EL APOCALIPSIS 10

1Cabero ñiñajo royawu̶ tunu apei ángel catutuau̶ majũrẽ. U̶mu̶recóopu̶ oco buseri watoapu̶ caruiacú̶re cũ̶ ñiñajowu̶. Cũ̶ ru̶poa buire buewẽrẽ bairo bauwu̶. Cũ̶ riapé pu̶ame muipu̶ u̶mu̶reco macããcũ̶rẽ bairo bu̶tioro asiyawu̶. Cũ̶ ñicããrĩ cũ̶ã peero caũ̶nucũrĩjẽrẽ bairo bu̶tioro asiyawu̶. 2Cũ̶ wãmopu̶ jĩcã pũrõ papera pũrõ ũno woarica pũrõãcãrẽ cũ̶gowĩ. Tunuarica pũrõrẽ cũ̶ capããtãpũrõ majũrẽ cũ̶gowĩ. Bairi yua ti pũrõ rupatunua ãmu̶, jĩcã pũrõã nimirõcũ̶ã. Cũ̶ pu̶ame yua ati yepapu̶ ruieta nu̶cãetawĩ. Bairo ruietau̶, cariape nu̶gõã cũ̶ ru̶pore ria capairiyapu̶ peanucũũ̶ etawĩ. Ape nu̶gõã caãcõ nu̶gõã pu̶amerẽ yepa caoco manopu̶ peanucũũ̶ etawĩ. 3Bairo ruieta nu̶cãetari bu̶su̶rique tutuaro mena awajawĩ. Yai jũãũ̶ cãrõ majũ tutuaro ĩwĩ. Bairo tutuaro cũ̶ caawajaro yua, jĩcã wãmo peti pu̶ga pẽnirõ cãnacãũ̶ caãna bu̶poa cũ̶ yu̶wã. 4Bairo jĩcã wãmo peti pu̶ga pẽnirõ cãnacãũ̶ bu̶poa na cabu̶su̶ro bero, yu̶ pu̶ame na cabu̶su̶atajere woagu̶ yu̶ ápu̶. Bairo woagu̶ yu̶ caátipau̶a, bu̶su̶rique u̶mu̶recóopu̶ caatíe yu̶re caĩocajorijere yu̶ tũ̶gowu̶. Bairo ñiroyawu̶: “¡Tame, mu̶ woatuepa jĩcã wãmo peti pu̶ga pẽnirõ cãnacãũ̶ majũ bu̶poa na cabu̶su̶atajere! Tie na camasĩpee mee niña mai. Mu̶ woatuepa tiere,” caĩrocajorijere yu̶ tũ̶gowu̶. Bairi yu̶ woatuepu̶ bu̶poa na caĩatajere. 5Tocãrõã yua, ángel ria capairiyapu̶, bairi ati yepapu̶ capearuietanu̶cãũ̶rẽ yu̶ caĩñajoatacu̶ pu̶ame cũ̶ wãmo cariape nu̶gõãrẽ u̶mu̶recóopu̶ ñumu̶gõjowĩ. 6Bairo átiri yua, tocãnacã rũ̶mu̶a caãcũ̶, u̶mu̶recóore caátacu̶, ati yepa, bairi ria capairiya cũ̶ãrẽ caqũẽnorĩcũ̶, bairi nipetiro caãniepu̶ cãrõ caqũẽnorĩcũ̶ ya wãme mena ĩrĩ quetibu̶ju̶wĩ. Bairo ĩwĩ: “Merẽ etacoaya yua ati u̶mu̶recóo capetiparo. Ãmea nitu̶saro baiya. 7Caputitu̶sau̶, jĩcã wãmo peti pu̶ga pẽnirõ macããcũ̶ ángel cũ̶ trompetare cũ̶ caputijũ̶goripau̶re merẽ yaparo etagaro. Ati u̶mu̶recóo merẽ manigaro yua. Dios cũ̶ caátiga jũ̶goyetiricarorea bairo baiyaparo etagaro. Cũ̶ yarã profeta majãrẽ na cũ̶ caquetibu̶ju̶netõrotiricarorea bairo baiyaparo etagaro yua,” ĩ bu̶su̶jowĩ ángel. 8Mai, bu̶su̶rique u̶mu̶recóopu̶ caatíe yu̶ catũ̶gojũ̶goataje pu̶ame yu̶ bu̶su̶nemowũ̶ tunu. Bairi ñiwũ̶ tunu: “Juan, ácú̶ja jĩ ángel tu̶pu̶. Ria capairiyapu̶ bairi ti yepapu̶ capeanucũũ̶ tu̶pu̶ ácú̶ja. Bairo átí, pããrĩcã tunua cũ̶ wãmopu̶ cũ̶ cacũ̶gori tunuarẽ cũ̶ jiya neija,” ñiroyawu̶ bu̶su̶rique. 9Bairo yu̶re caĩrẽ tũ̶gori, ángel tu̶pu̶ yu̶ ápú̶. Cũ̶ tu̶pu̶ etari, cũ̶ yu̶ jẽniwũ̶ ti papera tunua cũ̶ wãmopu̶ cũ̶ cacũ̶gori tunuarẽ. Bairo cũ̶ yu̶ cajẽnirõ, bairo yu̶ yu̶wĩ: “Jau̶, mu̶ yu̶ jogu̶. Ũ̶jũ̶, neña. Nerĩ bero, u̶gayucõãña ti pũrõrẽ. Bairo ti tunuarẽ mu̶ cau̶gajũ̶goripau̶ jetore mu̶ risero beroa ocore bairo ipitigaro. Bairopu̶a, mu̶ cau̶gayuro bero mu̶ paaropu̶ ãno pu̶ame, bu̶tioro jũ̶gũẽgaro yua,” ĩrĩ yu̶ nuniwĩ ángel ti tunuarẽ. 10Bairo yu̶ cũ̶ caĩrõ, yu̶ pu̶ame cũ̶ wãmopu̶ cũ̶ cacũ̶gori tunuarẽ yu̶ newũ̶ yua. Bairo nerĩ, yu̶ neu̶gacõãwũ̶ ti pũrõrẽ yua. Bairo yu̶ cau̶garo, cũ̶ caĩatatorea bairo yu̶ riserore mai beroa ocore bairo caroa majũ ipiticoapu̶. Bairopu̶a, yu̶ paaropu̶ yu̶ cau̶gajãjoro pu̶ame roquere, yu̶ paaro roro majũ jũ̶gũẽcoápu̶. Carorije capiyarijere marĩ caetijãrõ, capũnirõrẽ bairo yu̶ paaro pũniwũ̶. 11Bairo cabairipau̶a, bairo ñiwã: “Mai, mu̶rẽ ru̶sacõãña Dios cũ̶ caĩrĩjẽrẽ camasãrẽ na mu̶ caquetibu̶ju̶ ãnipee. Bairi tocãnacã macãã macããnarẽ na mu̶ quetibu̶ju̶gu̶. Nipetiro tocãnacã yepaa macããna cũ̶ãrẽ na mu̶ quetibu̶ju̶gu̶. Tocãnacã poa macããna apeye bu̶su̶ri majã, bairi nipetiro quetiuparã reyes cũ̶ãrẽ na mu̶ quetibu̶ju̶nemogu̶ tunu,” ñiroyawã yua.

will be added

X\