FILIPENSES 3

1Yu̶ yarã, yu̶ bairãrẽ bairo caãna, ãmerẽ mu̶jããrẽ yu̶ quetibu̶ju̶tu̶sagu̶: ¡Jesucristo mena u̶seanirĩ ãnicõãña! Bairo mu̶jããrẽ yu̶ caĩwoaátajere tunu ãmerẽ yu̶ caĩwoatunemorõ yu̶re ricaati baipatowãcõẽtĩña. Tunu tore bairo yu̶ caáto mu̶jããrẽ ñumajũcõãña. 2Bairi ricaati caquetibu̶ju̶rãrẽ na tũ̶goñamasĩrĩ ãña. Na ũna, roro caána ãnirĩ, camasã na rupau̶ macããjẽrẽ na yisetarotinucũñama, “Dios yarã marĩ ãnirõã,” ĩ tũ̶goñamirã. 3Na pu̶ame na rupau̶ macããjẽrẽ cayisetaricarã na caãnimiatacũ̶ãrẽ, cũ̶ yarãrẽ bairo na ĩñaẽtĩñami Dios. Marĩ pu̶ame roquere cũ̶ yarãrẽ bairo marĩ ĩñañami, cũ̶ mena marĩ catũ̶goñatutuarije jũ̶gori. Bairo ãna, Espíritu Santo cũ̶ camasĩõrĩjẽ jũ̶gori Diore cũ̶ marĩ ĩroaya. Tunu, “Jesucristo yarã marĩ ãniña,” u̶seanirĩqũẽ mena marĩ ĩ tũ̶goñaña. Ape wãme, bui marĩ rupau̶ macããjẽ jũ̶gori marĩrẽ dope bairo átimasĩã maa. 4Baipu̶a, ni jĩcãũ̶ ũcũ̶, “¡Baietiya! ¡Átimasĩjãñuña marĩ rupau̶ macããjẽrẽ yisetarique!” cũ̶ caĩata, yu̶ pu̶ame, “Tocãnacãũ̶ netõrõ Dios yau̶ yu̶ ãniña,” ñi masĩbujiou̶, nipetiro netõrõ tie ũnierẽ caátacu̶ ãnirĩ. Tocãnacã wãme jãã ñicũ̶jãã na caroticũrĩqũẽrẽ yu̶ átipeyocõãwũ̶. ¡Tũ̶goñijate! 5Jĩcã wãmo peti itia pẽnirõ cãnacã rũ̶mu̶rĩ yu̶ cabuiaricaro bero, yu̶ rupau̶ macããtõrẽ yisetayupa, jãã, judío majã, jãã caátinucũrĩ wãmerẽ bairo. Bairi Israel majã yau̶ ãnirĩ, Benjamín ãnacũ̶ ya poa pãrãmipu̶ yu̶ buiayupa. Bairi hebreo yaye bu̶su̶, judío majã yau̶ majũ yu̶ ãniña. Yu̶ pacu̶ yarã, judío majã jeto ãma. Bairo tunu bu̶tiácú̶pu̶, Moisés ãnacũ̶ cũ̶ caroticũrĩqũẽrẽ caĩroari majõcu̶ ãnirĩ, fariseo majã mena macããcũ̶ yu̶ ãmu̶. 6Bairo caãcũ̶ majũ ãnirĩ, Jesucristo yaye cũ̶ caquetibu̶ju̶cũrĩqũẽrẽ catũ̶gou̶sari majã pu̶amerẽ popiye na baio joroque na yu̶ ápu̶. Tunu bairoa ni jĩcãũ̶ ũcũ̶, Moisés ãnacũ̶ cũ̶ caroticũrĩqũẽrẽ di wãme ũnorẽ, “Jĩcãrõ tũ̶ni áperiyami,” ñi masĩẽmi. 7Bairo tirũ̶mu̶pu̶re yu̶ caãnajẽ cu̶tajere, “Caãnimajũrĩjẽ niña,” caĩtũ̶goñañarĩcũ̶ nimicũ̶ã, ãmerẽ yua, “Tie ñe wapa maa,” ñi tũ̶goñaña. Jesucristo yau̶ pu̶ame ãnigu̶, tore bairo yu̶ caãnajẽ cu̶tajere yu̶ jãnacõãwũ̶. 8Bairi yu̶ Quetiupau̶ Jesucristore yu̶ camasĩrĩjẽ tocãnacã wãme netõrõ caãnimajũrĩjẽ niña. Jesucristo yau̶ pu̶ame ãnigu̶, yu̶ caãnajẽ cu̶tijũ̶gorique nipetirijere yu̶ jãnapeticõãwũ̶. “Tie ñe wapa maa,” ñi tũ̶goñaña yu̶ caãnajẽ cu̶tijũ̶goriquere. 9Nipetirijere yu̶ jãnapeticõãwũ̶, cũ̶ yau̶ majũ ãnimasĩgu̶. Bairo Jesucristo mena yu̶ catũ̶goñatutuarije jũ̶gori, carorije wapa cacũ̶goecu̶re bairo ñiñañami Dios, Moisés ãnacũ̶ cũ̶ caroticũrĩqũẽrẽ caroaro yu̶ caátie jũ̶gori mee. Bairi ape wãme camasã netõgarã na caátigamirĩqũẽ pu̶ame yu̶re wapa maa. 10Atie pu̶ame niña caãnimajũrĩjẽ: Jesucristore cũ̶ yu̶ masĩgamajũcõãña bu̶tioro. Jesucristo cariacoatacu̶ cũ̶ caãnimiatacũ̶ãrẽ, Dios cũ̶ catiotutua masĩñupĩ. Tie tutuarique majũrẽã yu̶ cũ̶ã yu̶ yeripu̶ yu̶ bomajũcõãña. Tunu yu̶ cũ̶ã ñi tũ̶goñamasĩgaya: “ ‘Jesucristo mena popiye marĩ baigarã. Cũ̶ mena marĩ baiyasigarã,’ ĩ quetibu̶ju̶rique dope bairo ĩgaro to ĩñati,” netõjãñurõ ñi tũ̶goñamasĩgaya. 11Bairo bairi yua, Dios cũ̶ yarã cariacoatanarẽ tunu na cũ̶ cacatiopa rũ̶mu̶ caetarore tũ̶goñarĩ, yu̶ cũ̶ãrẽ cũ̶ cacatioparore yu̶ coteya. 12Bairo cotemicũ̶ã, “Ãmerẽ yu̶ caátie Dios cũ̶ caborijere ñe ũnie ru̶saeto yu̶ átipeyocõãwũ̶,” mu̶jããrẽ ñiẽtĩña. Baipu̶a, tiere jĩcãrõ tũ̶ni átipeyogu̶ yu̶ baiya. Mai, caãnijũ̶goripau̶pu̶ Jesús pu̶ame yu̶ netõõwĩ, yu̶re cũ̶ caátiroticũrĩqũẽrẽ bairo yu̶ caátipeyoparore bairo ĩ. 13Yu̶ yarã, “Yu̶ majũã ñe ũnie caroaro yu̶ caátie ru̶saeto,” ñiẽtĩña. Bairo pu̶ame ñi tũ̶goñaña: Tirũ̶mu̶pu̶re yu̶ caãnajẽ cu̶tajere yu̶ majũã yu̶ masiritiya. Pu̶gani cãrõ tiere yu̶ tũ̶goñanemoetigu̶ yua. Caroaro yu̶ caátipee pu̶ame roquere yu̶ tũ̶goñajũ̶goyeticõã ninucũña. 14Bairi caatu̶eperi majõcu̶ premiorẽ ñegu̶, bu̶tioro wẽpũ̶rõ mena cũ̶ caátore bairo yu̶ cũ̶ã bu̶tioro yu̶ átiya Dios yaye yu̶re cũ̶ caátiroticũrĩqũẽrẽ. Bairo yu̶ caáto yua, Jesucristo jũ̶gori yu̶ cawapatapee Dios yu̶re cũ̶ cajogarijere yu̶ jogu̶mi. 15Marĩ nipetiro Jesucristo yaye quetire caroaro catũ̶gou̶sarã yu̶ caĩrõrẽ bairo marĩ catũ̶goñarõ boya. Ni jĩcãũ̶ ũcũ̶ mu̶jãã mena macããcũ̶ ricaati cũ̶ catũ̶goñaata, Dios pu̶ame caroare cũ̶ masĩõgu̶mi. 16Bairo pu̶ame ñuña marĩrẽ: Jesucristo yaye cũ̶ caquetibu̶ju̶cũrĩqũẽ marĩ catũ̶gou̶sajũ̶goricarore bairo marĩ caáticõãno boya. 17Yu̶ yarã, yu̶ bairãrẽ bairo caãna, yu̶ caátiãnierẽ bairo ãnajẽcu̶sa mu̶jãã cũ̶ã. Tunu noa ũna mu̶jããrẽ jãã caátiroticũrĩqũẽrẽ bairo caána cũ̶ãrẽ na ĩñacõrĩ caroaro ãnajẽcu̶sa. 18Aperã pu̶ame roque caroaro ãmerĩñama. Na cabairijere jĩcãni mee, capee majũ mu̶jãã yu̶ quetibu̶ju̶miwũ̶. Ãmerẽ tunu tie na caátiãnierẽ tũ̶goña yapapuari, caapee oco umayurique mena mu̶jããrẽ ñinemoña tunu: Naa, bairo baiãna, “Jesucristo yucu̶pãĩpu̶ cũ̶ cariarique dope bairo átimasĩã maa,” caĩrãrẽ bairo baicõã niñama. 19Na pu̶ame na caátiãnijesorije jetore bu̶tioro tũ̶goñañama. Tunu bairoa roro na caátiere bobotũ̶goñapeerea, tiere átibotioãniñama. Ati yepa macããjẽ jetore bu̶tioro tũ̶goñañama. Bairo caáticõãna ãnirĩ yua, cabero yasiricaropu̶ ágarãma. 20Marĩ pu̶ame roque u̶mu̶recóopu̶ caãniparã marĩ ãniña. Tunu bairoa marĩrẽ canetõũ̶, Jesucristo, u̶mu̶recóopu̶ caãniatacu̶ nemo cũ̶ catunuetarore caroaro cũ̶ marĩ ãnicotegarã. 21Bairo etau̶ yua, marĩ rupau̶, cañueti rupau̶re wasoagu̶mi, cũ̶ rupau̶ caroa rupau̶re bairo marĩ cacũ̶goparore bairo ĩ. Ati u̶mu̶recóo macããjẽ nipetirijere carotimasĩ ãnirĩ bairo marĩ átigu̶mi.

will be added

X\