore na ĩroarotiwĩ monstruo yepai cabuiaetaatacu̶ pu̶ame yua. 13Tunu apeye caĩñañamanie ũnierẽ paca áti ĩñowĩ camasãrẽ. Acu̶orijere áti ĩñowĩ. U̶mu̶recóopu̶i peero ati yepapu̶ to ñaatínucũõ joroque áti ĩñowĩ nipetiro camasã na caĩñajoropu̶. 14Tie, apei monstruo caãnijũ̶goatacu̶ jũ̶gori cũ̶ caĩñajoropu̶ cũ̶ caáti ĩñomasĩrĩjẽ mena camasã ati yepa macããnarẽ na ĩtowĩ. Tunu bairo cũ̶ monstruo na caĩroau̶ bauriquere bairo cabauu̶re na qũẽnorotiwĩ. Pairi cãmirõ yise mena capataecoricu̶ nimicũ̶ã, cacaticoacu̶re bairo cabauu̶re na qũẽnorotiwĩ. 15Bairo cũ̶rẽ na caweqũẽno yaparoro bero yua, apei cabero macããcũ̶ monstruo pu̶ame wericu̶re cũ̶ catio joroque cũ̶ átimasĩwĩ. Cũ̶, na caweatacu̶ pu̶ame caãnijũ̶goata monstruore ĩñacõrĩ na caweatacu̶ ãmi. Bairi yua, apei monstruo pu̶ame wericu̶re cũ̶ bu̶su̶masĩõ joroque cũ̶ ámi. Bairo cũ̶ bu̶su̶rotiri yua, noa ũna cũ̶rẽ cabasapeoenarẽ na pajĩãrerotiwĩ. 16Tunu bairoa apeyera tocãnacãũ̶pu̶rea cũ̶ ya wãmerẽ na wãmo cariape nu̶gõã, o na riapoare na woaturotio joroque ámi. Cawĩmarã, cabu̶toa cũ̶ãrẽ, pairo cadinerocu̶na cũ̶ãrẽ, cabopacarã cũ̶ãrẽ, paacoteri majã, bairi na quetiuparã nipetirore bairo na woatu rotiwĩ. 17Bairi yua, noa ũna cũ̶ ya wãmerẽ na riapoapu̶, o na wãmopu̶ na cacũ̶goeticõãta, apeye ũnierẽ nuni, o wapati átimasĩẽma. Cũ̶, monstruo ya wãme, o cũ̶ númerore na cacũ̶goepata, tore bairo noa ũna átimasĩẽma. 18Bairi atiere caroaro catũ̶gomasĩrã majũ tũ̶gomasĩrotiya. Bairi ni ũcũ̶ caroaro cũ̶ númerore catũ̶gobócamasĩ cũ̶ caãmata, cũ̶ ya númerore quetibu̶ju̶ya. Ti número pu̶ame jĩcãũ̶ caũ̶mu̶ yaro número majũ niña. Yu̶ roque ti númerore yu̶ masĩña. Atore bairo niña: seiscientos sesenta y seis, niña.

will be added

X\