FILIPENSES 4

1Tore bairo cabaiãnio, yu̶ bairãrẽ bairo caãna, yu̶ camairã, bu̶tioro majũ yu̶ caĩñagarã, atore bairo mu̶jããrẽ ñiña: U̶seanio joroque yu̶ mu̶jãã átiya. Jesucristo mena mu̶jãã caãnicõãnierẽ tũ̶goñarĩ, “Yu̶ paarique yasietigaro,” ñi tũ̶goñatutuajãñuña. Bairi, bairo jeto áticõãnajẽcu̶sa: “Jesucristore cũ̶ tũ̶gou̶sajãnaeticõãña,” ñiña. 2Apeyera tunu mu̶jãã mena macããna rõmirĩ Evodia, bairi Síntique cũ̶ãrẽ ñiña: Mu̶jãã, pu̶garãpu̶a marĩ Quetiupau̶ yarã rõmirĩ ãnirĩ jĩcã yeri pũnacu̶narẽ bairo tũ̶goñarĩqũẽcu̶sa. 3Mu̶ cũ̶ã, yu̶ bapa, yu̶ mena caroaro caquetibu̶ju̶ricu̶, bairo mu̶ caátipee yu̶ boya: Evodia, bairi Síntique cũ̶ãrẽ na ju̶ása. Caroa ãnajẽ pu̶amerẽ na quetibu̶ju̶ya. Na pu̶ame popiye baimirãcũ̶ã, camasãrẽ yu̶ ju̶quetibu̶ju̶nemonucũwã Dios na cũ̶ canetõõrĩjẽ quetire. Clemente mena, bairi aperã yu̶re caju̶átinemorã mena cũ̶ã camasãrẽ yu̶ ju̶quetibu̶ju̶nemonucũwã. Na cũ̶ã Dios mena cacatiãniparãrẽ woaturica tutipu̶ merẽ cawoatuecoricarã niñama. 4Bairi tocãnacã rũ̶mu̶a, “Marĩ Quetiupau̶ yau̶ yu̶ ãniña,” ĩ tũ̶goña u̶seanicõãña. Mu̶jããrẽ ñinemoña: ¡U̶seanicõãña! 5Tunu bairoa caroaro nu̶cũ̶bu̶gorique mena ãnajẽcu̶sa, “Cañurã niñama,” aperãrẽ na mu̶jãã caĩeconucũparore bairo, ĩrã. Marĩ Quetiupau̶ pu̶ame yoaro mee atígu̶mi ati yepapu̶re. 6Bairi ati u̶mu̶recóo cabaipee jĩcã wãme ũnoacãrẽ tũ̶goñarĩqũẽ paipatowãcãẽtĩcõãña. Dios pu̶amerẽ cũ̶ jẽniña nipetirije ati u̶mu̶recóo cabaipeere. Tunu jẽni yaparorã, “Dios, jãã mena mu̶ ñujãñuña,” qũĩña. 7Bairo mu̶jãã caátiãmata, Dios pu̶ame caroa yeri pũna cu̶tajere mu̶jãã jogu̶mi. Tie cũ̶ cajorije pu̶amerẽ ni jĩcãũ̶ ũcũ̶ tũ̶gomasĩ peyoetigu̶mi, netõjãñurõ caroa majũ caãnoi. Bairi mu̶jãã, caroa yeri pũna cacũ̶gorã ãnirĩ mu̶jãã tũ̶goñatutuacõã ninucũgarã. Jesucristo yarã ãnirĩ bairoa mu̶jãã baicõã ninucũgarã. 8Bairi yu̶ bairãrẽ bairo caãna atore bairo mu̶jããrẽ ñitu̶sagu̶: Nipetirije cariape caãnierẽ, bairi tunu nipetirije marĩ canu̶cũ̶bu̶gorije ũnie cũ̶ãrẽ cariape tũ̶goñaña. Nipetirije cariape marĩ caátie cũ̶ãrẽ tũ̶goñaña. Tunu jĩcã wãmeacã ũno roro tũ̶goña asueticõãña. Tunu nipetirije ãmeo maitũ̶goñarĩqũẽ, bairi tunu, “Cañurĩjẽ niña,” nipetirije camasã na caĩtũ̶goñarĩjẽ cũ̶ãrẽ tũ̶goñaña. Tunu nipetirije nocãrõ caroa ũnie, bairi tunu caroa mu̶jããrẽ Dios cũ̶ caátiere cũ̶ mu̶jãã catũ̶goñabasapeopee cũ̶ãrẽ tũ̶goñaña. 9Bairi mu̶jããrẽ yu̶ caquetibu̶ju̶cũrĩqũẽrẽ bairo áticõãña. Mu̶jãã, yu̶ caĩrĩqũẽrẽ catũ̶goricarã ãnirĩ, bairi yu̶ caátajere caĩñarĩcãrã ãnirĩ bairo ása. Bairo mu̶jãã caátiãno, Dios, caroa yeri pũna cu̶tajere cajou̶ pu̶ame mu̶jãã mena ãnicõã nigu̶mi. 10Apeyera tunu nemorõ yu̶re mu̶jãã catũ̶goñarõĩ yu̶ u̶seanijãñuña. Yu̶ cabopacarijere masĩrĩ yu̶ mu̶jãã ju̶átigayupa. Baipu̶a, “Yu̶ mu̶jãã masiriticoasupa,” ĩ mee ñiña. “Yu̶ mu̶jãã caju̶átibujiopee pu̶ame manatõ,” ĩ pu̶ame roque ñiña. 11Tunu bopacari mu̶jããrẽ jẽnirẽ bairo ĩ mee ñiña. Noo yu̶ cacũ̶gorijeaca mena tocãrõã yu̶ u̶seanimasĩña. 12Jĩcã rũ̶mu̶ bopacau̶ majũ yu̶ ãmu̶. Ape rũ̶mu̶ pairo netõrõ yu̶ cũ̶gowu̶. Bairi noo cabairije watoa yu̶ ãnicõã masĩña. Queyari u̶garique cũ̶goecu̶ cũ̶ã, o pairo u̶garique cũ̶gou̶ cũ̶ã yu̶ ãnicõã masĩña. 13Noo tocãnacã wãme cabairo yu̶ nu̶cãcõã nimasĩña, Jesucristo yu̶re tũ̶goñatutuarique cũ̶ cajoroi. 14Bairo yu̶ cabaiãnimasĩmiatacũ̶ãrẽ, mu̶jãã pu̶ame yu̶ cacũ̶goetipau̶re yu̶ mu̶jãã ju̶ápu̶. Bairo mu̶jãã caáto ñujãñuña. 15Mu̶jãã ya yepa Macedoniapu̶ caãniatacu̶ yu̶ cawitiro bero, Dios camasãrẽ cũ̶ canetõõrĩjẽ quetire yu̶ caquetibu̶ju̶ñesẽãjũ̶goripau̶pu̶, mu̶jãã, Filipo macããna jeto yu̶ mu̶jãã ju̶ápu̶. Mu̶jãã, Jesucristo yaye quetire yu̶ caquetibu̶ju̶riquere tũ̶gou̶seanirã, yu̶ mu̶jãã joyupa yu̶re caru̶sarijere. 16Tunu bairoa Tesalónica macãpu̶ yu̶ caãno, jĩcãni mee yu̶ mu̶jãã jonemoñupã tunu yu̶re caru̶sarijere. 17“Yu̶re mu̶jãã cajorijere caĩñajou̶re bairo yu̶ ãniña,” ĩ mee ñiña. “Dios marĩrẽ cũ̶ caĩñabeseri rũ̶mu̶ caetaro mu̶jããrẽ caroare cũ̶ cajopee netõjãñurõ to ãmarõ, yu̶re mu̶jãã cajorije jũ̶gori,” ĩgu̶ ñiña. 18Merẽ yu̶ mu̶jãã cajoriquere yu̶ cũ̶gopeyocõãña. Bairi yu̶ caborije netõrõ yu̶ cũ̶goya. Epafrodito mena yu̶re mu̶jãã cajorique mena yu̶ caborije netõrõ yu̶ cũ̶goya ãmerẽ yua. Yu̶re mu̶jãã cajorique pu̶ame werea ũnie caroa caju̶tiñurĩjẽ mena Diore altar mesapu̶ na cajoemu̶gõjorijere bairo baiya. 19Bairi Jesucristo yarã mu̶jãã caãnoi, marĩ pacu̶ Dios pu̶ame nipetirije mu̶jããrẽ caru̶sarijere jogu̶mi pairo majũ, pairo cacũ̶gou̶ ãnirĩ. 20Bairi atore bairo ñiña: ¡To petieticõãto marĩ Pacu̶ Diore cũ̶ marĩ cabasapeorije! Bairoa to baiáto. 21Bairi yu̶ ñurotijoya mu̶jãã nipetiro Dios yarã, Jesucristo yaye quetire catũ̶gou̶sarãrẽ. Tunu bairoa marĩ yarã yu̶ mena caãna cũ̶ã mu̶jãã ñurotijoyama. 22Torea bairo nipetiro ato macããna Dios yarã, bairi quetiupau̶ emperador romano paabojari majã cũ̶ã mu̶jãã ñurotijoyama. 23Marĩ Quetiupau̶ Jesucristo mu̶jãã nipetirore caroare cũ̶ jonemoáto. Tocãrõã niña atie queti yu̶ cawoaturije.

will be added

X\