SAN MATEO 7

1Ĩ quetibu̶ju̶ yaparo, atore bairo na ĩnemoñupũ̶ tunu: “Aperã noo na caátiere roro bu̶su̶paieticõãña, mu̶jããrẽ Dios cũ̶ã mu̶jãã caátiere, ‘Roro átiyama,’ cũ̶ caĩetiparore bairo ĩrã. 2Dios pu̶ame aperã na caátiãnierẽ roro mu̶jãã cabu̶su̶pairo cãrõ, mu̶jãã ĩroaetigu̶mi. Tunu bairoa aperãrẽ na mu̶jãã catuticõñarõ cãrõ jĩcãrõ tũ̶ni mu̶jãã cũ̶ãrẽ mu̶jãã tutigu̶mi. 3Tunu bairoa jĩcãũ̶ caũ̶mu̶ cũ̶ baire, ‘Mu̶ caapeapu̶ pũrõãcã jãñaña. Yu̶ nerocapa,’ qũĩñupũ̶. Bairo qũĩmicũ̶ã, cũ̶ pu̶ame tutu majũ cũ̶gocõãñami cũ̶ caapeapu̶. Tore bairo baiyami jĩcãũ̶ ũcũ̶ pairo roro caátacu̶, cũ̶ cũ̶ã petoaca roro caátacu̶re, ‘Roro mu̶ baiya,’ cũ̶ cũ̶ caĩbu̶su̶paiata. 5¡Caĩtopairã mu̶jãã ãniña! Torena, mu̶jãã pu̶ame roque rejũ̶goya mu̶jãã carorijere. Bairo átiri bero roque, mu̶jãã quetibu̶ju̶ masĩgarã aperã rorije na caátiere. 6“Tunu bairoa caroa majũrẽ marĩ joetiya wii yaiare. Tunu perlas caroa cabotiri rupaaca cũ̶ãrẽ yeseapu̶re marĩ wẽjoetiya. Bairo marĩ caápata, tiere peabato recoagarãma. Torea bairo Dios yaye bu̶su̶rique caroa majũ to caãnimiatacũ̶ãrẽ, wii yaia, bairi yeseare bairo caãnarẽ bairo catũ̶gogaenarẽ na quetibu̶ju̶eticõãña, caroa quetire roro na bu̶su̶eticõãto, ĩrã,” na ĩ quetibu̶ju̶yupu̶ Jesús. 7Ĩ quetibu̶ju̶ yaparo, atore bairo na ĩnemoñupũ̶ tunu: “Noa ũna na cajẽniata, na cajẽnirĩjẽrẽ bócamasĩgarãma. Tunu bairoa apeye ũnierẽ na camacãata, na camacãrĩjẽrẽ bócamasĩgarãma. Tunu jopepu̶ na capiiata, ti wii upau̶ pu̶ame ti jopere pããgu̶mi. Bairi tore bairo Diore mu̶jãã cajẽniata, mu̶jãã caãnimasĩpeere jogu̶mi. Bairi Diore mu̶jãã cajẽnirõ ñuña. 9“Mu̶jãã, capũnaacu̶na mu̶jãã pũnaa pan rupare na cajẽniata, ¿ũ̶tã rupare na mu̶jãã jobujiocu̶ti? Bairo mu̶jãã áperã. 10Tunu bairoa waire na cajẽniata, ¿ãña ũcũ̶rẽ na mu̶jãã jobujiocu̶ti? Bairo mu̶jãã áperã. 11Mu̶jãã, carorã nimirãcũ̶ã, mu̶jãã pũnaarẽ caroa wãmerẽ mu̶jãã jomasĩnucũña. Marĩ Pacu̶ Dios u̶mu̶recóo macããcũ̶ roque caroú̶ majũ niñami. Camasã netõrõ caroú̶ niñami. ¡Bairi noa ũna cũ̶rẽ cajẽnirãrẽ na jogu̶mi caroa ũnie majũrẽ! 12“Bairi aperã mu̶jãã na caátore mu̶jãã caborore bairo na cũ̶ãrẽ na nu̶cũ̶bu̶goya. Tore bairo marĩ ĩ quetibu̶ju̶ cũñañupã Moisés ãnacũ̶ bairi profeta majã cũ̶ã,” na ĩ quetibu̶ju̶yupu̶ Jesús. 13Ĩ quetibu̶ju̶ yaparo, atore bairo na ĩnemoñupũ̶ tunu: “Ati yepapu̶ mu̶jãã caãno, pu̶ga jopeere bairo niña. Jĩcã jope, pairi jope niña. Ti jope jããetaricaro esari wãã baucoaya. Bairo caroa wãã baumirõcũ̶ã, ti wãã yapapu̶ camasã na cayasipapau̶ niña. Bairo cabaimiatacũ̶ãrẽ, camasã capããrã ti jopere pããjããrĩ ti wããrẽ ánucũñama. Ape jope cũ̶ã niña õcã jopeaca. Ti jope jããetaricaro esaeti wãã baucoaya. Bairo cabairi wãã nimirõcũ̶ã, ti wãã yapapu̶ camasãrẽ tocãnacã rũ̶mu̶a caroaro na canetõpapau̶ niña. Bairo cabaimiatacũ̶ãrẽ, camasã petoaca ti jopere pããjããrĩ ti wããrẽ áyama. Mu̶jãã pu̶ame roque na mena mu̶jãã caátó yu̶ boya,” na ĩ quetibu̶ju̶yupu̶ Jesús. 15Ĩ quetibu̶ju̶ yaparo, atore bairo na ĩnemoñupũ̶ tunu: “ ‘Dios yaye bu̶su̶riquere mu̶jããrẽ jãã quetibu̶ju̶garã,’ jĩcããrã mu̶jããrẽ na caĩmiatacũ̶ãrẽ, bairo mu̶jããrẽ ĩtogarã baiyama. Na tũ̶gou̶saeticõãña. Ovejare bairo nurĩcãrã baumirãcũ̶ã, macãnu̶cũ̶ yaia, cauwarã majũrẽ bairo caãna niñama. 16Marĩ cau̶garije u̶se cũ̶ãrẽ marĩ jeetiya pota yucu̶pu̶. Tunu bairoa u̶garique, higuera na caĩrĩjẽ cũ̶ãrẽ marĩ jeetiya pota wopu̶. Torea bairo caĩtopairã ricaati na caátiãnierẽ ĩñarĩ, ‘Naana, caĩtopairã niñama,’ mu̶jãã ĩ masĩgarã. 17Tunu tocãnacãũ̶pu̶a yucu̶ caroú̶ pu̶ame caroare rícacu̶tiya. Apei yucu̶ caroricu̶ roque carorijere rícacu̶tiya. 18Yucu̶ caroú̶ pu̶ame carorijere ríca cu̶periya. Tunu bairoa apei yucu̶ caroricu̶ caroa ríca cu̶periya. 19Bairi camasã tocãnacãũ̶ã caroaro na caápericõãta, jĩcãũ̶ yucu̶, caríca maniirẽ quetíjoerocacõãrĩcãrõrẽ bairo na átirecõãgu̶mi Dios na cũ̶ãrẽ. Petoaca ru̶saya Dios camasãrẽ cũ̶ caĩñabesepa rũ̶mu̶. 20Tore bairo camasã na caátiãnierẽ ĩñamasĩrĩ tore bairo caátiãnarẽ na mu̶jãã ĩ masĩgarã,” na ĩ quetibu̶ju̶yupu̶ Jesús. 21Ĩ quetibu̶ju̶ yaparo, atore bairo na ĩnemoñupũ̶ tunu: “Tocãnacãũ̶pu̶a, ‘Jãã Quetiupau̶’ yu̶re caĩrã nimirãcũ̶ã, jĩcããrã na mena macããna ápérigarãma Dios cũ̶ carotimasĩrĩpau̶pu̶re. Noa ũna, yu̶ Pacu̶ u̶mu̶recóo macããcũ̶ cũ̶ carotirore bairo caáticõãna roque ágarãma. 22Ti rũ̶mu̶ camasãrẽ Dios na cũ̶ caĩñabesepa rũ̶mu̶ caetaro ĩña, atore bairo ñigarãma capããrã camasã yu̶re: ‘Jãã Quetiupau̶, jãã cũ̶ã mu̶ yaye bu̶su̶riquere jãã quetibu̶ju̶netõwũ̶ camasãrẽ. Tunu bairoa mu̶ wãme mena ĩrĩ, wãtĩ yeri pũnarẽ na jãã acuwiyojowu̶. Capee jãã átijẽñowũ̶ mu̶ camasĩrĩjẽ mena. Jããrẽ mu̶ masĩĩ,’ ñimigarãma ti rũ̶mu̶ caetaro. 23Bairo na caĩmiatacũ̶ãrẽ, atore bairo ñigu̶: ‘Mu̶jãã yu̶ masĩẽtĩña. Bairi ánája. ¡Mu̶jãã carorije cacũ̶gorã ãnirĩ yu̶ mena mu̶jãã ãmerĩgarã yua!’ na ñigu̶ caĩtori majãrẽ,” na ĩ quetibu̶ju̶yupu̶ Jesús. 24Ĩ quetibu̶ju̶ yaparo, ape wãmerẽ ĩcõñarĩ na ĩnemoñupũ̶ tunu Jesús: “Ni ũcũ̶ yu̶ yaye quetire tũ̶gori, cabero yu̶ caĩrõrẽ bairo caácu̶ atore bairo niñami: Tutuari wiire caqũẽnou̶rẽ bairo camasĩ niñami. Camasĩ pu̶ame cũ̶ ya wiire ũ̶tã bui qũẽnoñupũ̶. 25Bairi cabero oco pairo caocaro, ria puta, wiipu̶ etayuparo yua. Wĩno cũ̶ã bu̶tioro papuyuparo. Bairo cabaimiatacũ̶ãrẽ, ti wii pu̶ame toa nicõãñuparõ. Wii botare cayepa u̶su̶ropu̶ nu̶cõrĩ cũ̶ caqũẽnorĩcã wii ãnirĩ toa nicõãñuparõ. 26Tunu bairoa apei cũ̶ã yu̶ yaye quetire tũ̶gogaetiri, yu̶ caĩrõrẽ bairo caápei atore bairo niñami: Tutuaeti wiire caqũẽnou̶rẽ bairo caãcũ̶ niñami. Catũ̶goñamasĩẽcũ̶ ãnirĩ ũ̶tã bui mee, paputiropu̶ cũ̶ wiire qũẽnoñupũ̶. 27Bairi cabero oco pairo caocaro, ria puta, wiipu̶ etayuparo. Wĩno cũ̶ã bu̶tioro papuyuparo. Bairo cabairoi yua, ti wii pu̶ame pecoasuparo. Wii botare cayepa u̶su̶etopu̶ nu̶cõrĩ cũ̶ caqũẽnorĩcã wii ãnirĩ, ¡ñe mano ñapeticoasuparo!” na ĩ quetibu̶ju̶yupu̶ Jesús. 28Bairo camasãrẽ na ĩ quetibu̶ju̶ yaparo yua, nipetirã cũ̶ yaye quetire catũ̶gorã etarã pu̶ame cũ̶ tũ̶gocõã maniásuparã. 29Jesús pu̶ame Moisés ãnacũ̶ cũ̶ caroticũrĩqũẽrẽ cajũ̶gobueri majãrẽ bairo camasãrẽ na quetibu̶ju̶esupu̶. Carotimasĩ cũ̶ caquetibu̶ju̶rore bairo na quetibu̶ju̶yupu̶. Bairi cũ̶ yaye quetire tũ̶gori, cũ̶ tũ̶gocõã maniásuparã nipetiro camasã.

will be added

X\