EL APOCALIPSIS 11

1Bairo ñi quetibu̶ju̶ yaparori yua, yu̶ nuniwã cõñarĩcãpãĩrẽ. Tuericu̶re bairo caãnipãĩrẽ yu̶ nuniwã. Tipãĩrẽ yu̶ nunirĩ, bairo ñiwã: “Atipãĩ cõñarĩcãpãĩrẽ nerĩ ácú̶ja Dios ya wii templo wiipu̶. Ti wii caesarore cõñau̶ja. Ti wii macãã altar mesa cũ̶ãrẽ mu̶ cõñawã. Ti wii templo wiipu̶ Diore cañubuepeonucũrĩ majã camasã cũ̶ãrẽ na mu̶ cõñawã. ‘Tocãnacãũ̶ majũ niñama,’ miwã. 2Ti wii templo macã yepa roquere mu̶ cõñaepa. Ti yepa, merẽ cũ̶rẽ caboenarẽ Dios cũ̶ cajorica yepa niña. Na pu̶ame Dios ya macã cañurĩ macã macããnarẽ capajĩãreparã nigarãma. Yoaro cuarenta y dos muipu̶a majũ topu̶ ãnirĩ pajĩã ãnigarãma. Bairi tore mu̶ cõñaepa. 3Bairo na caátiãno, yu̶ pu̶ame yu̶ yarã quetibu̶ju̶ri majãrẽ na tu̶pu̶ na yu̶ jogu̶. Pu̶garã na yu̶ jogu̶. Yu̶ yaye macããjẽ yu̶ caquetibu̶ju̶rotijorijere narẽ caquetibu̶ju̶netõõparã majũrẽ na yu̶ jogu̶. Yoaro, mil doscientos sesenta rũ̶mu̶rĩ cãrõ na quetibu̶ju̶ ãnigarãma. Na pu̶ame cawirurije, boori jutii ũnierẽ jutii jãñarĩ ágarãma,” ñi quetibu̶ju̶wã. 4Na, pu̶garã quetibu̶ju̶ri majã pu̶ame olivo yucu̶, bairi pu̶ga tutuu jĩñaworique ati yepapu̶ caãnierẽ ãnicõñarã baiwã. Dios cũ̶ caĩñajoro ati yepapu̶re caãnierẽ bairo ãnicõñarã baiwã. 5Narẽ, noa ũna roro na capajĩãgaata, na risero cawitiri peero, peero mena na joerecõãgarãma. Ti peero na riseropu̶ cawitiri peero uwiomajũcõãwũ̶. Na wapana ũnarẽ cajoeremajũcõãrĩ peero ãmu̶. Bairi ti peero mena riagarãma noa ũna na pu̶garãrẽ roro capajĩãgarã pu̶ame yua. 6Na, quetibu̶ju̶ri majã pu̶garã caãna, u̶mu̶recóo jopeere biamasĩrĩqũẽrẽ masĩwã. “To ocaeticõãto ti yepare,” ĩrã, tore bairo átajere masĩwã. Dios yaye quetire na caquetibu̶ju̶ ãniyu̶tea cãrõ, “To ocaeticõãto,” ĩrã, tore bairo átimasĩrĩqũẽrẽ masĩwã. Tunu bairoa oco cũ̶ãrẽ rií to jẽñao joroque átimasĩrĩqũẽrẽ masĩwã. Capee wãmerẽ ati yepa macããnarẽ roro átajere masĩwã. Caãno cãrõ roro popiye tãmu̶orĩqũẽrẽ masĩwã. Nocãnacãni na caboro cãrõ camasãrẽ roro átiãnimasĩrĩqũẽrẽ masĩwã, naa, quetibu̶ju̶ri majã yua. 7Bairo na caátimasĩmiatacũ̶ãrẽ, tie quetire na caquetibu̶ju̶yaparo petietaripau̶re, caũ̶cũ̶ãrĩ opepu̶ cawãmu̶atíatacu̶ moecũ̶ monstruo pu̶ame na ãmeo qũẽgu̶mi. Bairo na ãmeo qũẽrĩ yua, na netõnu̶cãcõãgu̶mi. Na pajĩãre peyocõãgu̶mi pu̶garãpu̶rea yua. 8Na rupau̶ri ãnajẽ átáwã maapu̶ cũñareagaro. Capairi macã, marĩ Quetiupau̶re na capapuarocarica macã maapu̶ cũñareagaro. Na majũ ĩrã, Sodoma, o Egipto na caĩwãmetinucũrĩ macãpu̶ cũñagaro na rupau̶ri ãnajẽ yua. 9Itia rũ̶mu̶ ape rũ̶mu̶ recomacã majũ yoaro na rupau̶ri ãnajẽrẽ ĩña ãnigarãma camasã. Capee macãã macããna, camasã poari caãno cãrõ, apeye bu̶su̶ri majã caãno cãrõ, tocãnacã yepaa macããna caãno cãrõ ĩñagarãma na rupau̶ri ãnajẽrẽ. Bairo ĩñarĩ na rupau̶rire yaarotietigarãma, asiarã yua. 10Na caquetibu̶ju̶rijere caboetana ãnirĩ, ati yepa macããna bu̶tioro u̶seanigarãma, merẽ na cariarijere ĩñarĩ. Nocãrõ cau̶seanirã ãnirĩ yua, tocãnacãũ̶pu̶a apeye na cacũ̶gorijere wapa manoa ãmeo jogarãma. Mai, na, pu̶garã profetare bairo caãnana pu̶ame na caboena, narẽ capatowãcõrãrẽ bairo majũ narẽ caãnana ãñupã. Bairi na cariaro bero, cau̶seanirãrẽ bairo baigarãma. 11Bairo na cariaremiatacũ̶ãrẽ, tame, itia rũ̶mu̶ ape rũ̶mu̶ recomacã caátó majũ, Dios pu̶ame na cationemowĩ tunu. Bairo cũ̶ cacatioro, catirã majũ wãmu̶nu̶cãcoáma tunu. Bairo na cacatitunurõ ĩñarĩ yua, nipetiro narẽ caĩñarã bu̶tioro na uwiwã. 12Tocãrõã yua quetibu̶ju̶ri majã caãnana pu̶garã pu̶ame bu̶su̶rique tutuaro caĩocajorijere tũ̶gowã. U̶mu̶recóopu̶ caatíe atore bairo na ĩ ocajowu̶: “Tiaya. Wãmu̶asá ato yu̶tu̶ u̶mu̶recóopu̶.” Tocãrõã oco poa watoapu̶ wãmu̶coámá, u̶mu̶recóopu̶ áná yua. Bairo na caátó, narẽ caboetana na pesua cũ̶ã na ĩñawã. 13Bairo na cawãmu̶átípau̶a, ati yepa bu̶tioro majũ yuguiwu̶. Ti macã macããjẽ wiiri jĩcã wiiri ñapeticoapu̶. Pu̶ga wãmo cãrõ caãniataje jĩcã wii cañaweyorore bairo ñapeticoapu̶, yepa cayuguiro jũ̶gori yua. Camasã cũ̶ã tie jũ̶gori jĩcã wãmo peti pu̶ga pẽnirõ cãnacã mil majũ yasipeticoáma. Bairo cabairijere caĩñarã cacatiru̶sarã pu̶ame yua bu̶tioro uwiri Diore cũ̶ basapeojũ̶gowã. U̶mu̶recóo macããcũ̶rẽ cũ̶ basapeojũ̶gowã yua. 14Merẽ jĩcãrõ bero macãã yu̶tea roro cabairi yu̶tea cũ̶ã netõwũ̶. Merẽ pu̶ga yu̶tea carorije cabairije netõwũ̶. Bairo canetõmiatacũ̶ãrẽ, mai jĩcã yu̶tea ru̶sacõãña camasã roro na cabaipa yu̶tea. Catu̶sari yu̶tea nigaro. ¡Ayu tame! Ti yu̶tea macããjẽ carorije merẽ baijũ̶gogaro majũ baiya. 15Bairi yua, ángel catu̶sau̶ putiwĩ. Jĩcã wãmo peti pu̶ga pẽnirõ caãnacãũ̶ macããcũ̶ catu̶sau̶ majũ putiwĩ cũ̶ yaro putiricaro trompetare. Tocãrõã yua, tutuaro bu̶su̶rique u̶mu̶recóopu̶ ocajowu̶. Atore bairo ĩwũ̶: “Ãmerẽ yua ti yepa macããna na carotimasĩrĩjẽ peticoaya. Marĩ Quetiupau̶ Dios jeto cũ̶ macũ̶ Mesías mena rotimasĩñami. Ãmerẽ yua, na jeto tocãnacã rũ̶mu̶a rotimasĩ ãnigarãma,” ĩ ocajowu̶ u̶mu̶recóopu̶. 16Cabu̶toa camasĩrĩ majã veinticuatro majũ caãna, Dios riapepu̶ na caruirije mena caruiãmejorerã pu̶ame yepapu̶ mucũmuáti bu̶tioro cũ̶ basapeowã. 17Bairo qũĩ basapeowã Diore: “Jãã Quetiupau̶ Dios nipetiro carotimasĩ, jãã mena mu̶ ñumajũcõãña. Mu̶a, tirũ̶mu̶pu̶a caãnijũ̶goatácu̶ mu̶ ãniña. Ãme cũ̶ãrẽ bairoa mu̶ ãnicõã ninucũña. Ãmerẽ nocãrõ mu̶ catutuarije mena camasã nipetirore mu̶ jetoa na mu̶ roti ãnimasĩjũ̶goya yua. 18Tocãnacã yepaa macããna camasã mu̶ asiari mu̶rẽ teejãñuwã. Bairo mu̶rẽ na cateemiatacũ̶ãrẽ, ãmerẽ etaya naa asiari roro na mu̶ caátipa rũ̶mu̶ majũ yua. Cariaricarã nipetirore na mu̶ caĩñabesepa rũ̶mu̶ majũ etaya. Bairo na ĩñabeseri yua, na yarã profeta majãrẽ na yaye wapa macããjẽrẽ na mu̶ jogu̶. Na cawapatapee caroa majũrẽ na mu̶ jogu̶. Bairo mu̶rẽ caboetana roque popiye tãmu̶ogarãma. Nipetiro mu̶ ya poa macããnarẽ caroa majũrẽ na mu̶ jogu̶. Capacarã, o penaaca caãna mu̶ ya wãmerẽ caĩroari majã nipetirore caroa majũrẽ na mu̶ jogu̶. Nipetiro na pu̶ame mu̶ mena u̶seanigarãma yua. Ati yepapu̶re carotimasĩrã camasãrẽ roro caána roquere na mu̶ repeyocoagu̶ yua,” qũĩ basapeowã Diore cabu̶toa camasĩrĩ majã pu̶ame. 19Tocãrõã yua, Dios ya wii templo wii majũ u̶mu̶recóopu̶ macãã wii jope pããnu̶cãcoapu̶. Ti wiire ñiñajowu̶ u̶mu̶recóopu̶. Bairo yu̶ caĩñajoro, bauwu̶ ti wii pupeapu̶re Dios ya pata rocapata pu̶ame. Bairo cabauripau̶re, tame, bu̶tioro bu̶po yabewu̶. Bu̶tioro bu̶su̶rique ocajowu̶. Tame, bu̶poa cũ̶ã tutuaro majũ paawã. Yepa cũ̶ã bu̶tioro yuguiwu̶. Tunu bairoa ocaro cãrõ majũ cayu̶su̶ari rupaaca ati yepapu̶re ñacũmuwũ̶.

will be added

X\