FILIPENSES 2

1Jesucristo pu̶ame caroaro mu̶jãã ju̶átinemoñami, mu̶jãã yeri caroaro to cañajããparore bairo ĩ. Tunu mu̶jããrẽ tũ̶goñamaiñami, caroa yericu̶tajere mu̶jãã cacũ̶goparore bairo ĩ. Tunu Espíritu Santo mu̶jãã mena nicõãñami. Bairi mu̶jãã majũ mu̶jãã ãmeo maimasĩña. Cabopacarã cũ̶ãrẽ mu̶jãã ĩñamaimasĩña. 2Bairo mu̶jãã cabairoi, atore bairo mu̶jãã caãnierẽ yu̶ boya: Caroaro ãmeo maicõãninucũña. Tunu jĩcã yericu̶narẽ bairo jĩcãrõrẽ bairo mairĩ, bairi jĩcãrõrẽ bairo tũ̶goñarĩ, jĩcãrõrẽ bairo ãnajẽcu̶sa. 3Tunu bairoa aperã na caátiere na netõga tũ̶goñaeticõãña. Tunu na ĩñatuti tũ̶goñaeticõãña. “Marĩ jeto marĩ masĩbotioya,” ĩẽna, paaya Jesucristo mu̶jããrẽ cũ̶ caroticũrĩqũẽrẽ. Mu̶jãã tocãnacãũ̶pu̶a, nipetiro camasãrẽ na ĩroaya. Bairo na ĩroari, di rũ̶mu̶ ũno, “Marĩ majũ aperã netõrõ caãnimajũrã marĩ ãniña,” ĩ tũ̶goñaeticõãña. 4Ni jĩcãũ̶ ũcũ̶ mu̶jãã mena macããcũ̶ cũ̶ yaye caroaro cũ̶ caãnipee jetore cũ̶ bootũ̶goñaeticõãto. Aperã yaye caãnipee ũnie cũ̶ãrẽ cũ̶ tũ̶goñato. 5Jesucristo caroaro cũ̶ catũ̶goñarĩcãrõrẽã bairo mu̶jãã cũ̶ã tũ̶goñaña. 6Bairo pu̶ame tũ̶goñañupĩ Jesús: Dios macũ̶ majũ nimicũ̶ã, u̶mu̶recóopu̶ cũ̶ carotimasĩrĩjẽrẽ bairo ápeyupi. 7Bairo Dios cũ̶ caãnierẽ jãnacõãrĩ yua, ati yepapu̶re marĩrẽ bairo rupau̶cu̶tiri buiaetayupi. Cabero bu̶tiácú̶, paabojari majõcu̶re bairo átiãninucũñupĩ. 8Marĩrẽ bairo rupau̶cu̶tiri, cũ̶ majũã cabu̶goro macããcũ̶rẽ bairo baiyupi. Bairo cũ̶ pacu̶ Dios cũ̶ carotirore bairo cabai ãnirĩ pajĩãecori riayupi. Camasã na caĩñajoro bobooro roro majũ yucu̶pãĩpu̶ papuatuecori riayupi. 9Bairo cũ̶ cabairique jũ̶gori tocãnacãũ̶ buipu̶ netõrõ caãnimajũũ̶ cũ̶ cũñupĩ Dios. Camasã tocãnacã wãme na caãmeoĩroarique netõjãñurõ caroa cũ̶ wãmetiyupi Dios. 10Bairi cũ̶ wãmerẽ tũ̶gorã, nipetiro caãna, Diotu̶ macããna, bairi ati tuti macããna cũ̶ã, bairi ati yepa roca macããna cũ̶ã nipetiro ru̶popatuuri mena etanumurĩ Jesure qũĩroagarãma. 11Bairi tunu ati u̶mu̶recóo nipetiro caãna, “¡Jesucristo, Quetiupau̶, caãnimajũũ̶ niñami!” ĩrĩ qũĩroagarãma. Bairo qũĩroari, cũ̶ pacu̶ Dios cũ̶ãrẽ qũĩroagarãma. 12Apeyera tunu yu̶ bairãrẽ bairo caãna, yu̶ camairã mu̶jããrẽ ñiña: Mu̶jãã tu̶pu̶ yu̶ caãno, yu̶ yaye quetibu̶ju̶riquere caroaro mu̶jãã tũ̶gou̶sawu̶. Bairi ãmerẽ cayoaropu̶ mu̶jããrẽ yu̶ caãniweyomiatacũ̶ãrẽ, yu̶ caĩjorijere mu̶jãã tũ̶gou̶sagarã. Netõjãñurõ mu̶jãã catũ̶gou̶saro yu̶ boya. Mu̶jãã, Dios cũ̶ canetõõrĩcãrã ãnirĩ, mu̶jããrẽ cũ̶ caroticũrĩqũẽrẽ nu̶cũ̶bu̶gorique mena tũ̶goña jãnaeticõãña. 13Dios pu̶ame mu̶jãã yeripu̶ caroaro mu̶jãã catũ̶goñapeere mu̶jãã joyami. Bairo jori yua, mu̶jãã ju̶átinemogu̶mi, nipetiro caroaro mu̶jãã caátipeere mu̶jãã caátipeyoparore bairo ĩ. 14Bairi nipetirije mu̶jãã capaarique cu̶tiere u̶seanirĩqũẽ mena ása. Ãmeo bu̶su̶pairicaro mano, jĩcãũ̶ yericu̶narẽ bairo paaya. 15Tore bairo mu̶jãã capaarique cu̶tiere yu̶ boya, noa ũna aperã jĩcã wãme ũno mu̶jãã capaarijere na cabu̶su̶paietiparore bairo ĩrã. Dios pũnaa carorije caáperãrẽ bairo ãnajẽcu̶sa. Bairi ati yepa macããna carorã watoapu̶ nimirãcũ̶ã, mu̶jãã roque caroaro ãnajẽcu̶sa. Torecu̶, ati yepa macããna canaitĩãrõpu̶ caãnarẽ bairo caãna watoa nimirãcũ̶ã, mu̶jãã pu̶ame ñocõã na cabusuworore bairo mu̶jãã caãno ñuña. 16Bairo ãna, Dios yaye quetire mu̶jãã caáticõãnajẽrẽ na quetibu̶ju̶ masĩõña camasĩẽnarẽ. Bairo mu̶jãã caquetibu̶ju̶masĩõata, Jesucristo ati yepapu̶ nemo cũ̶ catunuetari rũ̶mu̶ caetaro, caroaro yu̶ tũ̶goña yerijãñagu̶, “Mu̶na mee Filipo macããnarẽ na yu̶ quetibu̶ju̶ñesẽãñupã,” ñi tũ̶goñagu̶. 17Tunu Jesucristo yaye yu̶ caquetibu̶ju̶rije jũ̶gori yu̶re na capajĩãpa rũ̶mu̶ etaro baiya. Bairo cabaimiatacũ̶ãrẽ, Dios yaye queti mu̶jããrẽ yu̶ caquetibu̶ju̶riquere tũ̶goñarĩ, yu̶ u̶seaniña. Mu̶jãã pu̶ame tiere tũ̶gou̶sari, Jesucristo mena mu̶jãã tũ̶goñatutuaya. Bairo mu̶jãã cabairijere ĩñarĩ, Dios pu̶ame mu̶jããrẽ ĩñajesoyami. Bairi marĩ nipetiro marĩ u̶seaniña, tiere tũ̶goñarĩ. 18Bairi yu̶re bairo mu̶jãã cũ̶ã u̶seanicõãña. 19Apeyera tunu marĩ Quetiupau̶ Jesucristo cũ̶ caborore bairo yoaro mee mu̶jãã tu̶pu̶ cũ̶ yu̶ jogu̶ Timoteore, mu̶jãã caátiãnie quetire tũ̶gou̶seanigu̶. 20Timoteo pu̶ame yu̶re bairo tũ̶goñanucũñami. Ni jĩcãũ̶ ũcũ̶ cũ̶rẽ bairo caãcũ̶ mu̶jããrẽ camaitũ̶goñanucũũ̶ maami. 21Aperã nipetiro na yaye caãnipee jetore bonucũñama. Marĩ caátiere Jesucristo cũ̶ carotirijere borã mee baiyama. 22Merẽ Timoteore cũ̶ mu̶jãã masĩjãñuña caroaro cũ̶ caátiãnierẽ. Dios yaye quetire caroaro yu̶re cũ̶ caju̶quetibu̶ju̶nemorĩjẽ cũ̶ãrẽ mu̶jãã masĩjãñuña. Yu̶ macũ̶rẽ bairo caãcũ̶ ãnirĩ yu̶ ju̶átinemoñami Timoteo. 23Bairi ato presopu̶ caãcũ̶ yu̶re na caátipeere masĩpu̶, mu̶jããtu̶ cũ̶ yu̶ jogu̶. 24Bairo ãmeacã cũ̶ jogamicũ̶ã, Dios cũ̶ caborore bairo yu̶ cũ̶ã jicoquei mu̶jãã tu̶pu̶ yu̶ atíga ñitũ̶goñaña. 25Torea bairo marĩ yau̶ Epafrodito cũ̶ãrẽ mu̶jãã tu̶pu̶ cũ̶ yu̶ catunuojoro ñuña. Cũ̶ pu̶ame camasãrẽ yu̶ ju̶quetibu̶ju̶nemonucũñami. Tunu yu̶re bairo popiye baiyami. Bairi yu̶ mu̶jãã cabapacu̶tirotijoricu̶re ãmerẽ mu̶jãã tu̶pu̶ cũ̶ tunuojogu̶ yu̶ átiya. 26Epafrodito pu̶ame bu̶tioro mu̶jãã nipetirore ĩñagayami. Tũ̶goñarĩqũẽ paijãñuñami, cũ̶ cariariquere mu̶jãã caqueti tũ̶goroi. 27Cariapea mu̶jãã tũ̶goricarã. Riajãñuwĩ Epafrodito. Bairo riari, riayasicoabujiowĩ. Bairo cũ̶ cabaimiatacũ̶ãrẽ, marĩ Pacu̶ Dios pu̶ame qũĩñamairĩ cũ̶ catiowĩ. Yu̶ cũ̶ãrẽ ñiñamairĩ, roro cũ̶ cabairijere ĩñarĩ nemojãñurõ cũ̶ tũ̶goña yapapuaeticõãto ĩ, cũ̶ catiowĩ Dios Epafroditore. 28Bairi yoaro mee patowãcãrõ mena cũ̶ yu̶ tunuojogu̶, cũ̶ mu̶jãã caĩñau̶seani tũ̶goñatutuaparore bairo ĩ. Bairo yu̶ caápata, yu̶ cũ̶ã yu̶ tũ̶goñarĩqũẽ paietigu̶. 29Yu̶ mu̶jãã ju̶quetibu̶ju̶masĩẽtĩña, cayoaropu̶ caãna ãnirĩ. Baipu̶a, yu̶re mu̶jãã caju̶átinemorotijoricu̶ pu̶ame caroaro yu̶ ju̶átinemoñami. Cũ̶ cũ̶ã Jesucristo yaye quetire camasãrẽ yu̶ ju̶quetibu̶ju̶nucũñami. Bairo yu̶ ju̶quetibu̶ju̶ri yua, cauwiorije watoa ãnirĩ riacoabujiowĩ. Torena, mu̶jãã tu̶pu̶ cũ̶ caetaro, u̶seanirĩqũẽ mena cũ̶ mu̶jãã jẽnibocágarã, marĩrẽ bairo marĩ Quetiupau̶ yau̶ cũ̶ caãnoi. Tunu bairoa nipetiro cũ̶, Epafroditore bairo caãnarẽ na ĩroaya.

will be added

X\